1 Tɛsalɔnika 3:1-13
3 Ɔnkɔnɛ, lam’ele sho kokoka mbikikɛ okakitɔnelo ɔsɔ wa la nyu, takɛnyi dimɛna ntshikala la Atɛna,+
2 ndo takatome Timɔte+ lele ɔnangɛso ndo okambi waki Nzambi* lo lokumu l’ɔlɔlɔ lendana la Kristo dia nde ndjonyokeketsha ndo ndjonyosamba lo kɛnɛ kendana la mbetawɔ kanyu,
3 diaha ɔmɔtshi la l’atei anyu ndjɛkayɛka l’ɔtɛ w’asui asɔ. Dikambo nyuamɛ mbeyaka dia hatokoke mbewɔ asui wa ngasɔ.*+
4 Nɛ dia etena kakiso kaamɛ la nyu, takanyotɛka la ntondo dia tayohomana l’asui ndo kɛsɔ mbakasalema, oko wadieyanyu.+
5 Diakɔ diele, etena kakimi kokoka nyomokikɛ nto, lakootome dia ndjeya kana nyekɔ la kɔlamelo,+ nɛ dia ondo lo yoho mɔtshi, ondo Ohembanyi+ akanyohembe ko olimu wa wolo wakatakambe wambɔtɔ l’ashi.
6 Koko, Timɔte eke kakoma lanɛ oma le nyu+ ndo nde akatela nsango y’ɛlɔlɔ yendana la kɔlamelo yanyu ndo ngandji kanyu dia nyekɔ lo ntetemala tohɔ la ngandji tshɛ ndo nyekɔ lo nomɔlomɔ dia tɛɛna woho walomɔlomɔso ndo sho lawɔ dia nyɛna.
7 Diakɔ diele, analengo le, nyu nyambotokeketsha lo asui* aso tshɛ ndo lo ɛhɛnyɔhɛnyɔ aso tshɛ l’ɔtɛ wa kɔlamelo yele la nyu.+
8 Nɛ dia sho tambokeketshama* naka nyekɔ nge lo Nkumadiɔndjɔ.
9 Nɛ dia ngande wakokaso mbisha Nzambi losaka lo dikambo dianyu l’ɔtɛ w’ɔngɛnɔngɛnɔ w’efula wele la so la ntondo ka Nzambi kaso lo dikambo dianyu?
10 Sho tatɔsɛngasɛngaka Nzambi l’otema ɔtɔi otsho la yanyi dia sho nyɛna* ndo dia sho nyokotshɛ kɛnɛ kahombama lo mbetawɔ kanyu.+
11 Nzambi Shɛso ndamɛ ndo Nkumɛso Yeso watodihole mboka ka sho ndja le nyu.
12 Ndo nto, Nkumadiɔndjɔ anyokimanyiya dia nyu mpama, ɛɛ, dia nyu ndola la ngandji k’onto la ɔnango+ ndo k’anto tshɛ kele oko kanyokaso,
13 dia nde nsala di’etema anyu monga nge, aha l’onongo lo akambo w’ekila la ntondo ka Nzambi+ Shɛso lo woongelo wa Nkumɛso Yeso+ kaamɛ la ekilami ande tshɛ.
Nɔtɛ ka l'ɛse ka dikatshi
^ Kana ondo “ndo onto lakamba kaamɛ la Nzambi.”
^ Kana “takasɔnama dia dikambo sɔ.”
^ Tshɛk., “ehomba.”
^ Tshɛk., “tekɔ lo nsɛna.”
^ Tshɛk., “mɛna dungi dianyu.”
