1 Samuɛlɛ 7:1-17
7 Ko ase Kiriatɛ-Jarima wakaye, wakayɔsa Ɔshɛtɛ wa Jehowa otsha lo luudu la Abinadaba+ laki lo kionakona ndo wakakidia ɔnande Eleazara dia namaka Ɔshɛtɛ wa Jehowa.
2 Etena k’otale kakete, ɛnɔnyi 20 ntatɛ oma ko lushi lakawela Ɔshɛtɛ la Kiriatɛ-Jarima, ko nkumbo k’otondo k’Isariyɛlɛ wakatatɛ nyanga* Jehowa.+
3 Ko Samuɛlɛ akatɛ nkumbo k’otondo k’Isariyɛlɛ ate: “Naka nyambokalolɛ Jehowa l’otema+ anyu tshɛ, kete nyokasha tozambizambi+ t’ase wedja ekina ndo dikishi+ dia Ashitɔrɛtɛ diele l’atei anyu, kele nyɛdiya etema anyu tshɛ otsha le Jehowa ndo nyookambe ndamɛ oto,+ ko nde ayonyotshungola oma lo anya w’ase Filistiya.”+
4 Ko ase Isariyɛlɛ wakanya waa Baala la dikishi dia Ashitɔrɛtɛ ndo wakakambɛ paka Jehowa.+
5 Oma laasɔ, Samuɛlɛ akate ate: “Nyotshumanya ase Isariyɛlɛ tshɛ la Mizipa,+ ko dimi layɔlɔmba Jehowa lo wahɔ anyu.”+
6 Ɔnkɔnɛ, vɔ wakatshumana la Mizipa ndo vɔ wakatahola ashi ko wakawatshola la ntondo ka Jehowa ndo wakakile mbo ya ndɛ lushi lɔsɔ.+ Vɔ wakate vate: “Sho tambosalɛ Jehowa+ pɛkato.” Ko Samuɛlɛ akatatɛ nkamba oko shushi+ y’ase Isariyɛlɛ la Mizipa.
7 Lam’akoke ase Filistiya dia ase Isariyɛlɛ wambotshumana la Mizipa, nkumi y’ase Filistiya+ wakatshu dia tɔlɔsha ase Isariyɛlɛ. Lam’akoke ase Isariyɛlɛ dui sɔ, vɔ wakoke ase Filistiya wɔma.
8 Ko ase Isariyɛlɛ wakatɛ Samuɛlɛ vate: “Tohekɔke nɔmba Jehowa Nzambi kaso dia nde tokimanyiya+ ndo dia nde toshimbɛ oma lo anya w’ase Filistiya.”
9 Oma laasɔ, Samuɛlɛ akɔshi ɔsɔngɔ w’ɔkɔkɔ waakalɔmɛ, ko akoolambola Jehowa oko olambo w’otondo wa lotshumba+ ndo Samuɛlɛ akalɔmbɛ Jehowa dia nde nkimanyiya ase Isariyɛlɛ, ko Jehowa akookadimola.+
10 Etena kakalambolaka Samuɛlɛ olambo wa lotshumba, ase Filistiya wakasukana dia ndɔsha ase Isariyɛlɛ. Ko Jehowa akasale dia dikungola dia wolo+ kungolɛ ase Filistiya lushi lɔsɔ ndo nde akawadje l’ofukutanu,+ ko vɔ wakalɛndjama la ntondo k’ase Isariyɛlɛ.+
11 Ko apami w’ase Isariyɛlɛ wakatombe oma la Mizipa ndo wakatshanya ase Filistiya, wakaadiake polo lo sidɛ ka Bɛtɛ-Kara.
12 Ko Samuɛlɛ akɔshi dive,+ akadiemɛ lam’asa Mizipa la Jeshana ndo akadiɔlɛ ɔnɛ Ebɛnɛzɛrɛ,* nɛ dia nde akate ate: “Polo ndo wonya ɔnɛ Jehowa ambotokimanyiya.”+
13 Ase Filistiya wakalɛndjama ndo vɔ koondja nto l’ɛtshi ka nkɛtɛ k’ase Isariyɛlɛ.+ Lonya la Jehowa lakatetemala ndɔsha ase Filistiya lo nshi tshɛ ya Samuɛlɛ.+
14 Ndo nto, esomba wakɔshi ase Filistiya oma le ase Isariyɛlɛ wakakaloyama le ase Isariyɛlɛ, oma la Ɛkɛrɔna polo la Ngata, ko ase Isariyɛlɛ wakɔshi ɛtshi kawɔ ka nkɛtɛ oma lo anya w’ase Filistiya.
Ndo nto, wɔladi wakikɔ lam’asa ase Isariyɛlɛ l’ase Amɔra.+
15 Samuɛlɛ akatetemala monga shushi lo Isariyɛlɛ l’edja tshɛ ka lɔsɛnɔ lande.+
16 Ɔnɔnyi tshɛ, nde akandaka lɔkɛndɔ lo ntshimba oma la Bɛtɛlɛ,+ Ngilingalɛ+ ndo Mizipa,+ ndo nde akalomboshaka Isariyɛlɛ lo ahole asɔ tshɛ.
17 Koko nde akakalolaka la Rama,+ nɛ dia luudu lande laki lɛkɔ ndo lɛkɔ kakandalomboshaka ase Isariyɛlɛ. Nde akasalɛ Jehowa+ elambwelo lɛkɔ.
