1 Samuɛlɛ 3:1-21
-
Samuɛlɛ ambelamɛ dia monga omvutshi (1-21)
3 L’etena kɛsɔ, Samuɛlɛ akakambɛka+ Jehowa lo ɛlɔmbwɛlɔ ka Eli. Koko lo nshi shɔ, ɔtɛkɛta w’oma le Jehowa kondekaka mbokɛma ndo waɛnɛlɔ+ kondekaka monga.
2 Lushi lɔmɔtshi, Eli aketama lo dihole diakandetamaka ndo washo ande waki loonge, ko nde kokoka mɛna.+
3 Tala dia Nzambi+ diaki diatadimala ndo Samuɛlɛ aketamaka lo tɛmpɛlɔ*+ kaki Jehowa, lɛnɛ aki Ɔshɛtɛ wa Nzambi.
4 Ko Jehowa akelɛ Samuɛlɛ. Nde akakadimola ate: “Dimi ɔnɛ.”
5 Nde akalawɔ otsha le Eli, ko akawotɛ ate: “Dimi ɔnɛ, nɛ dia wɛ kombele.” Koko nde akate ate: “Dimi hankele. Tshɔka tetame.” Ko nde akatshu ndo akatetama.
6 Jehowa akawelɛ nto ate: “Samuɛlɛ!” Ko Samuɛlɛ aketɔ, akatshu otsha le Eli ko akawotɛ ate: “Dimi ɔnɛ, nɛ dia wɛ kombele.” Koko nde akate ate: “Dimi hankele, ɔnami. Tshɔka tetame.”
7 (L’etena kɛsɔ ko Samuɛlɛ ateye Jehowa ndo ɔtɛkɛta wa Jehowa watashɔma le nde.)+
8 Ɔnkɔnɛ, Jehowa akawelɛ nto mbala ka 3 ate: “Samuɛlɛ!” Ko nde aketɔ, akatshu otsha le Eli ndo akate ate: “Dimi ɔnɛ, nɛ dia wɛ kombele.”
Ko Eli akashihodia dia Jehowa kakelɛka ɔnakɔ.
9 Ɔnkɔnɛ Eli akatɛ Samuɛlɛ ate: “Tshɔka tetame ndo naka nde ambokelɛ, kote wate: ‘Jehowa le, tɛkɛta, nɛ dia okambi ayɛ ekɔ lo mpokamɛ.’” Ko Samuɛlɛ akatshu ndo akatetama lo dihole diande.
10 Jehowa akaye, akayemala laawɔ ko akawelɛ oko mbala nkina ate: “Samuɛlɛ, Samuɛlɛ!” Ko Samuɛlɛ akate ate: “Tɛkɛta, nɛ dia okambi ayɛ ekɔ lo mpokamɛ.”
11 Jehowa akatɛ Samuɛlɛ ate: “Eenda, dimi layanga nsala dui dimɔtshi lo Isariyɛlɛ diayohahanya+ atoyi akɔ 2 w’onto tshɛ layodioka.
12 Lushi lɔsɔ, dimi layokotshɛ Eli kɛnɛ tshɛ kakamate lo dikambo dia luudu lande, oma l’etatelo polo l’ekomelo.+
13 Wɛ pombaka mbotɛ dia dimi layanga mbela dilanya dia pondjo lo luudu lande l’ɔtɛ wa munga keyande,+ nɛ dia anande wekɔ lo mbidja Nzambi+ mananu, koko nde haahangwɛ.+
14 Diakɔ diakamatshibe lo dikambo dia luudu laki Eli dia elambo kana weshasha+ hawokombaki pondjo pɛkato yalɔ.”
15 Samuɛlɛ aketama polo la pindju. Oma laasɔ, nde akadihola nkuke ya luudu la Jehowa. Samuɛlɛ akokaka wɔma mbutɛ Eli ɛnɛlɔ kakɔ.
16 Ko Eli akelɛ Samuɛlɛ ate: “Samuɛlɛ, ɔnami!” Nde akate ate: “Dimi ɔnɛ.”
17 Nde akawombola ate: “Akandakote? Lam’alangayɛ, tombishɛke. Nzambi akosha dilanya dia wolo naka wɛ mbishɛmi kaanga vuiwui 1 oma lo kɛnɛ tshɛ kakandakote.”
18 Ko Samuɛlɛ akawotɛ awui tshɛ ndo nde komboshɛ ndooko dui. Eli akate ate: “Ɔsɔ Jehowa. Nde asale kɛnɛ kele ɔlɔlɔ lo washo ande.”
19 Samuɛlɛ akatatetemalaka mbola ndo Jehowa aki kaamɛ la nde+ ndo ndooko dui diande diaki kokotshama.*
20 Isariyɛlɛ w’otondo, oma la Danɛ polo la Bɛrɛ-Shɛba wakeye dia Samuɛlɛ ambɔsɔnama oko omvutshi wa Jehowa.
21 Ko Jehowa akatetemala mɛnama la Shilo, nɛ dia Jehowa akayasholaka le Samuɛlɛ la Shilo l’ekimanyielo k’ɔtɛkɛta wa Jehowa.+
