1 Tɛsalɔnika 4:1-18
4 Dia nkomiya, analengo le, oko wakanyalongola alako oma le so wendana la woho wahombanyu nkɛndakɛnda dia ngɛnyangɛnya Nzambi,+ oko wakɛndakɛndanyu mɛtɛ tambonyɔlɔmba ndo tambonyɔsɛngasɛnga lo lokombo la Nkumadiɔndjɔ Yeso dia nyu ntetemala nsala dikambo sɔ.
2 Nɛ dia nyu mbeyaka wetshelo* wakatanyosha lo lokombo la Nkumadiɔndjɔ Yeso.
3 Nɛ dia lolango la Nzambi ele dia nyu monga ekila+ ndo ntona awui wa mindo wa dieyanelo.*+
4 Onto l’onto l’atei anyu pombaka mbeya woho wa mbahemɛ demba +diande hita dia diɔ monga ekila+ ndo la kɛnɛmɔ,
5 aha la lokaki, nsɔngu ka dieyanelo kambotamba elelo+ oko ase wedja waheye Nzambi.+
6 Ndooko onto lahomba ntamba elelo wahombama ndo salɛ ɔnango kɔlɔ lo dikambo sɔ, nɛ dia Jehowa* ayosha wanɛ wasala akambo asɔ tshɛ dilanya oko wakatanyotɛ ntondo ndo wakatanyewola la wolo tshɛ.
7 Nɛ dia Nzambi akatelɛ, aha lo akambo wa mindo, koko lo akambo wele ekila.+
8 Ɔnkɔnɛ, onto lɔnyɔla dikambo sɔ, aha onto kɔnyɔlande, koko Nzambi+ lakanyosha nyuma kande k’ekila.+
9 Koko lo kɛnɛ kendana la ngandji k’onto la ɔnango,+ bu ohomba sho nyofundɛ, nɛ dia nyuamɛ nyekɔ lo mbetshama oma le Nzambi dia mbokana ngandji lam’asanyu.+
10 Lo mɛtɛ, ngasɔ mbasalɛnyu anangɛso tshɛ wa la Makɛdɔniya w’otondo. Koko anangɛso le, tambonyokeketsha dia nyu ntetemala nsala ngasɔ lo yɛdikɔ y’efula.
11 Nyoyadje oyango wa nsɛna lo wɔladi+ ndo ndjasha lo akambo anyu hita+ ndo nkamba la anya anyu+ oko wakatanyetsha,
12 dia nyu nkɛndakɛnda dimɛna lo washo w’anto wa l’andja,+ aha la mpomba ndooko ɛngɔ.
13 Laadiko dia laasɔ, analengo le, sho nangaka nyu mbeya kɛnɛ kele mɛtɛ lo dikambo dia wanɛ woladi djɔ lo nyɔi,+ diaha nyu monga la lonyangu oko anto akina wele bu la elongamelo.+
14 Nɛ dia naka sho mbetawɔka dia Yeso akavu ndo akolɔ,+ kete Nzambi ayolola kaamɛ la nde wanɛ woladi djɔ lo nyɔi lo tshimbo ya Yeso.+
15 Nɛ dia tekɔ lo nyotɛ lo ndjela ɔtɛkɛta wa Jehowa* shate: Lo weho akɔ tshɛ, sho wanɛ wasɛna wayonga la lɔsɛnɔ polo lo woongelo wa Nkumadiɔndjɔ hatoteta ntondo ka wanɛ woladi djɔ lo nyɔi,
16 nɛ dia Nkumadiɔndjɔ ndamɛ ayoholɔ oma l’olongo ndo ayoda ombeka wa didjango, la dui dia arkandjelo+ ndo la dimama dia Nzambi, ko wanɛ wakavu wele la diɔtɔnganelo la Kristo wayolɔ ntondo.+
17 Oma laasɔ, sho wanɛ wasɛna wayonga la lɔsɛnɔ l’etena kɛsɔ, tayɔsama kaamɛ la wɔ lo wange+ dia tohomana la Nkumadiɔndjɔ+ lo loowa, ko tayongaka nshi tshɛ sho la Nkumadiɔndjɔ.+
18 Ɔnkɔnɛ, nyotetemale sambana lam’asanyu la ɛtɛkɛta ɛsɔ.
