1 Samuɛlɛ 6:1-21
-
Ase Filistiya wambokaloya Ɔshɛtɛ le ase Isariyɛlɛ (1-21)
6 Ɔshɛtɛ+ wa Jehowa wakatshikala l’ɛtshi ka nkɛtɛ k’ase Filistiya l’edja ka ngɔndɔ 7.
2 Ase Filistiya wakelɛ ɛlɔmbɛdi la wanɛ wasala diendja,+ ko wakawambola vate: “Ahombaso nsala la Ɔshɛtɛ wa Jehowa? Nyotote woho wahombaso mbokaloya lo dihole diawɔ.”
3 Vɔ wakakadimola vate: “Naka nyate tokaloya ɔshɛtɛ wa sheke wa Jehowa Nzambi k’Isariyɛlɛ, tanyookaloyake aha la nyu ntoma olambo. Lo weho akɔ tshɛ nyu pombaka mbotomɛ ndo olambo w’onongo.+ Paka lo nsala ngasɔ mbayonyɔkɔnɔ ndo mbayonyeya lande na kele lonya lande halomɔ oma le nyu.”
4 Ko vɔ wakambola vate: “Olambo w’onongo wa ngande wahombaso mbotomɛ?” Vɔ wakate vate: “Lo ndjela lofulo la nkumi ya la Filistiya,+ nyotome kasadi 5 ya paonyi ndo dji 5 dia paonyi, nɛ dia sui diakɔ diamɛ diambosoya onto tshɛ l’atei anyu ndo nkumi yanyu.
5 Kanyosale difanelo dia kasadi yanyu ndo difanelo dia dji+ dianyu dialanya wodja ndo nyu pombaka mbisha Nzambi k’Isariyɛlɛ kɛnɛmɔ. Ondo nde ayokitshakitsha wotsho wa lonya lande le nyu, le nzambi kanyu ndo le wodja+ anyu.
6 Lande na katonyokeketsha etema oko ase Edjibito la Farawɔ wanɛ wakakeketsha etema awɔ?+ Lam’akandaasoya+ wolo, vɔ wakakimɔ ase Isariyɛlɛ, ko vɔ wakatshu.+
7 Ɔnkɔnɛ, nyɔlɔngɔsɔlɛ pusupusu k’oyoyo la wale 2 wa ngɔmbɛ wewɔ watahɛka osembe ndooko lushi. Oma laasɔ ko nyu nkeleka ngɔmbɛ yakɔ lo pusupusu, ko nyu mbɔsa anayɔ ndo mbakaloya la ngelo, mangana la yɔ.
8 Kanyɔshi Ɔshɛtɛ wa Jehowa, ko nyu mbahɛ lo pusupusu ndo kanyodje diangɔ dia paonyi dialanganyu mbotomɛ oko olambo w’onongo lo ɔshɛtɛ okina suke la wɔ.+ Oma laasɔ ko nyu mbotoma
9 ndo kanyendake: Naka vɔ wambotshɔ l’otadimbo w’otsha la Bɛtɛ-Shɛmɛshɛ+ lo ɛtshi kawɔ ka nkɛtɛ, kete nde kambotosalɛ kɔlɔ k’efula kɛnɛ. Ko naka bu, kete tayeya dia aha lonya lande mbotɔkɔmɔdi, koko amboyohomana lohomana.”
10 Ko vɔ wakasale ngasɔ. Vɔ wakɔshi wale 2 wa ngɔmbɛ ndo wakayikeleka lo pusupusu, ko vɔ wakadihe anayɔ lo luudu.
11 Oma laasɔ, vɔ wakahɛ Ɔshɛtɛ wa Jehowa lo pusupusu kaamɛ ndo ɔshɛtɛ okina waki la dji dia paonyi ndo difanelo dia kasadi yawɔ.
12 Ko ngɔmbɛ yakɔ yakasembɔ tɔɔ l’otadimbo w’otsha la Bɛtɛ-Shɛmɛshɛ.+ Yɔ yakatatshɔka paka lo mboka ka woke, yatawana ndo yɔ kɔmbɛtɔla lo lonya l’omi kana la lɔmɔsɔ. Etena kɛsɔ tshɛ, nkumi ya la Filistiya yakayayaka l’ɔkɔngɔ ayɔ polo l’olelo wa Bɛtɛ-Shɛmɛshɛ.
13 Ase Bɛtɛ-Shɛmɛshɛ wakanaka eponga lo okidi w’ebamubamu. Lam’akawonyiya washo ndo lam’akawɛnyi Ɔshɛtɛ, vɔ wakangɛnangɛna efula lam’akawawɛnyi.
14 Pusupusu kakɔ kakayokoma lo ekambɔ ka Jashua ose Bɛtɛ-Shɛmɛshɛ ko kakayemala laawɔ, suke la dive dia woke. Ɔnkɔnɛ, vɔ wakaate abaya wa lo pusupusu ndo wakalambola ngɔmbɛ+ yakɔ oko olambo wa lotshumba le Jehowa.
15 Ase Lɛwi+ wakaholoya Ɔshɛtɛ wa Jehowa ndo ɔshɛtɛ okina waki kaamɛ la wɔ waki la diangɔ dia paonyi, ko wakakitsha laadiko dia dive dia woke. Ase Bɛtɛ-Shɛmɛshɛ+ wakalambola Jehowa elambo wa lotshumba ndo weshasha lushi lɔsɔ.
16 Lam’akɛnyi nkumi 5 y’ase Filistiya ngasɔ, vɔ wakakalola otsha la Ɛkɛrɔna ko lushi lakɔ.
17 Kasadi ya paonyi yakatomɛ ase Filistiya Jehowa+ oko olambo w’onongo yɔ nyɛ: 1 dikambo dia Ashidɔdɛ,+ 1 dikambo dia Ngaza, 1 dikambo dia Ashikɛlɔna, 1 dikambo dia Ngata+ ndo 1 dikambo dia Ɛkɛrɔna.+
18 Lofulo la dji dia paonyi lakɛdima la lofulo l’esomba tshɛ w’ase Filistiya waki nkumi yakɔ 5, oyadi esomba waki la mpele kana ngelo yaki kodingama la mpele.
Dive dia woke diakawatokokitsha Ɔshɛtɛ wa Jehowa lɔkɔ diekɔ ɔmɛnyi lo ekambɔ ka Jashua ose Bɛtɛ-Shɛmɛshɛ polo ndo ɛlɔ.
19 Koko Nzambi akadiake ase Bɛtɛ-Shɛmɛshɛ, nɛ dia vɔ wakende Ɔshɛtɛ wa Jehowa. Nde akadiake anto nunu akumi atanu l’akumi esambele (50 070),* ko anto wakatatɛ ndela dikambo Jehowa akaadiake lo yɛdikɔ y’efula.+
20 Ko ase Bɛtɛ-Shɛmɛshɛ wakambola vate: “Akɔna ayokoka memala la ntondo ka Jehowa Nzambi+ k’ekila kɛnɛ, ndo le na ayondotshɔ oma laleso+ lanɛ?”
21 Ɔnkɔnɛ, vɔ wakatomɛ ase Kiriatɛ-Jarima+ akɛndji dia towatɛ ɔnɛ: “Ase Filistiya wambokaloya Ɔshɛtɛ wa Jehowa. Nyoye nyoyowɔshi kele nyotshu la wɔ.”+
Nɔtɛ ka l'ɛse ka dikatshi
^ Tshɛk., “apami 70, apami 50 000.”
