1 Tɛsalɔnika 2:1-20
2 Analengo le, lo mɛtɛ nyuamɛ mbeyaka dia wembwelo wakatanyembola komonga anyanya.+
2 Nɛ dia oko wadieyanyu, kaanga mbakatasoyama ntondo ndo mbakawatosalɛ akambo la lɔsɛndji tshɛ la Filipɛ,+ takakondja dihonga oma le Nzambi kaso dia nyewoya lokumu l’ɔlɔlɔ laki Nzambi+ l’atei w’ɔlɔshamelo wa wolo.*
3 Nɛ dia alako wanyoshaso hawoye oma lo munga kana oma l’akambo wa mindo kana oma lo lokeso,
4 koko oko wakatetawɔma le Nzambi dia nde tosha ɔkɛndɛ wa nsambisha lokumu l’ɔlɔlɔ mbatɛkɛtaso, aha dia ngɛnyangɛnya anto, koko Nzambi lasɛdingola etema aso.+
5 Lo mɛtɛ, nyu mbeyaka dia sho kokamba la ɛtɛkɛta wa nyɔtɛtɛmɔla kana nyokesa dia mbishɛ eyango wa lokaki;+ ndo Nzambi ekɔ ɔmɛnyi lo dikambo sɔ!
6 Kana sho konyanga lotombo l’oma le anto, oyadi l’oma le nyu kana l’oma le anto akina, kaanga mbakanyakoke mɛmba wotsho w’efula wa nkotsha ehomba aso oko weso apɔstɔlɔ wa Kristo.+
7 Koko, takayala anto w’ɛlɔlɔ l’atei anyu oko waale wa womoto wakokɛ la ngandji tshɛ anande wa pɛtɛ pɛtɛ.
8 Ɔnkɔnɛ, oma lo ngandji k’efula kanyokaso, takayashikikɛ* aha tsho dia nyewoya lokumu l’ɔlɔlɔ laki Nzambi, koko ndo dia nkimɔ etondo aso,*+ nɛ dia nyakakome mɛtɛ anangemi aso.+
9 Analengo le, lo mɛtɛ, nyu mbohɔka olimu aso wa wolo ndo woho wakatadiɛnɛ. Takakambaka otsho la yanyi diaha sho monga wotsho wamboleka le nyu+ etena kakatanyosambishaka lokumu l’ɔlɔlɔ laki Nzambi.
10 Nyu nyekɔ ɛmɛnyi ndo Nzambi ekɔ ɔmɛnyi lo woho wakiso la kɔlamelo, la losembwe ndo aha l’onongo otsha le nyu, nyu ambetawudi.
11 Nyu mbeyaka dimɛna dia takatetemala nyolaka ndo nyosamba ndo nsambisha ɔmɔmɔ la l’atei anyu+ oko watosalɛka ombutshi wa pami+ anande,
12 dia nyu ntetemala nkɛndakɛnda lo yoho yetawɔ Nzambi+ lanyelɛ lo Diolelo diande+ ndo lo lotombo lande.+
13 Diakɔ mɛtɛ diatetemalaso+ mbisha Nzambi losaka, nɛ dia lam’akanyalongola ɔtɛkɛta wa Nzambi wakanyoke oma le so, nyu nyakawetawɔ aha oko ɔtɛkɛta w’anto, koko oko wewɔ mɛtɛ, oko ɔtɛkɛta wa Nzambi wele la shɛngiya ya wolo le nyu, nyu ambetawudi.
14 Nɛ dia analengo, nyu nyakokoya tshumanelo dia Nzambi diele kaamɛ la Kristo Yeso diele la Judeya, nɛ dia nyu lawɔ nyambosoyama oma le ase wodja anyu hita+ woho akɔ waamɛ w’asui wasoyama anangɛso wa la Judeya oma le ase Juda,
15 wanɛ wakakome polo ndo lo ndjaka Nkumadiɔndjɔ Yeso+ ndo amvutshi ndo vɔ mbakatosoya.+ Ndo nto, vɔ hawɔngɛnyangɛnya Nzambi, koko wekɔ lo ndɔshana la wahɔ w’anto tshɛ,
16 lo nyanga dia toshimba dia sho nsambisha ase wedja dia vɔ shimbamɛ.+ Lo yoho shɔ, nshi tshɛ vɔ wekɔ lo ndodia yɛdikɔ ya pɛkato yawɔ. Koko l’ekomelo nkɛlɛ kande kamboya le wɔ.+
17 Koko analengo le, lam’akatangana* la nyu lo etena ka tshitshɛ, (lo alemba koko aha lo etema), l’ɔtɛ wa nsaki k’efula kaki la so, sho takadje welo woleki tshɛ dia nyɛna.*
18 L’ɔtɛ wa dikambo sɔ, takalange ndja le nyu, eelo, dimi Pɔɔlɔ lakasale la wolo, aha mbala 1 keto koko mbala 2; koko Satana akatodihɛ mboka.
19 Nɛ dia ele elongamelo kaso kana ɔngɛnɔngɛnɔ aso kana dɛmbɔ diaso dia nkoso diayafunaso la ntondo ka Nkumɛso Yeso lo woongelo ande? Shi mɛtɛ nyu?+
20 Nyu mɛtɛ mbele lotombo laso ndo ɔngɛnɔngɛnɔ aso.
Nɔtɛ ka l'ɛse ka dikatshi
^ Kana ondo “l’atei w’ɔlɔshɛlɔ w’efula.”
^ Tshɛk., “takangɛnangɛna.”
^ Kana “anima aso.”
^ Kana “lam’akatakakitɔna.”
^ Tshɛk., “dia mɛna elungi kanyu.”
