1 Samuɛlɛ 4:1-22
4 Ko dui dia Samuɛlɛ diakahandjɔnɛ lo Isariyɛlɛ w’otondo.
Oma laasɔ, ase Isariyɛlɛ wakatshu dia tɔlɔ l’ase Filistiya. Vɔ wakake mpango kawɔ suke la Ebɛnɛzɛrɛ ndo ase Filistiya wakake mpango kawɔ la Afɛkɛ.
2 Ase Filistiya wakalɔngama dia ndɔsha ase Isariyɛlɛ, koko ta diakɔ diaki wolo le ase Isariyɛlɛ ko ase Filistiya wakaalɛndja ndo wakadiake apami oko nunu nɛi (4000) wakalɔka la wɔ l’oswe.
3 Lam’akakalola anto lo mpango, dikumanyi dia lo Isariyɛlɛ wakate vate: “Lande na kambetawɔ Jehowa dia ase Filistiya+ tɔlɛndja* ɛlɔ? Nyɛsɔ totɔshi ɔshɛtɛ wa sheke wa Jehowa oma la Shilo,+ kele wayonge kaamɛ la so ndo wayotoshimbe oma l’anya w’atunyi aso.”
4 Ɔnkɔnɛ vɔ wakatome apami otsha la Shilo, ko wakatɛmba ɔshɛtɛ wa sheke wa Jehowa kanga lolembelembe, ɔnɛ lodjashi lo kiti ka lowandji laadiko* dia akɛruba.+ Ana 2 waki Eli, Hɔfɛni nde la Finehasi+ waki laawɔ kaamɛ la ɔshɛtɛ wa sheke wa Nzambi ka mɛtɛ.
5 Kam’akakome ɔshɛtɛ wa sheke wa Jehowa lo mpango, ase Isariyɛlɛ tshɛ wakade ekoko wa wolo, ko nkɛtɛ yakadidima.
6 Lam’akoke ase Filistiya londjo la ekoko akɔ, vɔ wakate vate: “Lande na kadama ekoko wa wolo ngasɔ lo mpango k’ase Hɛbɛru?” L’edjedja ka wonya, vɔ wakayeyaka dia Ɔshɛtɛ wa Jehowa wamboya lo mpango.
7 Ko ase Filistiya wakandama la wɔma, nɛ dia vɔ wakate vate: “Nzambi amboya lo mpango+ kawɔ!” Ɔnkɔnɛ vɔ wakate vate: “Diaso diamboshila, nɛ dia dikambo sɔ diatasalemaka!
8 Diaso diamboshila! Akɔna ayotoshimbɛ oma lo anya wa Nzambi ka diambo kɛnɛ? Nde kele Nzambi kakalanya Edjibito la weho tshɛ w’ediakelo l’oswe wa shɛnga.+
9 Ase Filistiya le, nyonge la dihonga ndo nyosale akambo oko apami, diaha nyu ndjokambɛ ase Hɛbɛru oko wakawanyokambɛ.+ Nyosale akambo oko apami ndo nyɔlɔsha!”
10 Ɔnkɔnɛ ase Filistiya wakalɔsha, ko ase Isariyɛlɛ wakalɛndjama+ ndo onto l’onto akalawɔ otsha lo luudu lande la dipɛma. Vɔ wakadiakema efula ka mamba, asɔlayi w’ase Isariyɛlɛ wakɛndakɛnda l’ekolo nunu akumi asato (30000) wakadiakema.
11 Ndo nto, Ɔshɛtɛ wa Nzambi wakɔsama ndo ana 2 waki Eli, Hɔfɛni nde la Finehasi wakavu.+
12 Pami kɛmɔtshi k’oseka Bɛnjamina akalawɔ oma lɛnɛ akalɔmaka ta, ko akakome la Shilo lushi lɔsɔ l’ahɔndɔ wambatɛ ndo akatɛ ditshu l’ɔtɛ.+
13 Lam’akakome pami kakɔ, Eli akadjasɛ lo nkɔsa l’omamu w’otadimbo alengɛ, nɛ dia otema ande wakadidimaka l’ɔtɛ w’Ɔshɛtɛ wa Nzambi+ ka mɛtɛ. Pami kakɔ akɔtɔ l’osomba dia tewoya losango lakɔ, ko osomba w’otondo wakatatɛ ndela.
14 Lam’akoke Eli londjo la alelo, nde akambola ate: “Lofunguso lakɔna lɔsɔ?” Pami kakɔ kaamɛ akaye la lowango, ko akayotɛ Eli losango lakɔ.
15 (L’etena kɛsɔ, Eli aki la ɛnɔnyi 98 ndo washo ande waki engole, ko nde kokoka mɛna nto.)+
16 Oma laasɔ, pami kakɔ akatɛ Eli ate: “Dimi koye oma lɛnɛ alɔma ta! Ɛlɔ mbakamalawe oma lɛnɛ alɔma ta.” Ko nde akambola ate: “Ambotomba na, ɔnami?”
17 Ko ɔnɛ lakaye la losango akakɔndɔla ate: “Ase Isariyɛlɛ wambolawɔ ase Filistiya ndo anto+ aso wambɔlɛndjama lo yɛdikɔ y’efula. Ndo nto, anayɛ 2, Hɔfɛni nde la Finehasi wakavwe+ ndo Ɔshɛtɛ wa Nzambi ka mɛtɛ wakɔsami.”+
18 Kam’akandadimola Ɔshɛtɛ wa Nzambi ka mɛtɛ, Eli akakɔ ekalekale oma lo nkɔsa kande la soko, ko nkingo kande kakɔkɔ ndo nde akavu, nɛ dia nde aki osombe ndo demba diakayala wotsho. Nde aki shushi lo Isariyɛlɛ l’edja k’ɛnɔnyi 40.
19 Okilo ande wa womoto, mbuta ate wadi aki Finehasi aki la diemi ndo aki suke la mbota. Kam’akandoke dia Ɔshɛtɛ wa Nzambi ka mɛtɛ wambɔsama ndo ɔnɛ okilo ande la omɛnde wambovɔ, nde akakunyama ndo mbala kakɔ ɔtɔi, nde akandama la lɔɔnɔ, ko akote.
20 Lam’akandonaka lomu, wamato waki suke la nde wakate vate: “Tokake wɔma, nɛ dia wɛ ambota ɔna pami.” Koko nde kokadimola ndo kombidja yimba lo dui sɔ.*
21 Nde akɔlɛ ɔnakɔ Ikabɔda,*+ ata ate: “Lotombo lambomɔ oma lo Isariyɛlɛ ko lambotshɔ lo lɔhɔmbɔ,”+ atɛkɛta dia woho wakɔsama Ɔshɛtɛ wa Nzambi ka mɛtɛ ndo kɛnɛ kakakomɛ okilo ande wa pami la omɛnde.+
22 Nde akate ate: “Lotombo lambomɔ oma lo Isariyɛlɛ ko lambotshɔ lo lɔhɔmbɔ, nɛ dia Ɔshɛtɛ wa Nzambi ka mɛtɛ wambɔsama.”+
Nɔtɛ ka l'ɛse ka dikatshi
^ Tshɛk., “Lande na kambotɔlɛndja Jehowa?”
^ Kana ondo “lam’asa.”
^ Kana “kombidja otema ande lɔkɔ.”
^ Kitshimudi ate: “Lende ele lotombo?”
