1 Samuɛlɛ 30:1-31
30 Lam’akakome Davidɛ nde l’anto ande la Zikilangɛ+ lushi la 3, ase Amalɛka+ wakɔtɔ la ta lo sidɛ* ndo la Zikilangɛ ko wakalɔsha Zikilangɛ ndo wakakitshumbe la dja.
2 Vɔ wakatshu la wamato+ ndo anto tshɛ waki lɛkɔ, oyadi akɛnda kana epalanga. Vɔ kondjaka ndooko onto, koko wakawande ko wakatshu la wɔ.
3 Lam’akakome Davidɛ l’anto ande lo osomba, vɔ wakatane osomba wakalongodi la dja ndo wadiɛwɔ, anawɔ w’apami ndo anawɔ wa wamato wakatɔlami mfumbe.
4 Ko Davidɛ l’anto waki kaamɛ la nde wakatatɛ ndela la dui dia wolo polo ndo wolo wa vɔ ndela wamboshila.
5 Ndo wadi wa Davidɛ 2, mbuta ate Ahinɔama ose Jezɛrɛlɛ nde la Abigayɛlɛ laki wadi aki Nabala ose Karamɛlɛ+ wakatɔlama mfumbe.
6 Davidɛ aki la lɔkɔnyɔ l’efula, nɛ dia anto wakataka dia mbooka ave, dikambo anto tshɛ* wakawoke nkɛlɛ ka mamba l’ɔtɛ wakawashisha anawɔ w’apami ndo anawɔ wa wamato. Koko Davidɛ akayakeketsha l’ekimanyielo ka Jehowa Nzambi+ kande.
7 Ko Davidɛ akatɛ ɔlɔmbɛdi Abiyatara+ ɔna Ahimɛlɛkɛ ate: “Lam’alangayɛ, ela efodɛ lanɛ.”+ Ko Abiyatara akela efodɛ le Davidɛ.
8 Davidɛ akambola Jehowa+ ate: “Mbitshanya olui wa dengalenga ɔnɛ? Onde layowanda?” Ko Nde akawotɛ ate: “Yelawɔ, nɛ dia ndooko onyake wɛ ayowanda ndo wɛ ayotshungola+ tshɛ kakawɔshi.”
9 Mbala kakɔ ɔtɔi Davidɛ akatshu nde l’apami+ 600 waki kaamɛ la nde ndo wakatshu polo l’Okidi w’ashi* wa Bɛsɔrɛ, ko apami amɔtshi wakatshikala l’ɔkɔngɔ.
10 Davidɛ akatetemala mbatshanya nde l’apami 400, koko apami 200 wakaleke nɛmba ndo waki kokoka ntehɔ Okidi w’ashi wa Bɛsɔrɛ wakatshikala l’ɔkɔngɔ.+
11 Vɔ wakɛnyi pami kɛmɔtshi k’ose Edjibito l’oswe, ko wakaye la nde le Davidɛ. Vɔ wakawosha mbo ya ndɛ ndo ashi wa nnɔ,
12 kaamɛ la yema y’okate wa fingo ya lamula ndo ekate 2 wa vinyɔ. L’ɔkɔngɔ wa nde ndɛ, nde akakondja wolo,* nɛ dia nde kɔɔndɛ ndooko ɛngɔ ndo kɔɔnɔ ashi l’edja ka tanyi 3 la etsho 3.
13 Ko Davidɛ akawombola ate: “Wɛ onto laki na ndo oma lende ayaaye?” Ko nde akate ate: “Dimi lekɔ ose Edjibito ndo lekɔ mfumbe kaki pami kɛmɔtshi k’ose Amalɛka, koko nkumɛmi akantshike nɛ dia laki la hemɔ ambeta nshi 3.
14 Takalɔsha lo sidɛ* k’ɛtshi ka nkɛtɛ k’ase Kerɛtɛ+ ndo l’ɛtshi ka nkɛtɛ ka Juda ndo lo sidɛ* k’ɛtshi ka nkɛtɛ ka Kalɛba+ ndo takatshumbe Zikilangɛ la dja.”
15 Ko Davidɛ akawotɛ ate: “Onde wɛ ayɔnɔmbɔla polo le olui akɔ wa dengalenga?” Nde akakadimola ate: “Naka wɛ ayontshibɛ lo lokombo la Nzambi dia wɛ hatondjaka ndo hatonkimɔ le nkumɛmi, kete layokɔlɔmbɔla polo le olui akɔ wa dengalenga.”
