1 Tɛsalɔnika 1:1-10
1 Dimi Pɔɔlɔ lekɔ kaamɛ la Silvano*+ nde la Timɔte,+ ndo lambofundɛ etshumanelo ka la Tɛsalɔnika kele kaamɛ la Nzambi Shɛso ndo Nkumadiɔndjɔ Yeso Kristo nte:
Ɔlɔlɔ waheyama mbɛdika ndo wɔladi wa Nzambi wayale la nyu!
2 Sho mbishaka Nzambi losaka nshi tshɛ lam’atotonyodimolaka nyu tshɛ lo alɔmbɛlɔ aso,+
3 nɛ dia sho tetemalaka mbohɔ olimu anyu wa la kɔlamelo, lotumu la wolo lakambanyu la ngandji tshɛ ndo ekikelo kanyu koye oma lo elongamelo+ kele la nyu le Nkumɛso Yeso Kristo lo washo wa Nzambi Shɛso.
4 Nyu analengo walangema oma le Nzambi, sho mbeyaka dia nde akanyɔsɔnɛ,
5 dikambo nyu konongola lokumu l’ɔlɔlɔ lasambishaso la ɛtɛkɛta eto, koko nyakalilongola ndo la wolo, ndo la nyuma k’ekila, ndo la eshikikelo ka wolo, oko weyanyu weho akɔna w’anto wakatayala l’atei anyu lo wahɔ anyu.
6 Ndo nyu nyakatokoya+ ndo nyakokoya Nkumadiɔndjɔ+ lam’ele nyaketawɔ ɔtɛkɛta l’atei w’asui+ efula l’ɔngɛnɔngɛnɔ w’oma le nyuma k’ekila,
7 dia nyu monga ɛnyɛlɔ le ambetawudi tshɛ wa la Makɛdɔniya ndo wa la Akaya.
8 Kɛnɛ kele mɛtɛ ele, aha tsho ɔtɛkɛta wa Jehowa* wakatombe oma le nyu wakokɛma la Makɛdɔniya ndo la Akaya, koko mbetawɔ kanyu le Nzambi kambodiangana lo ahole tshɛ+ woho wele taya bu l’ohomba wa nkotsha ndooko dui.
9 Nɛ dia vɔamɛ wekɔ lo ntetemala nsanya woho wakatahomana la nyu mbala ka ntondo, woho wakanyetawɔ Nzambi ndo woho wakanyoke dikishi+ dianyu ɔkɔngɔ dia kambɛ Nzambi kasɛna ndo ka mɛtɛ
10 ndo dia mendɛ le Ɔnande oma l’olongo+ lakandolola oma lo nyɔi, mbuta ate Yeso latotshungola oma lo nkɛlɛ kayaye.+