16 Ko nde akɔɔlɔmbɔla polo lɛnɛ akawahandjɔnɛ l’ɛtshi ka nkɛtɛ k’otondo, walɛ, wanɔ ndo wasala fɛtɛ l’ɔtɛ w’efula ka diangɔ tshɛ diakawambe oma l’ɛtshi ka nkɛtɛ k’ase Filistiya ndo oma l’ɛtshi ka nkɛtɛ ka Juda.
17 Oma laasɔ, Davidɛ akaadiake oma ko pindju ka hiotshihotshi polo la dikɔlɔ diakayele. Ndooko kaanga pami 1 kakahande,+ onyake apami 400 wakalawɔ lo kamɛlɔ.
18 Davidɛ akatshungola kɛnɛ tshɛ kakɔshi+ ase Amalɛka ndo Davidɛ akatshungola wadiɛnde 2.
19 Ndooko kaanga ɛngɔ kawɔ 1 kakashishɔ, ntatɛ oma lo ɛngɔ koleki tshitshɛ polo lo ɛngɔ koleki woke. Vɔ wakatshungola anawɔ w’apami, anawɔ wa wamato ndo diangɔ diakawambe.+ Davidɛ akatshungola tshɛ kakɔsama.
20 Ko Davidɛ akɔshi ɛkɔkɔ tshɛ ndo ngɔmbɛ tshɛ yakawatshindjiya la ntondo ka dongalonga diawɔ hita. Vɔ wakate vate: “Ɔnɛ ekɔ diangɔ dia dimbo diaki Davidɛ.”
21 Oma laasɔ, Davidɛ akaye le apami 200 wakaleke nɛmba waki kotshɔ kaamɛ la Davidɛ ndo wakatshikala l’ɔkɔngɔ suke l’Okidi w’ashi wa Bɛsɔrɛ,+ ko vɔ wakatombe dia ndjohomana la Davidɛ nde l’anto waki kaamɛ la nde. Lam’akakome Davidɛ suke l’apami akɔ, nde akawambola kana wekɔ ki.
22 Koko pami tshɛ ka kɔlɔ ndo k’anyanya kaki l’atei wa wanɛ wakatshu kaamɛ la Davidɛ akate ate: “Lam’ele vɔ hawotshwe kaamɛ la so, hatotowasha kaanga ɛngɔ 1 oma lo diangɔ dia dimbo diambotototshungola. Onto l’onto ayɔsa paka wadɛnde l’anande, ko nde ntshɔ.”
23 Koko Davidɛ akate ate: “Analengo, tanyosalake ngasɔ la kɛnɛ kambotosha Jehowa. Nde akatokokɛ ndo akakimɔ olui wa dengalenga wakaye ndjotɔlɔsha lo anya aso.+
24 Onto akɔna ayetawɔ kanyi yanyu shɔ? Wanɛ wakatshu lo ta wayolongola woho akɔ waamɛ wayolongola wanɛ wakatshikala dia namaka etshumu.+ Anto tshɛ wayokahana+ popo.”
25 Oma ko lushi lɔsɔ, nde aketɛ dui sɔ oko didjango ndo oko ɔlɛmbɛ le ase Isariyɛlɛ polo ndo ɛlɔ.
26 Lam’akakalola Davidɛ la Zikilangɛ, nde akatomɛ dikumanyi dia la Juda diaki angɛnyi ande diangɔ dimɔtshi dia dimbo, ata ate: “Ɔnɛ ekɔ woshasha* anyu w’oma lo diangɔ dia dimbo di’atunyi wa Jehowa.”
27 Nde akatome woshasha akɔ le wanɛ waki la Bɛtɛlɛ,+ le wanɛ waki la Ramɔta wa la Nɛngɛbɛ,* le wanɛ waki la Jatira,+
28 le wanɛ waki la Aroɛrɛ, le wanɛ waki la Sifimɔtɛ, le wanɛ waki la Eshitɛmɔa,+
29 le wanɛ waki la Rakala, le wanɛ waki lo esomba w’ase Jerahemɛlɛ,+ le wanɛ waki lo esomba w’ase Kenɛ,+
30 le wanɛ waki la Horima,+ le wanɛ waki la Borashana, le wanɛ waki la Ataka,
31 le wanɛ waki la Hɛbɛrɔna+ ndo l’ahole tshɛ wakatshɔka Davidɛ nde l’anto ande.
Nɔtɛ ka l'ɛse ka dikatshi
^ Kana “Nɛngɛbɛ.”
^ Kana “dikambo anima w’anto tshɛ.”
^ Enda Elembetshielo.
^ Tshɛk., “lomu lande lakakalola le nde.”
^ Kana “Nɛngɛbɛ.”
^ Kana “Nɛngɛbɛ.”
^ Tshɛk., “ɔtshɔkɔ.”
^ Kana “lo sidɛ.”
