1 Joani 2:1-29
2 Anami wa tshitshɛ, dimi lambonyofundɛ akambo anɛ diaha nyu nsala pɛkato. Ko naka onto ɔmɔtshi ambosala pɛkato, tekɔ la okimanyedi* wele kaamɛ la Shɛso, Yeso Kristo,+ onto ɔlɔlɔ.+
2 Ndo nde ekɔ olambo+ w’ekombelo ka pɛkato* yaso, aha pɛkato+ yaso tsho, koko ndo y’andja w’otondo.+
3 Naka sho ntetemala nkitanyiya ɛlɛmbɛ ande, dui sɔ diayɛnya hwe dia sho mbeeyaka.
4 Ɔnɛ lata ate: “Dimi lamboweya,” ko hakitanyiya ɛlɛmbɛ ande, ekɔ kanga kashi ndo mɛtɛ keema le onto ɔsɔ.
5 Koko onto tshɛ lakitanyiya ɔtɛkɛta ande, ngandji kokande Nzambi lo otema ande kambokoma mɛtɛ kokele.+ Oma lo dikambo sɔ mbeyaso dia tekɔ kaamɛ la nde.+
6 Ɔnɛ lata dia nde ekɔ lo ntetemala monga kaamɛ la nde pombaka nkɛndakɛnda oko wakakɛndakɛndaka+ onto ɔsɔ.
7 Analengo wa ngandji le, dimi lambonyofundɛ, aha ɔlɛmbɛ w’oyoyo, koko ɔlɛmbɛ w’edjedja wakanyalongola oma k’etatelo.+ Ɔlɛmbɛ w’edjedja ɔsɔ wekɔ ɔtɛkɛta wakanyoke.
8 Ndo nto, dimi lambonyofundɛ ɔlɛmbɛ w’oyoyo wele mɛtɛ le nde ndo le nyu, nɛ dia wodjima wekɔ lo teete ndo osase wa mɛtɛ wamboshila mpɛta.+
9 Ɔnɛ lata dia nde ekɔ lo osase koko nde petshaka+ ɔnango, eke lo wodjima.+
10 Ɔnɛ loka ɔnango ngandji tshikalaka lo osase+ ndo le nde ndooko dikambo diatakanya onto.
11 Koko ɔnɛ lahetsha ɔnango ekɔ lo wodjima ndo ekɔ lo nkɛndakɛnda lo wodjima+ ndo nde heye lɛnɛ atandatshu,+ nɛ dia wodjima wambodiha washo ande.
12 Ana wa tshitshɛ le, dimi lambonyofundɛ dikambo pɛkato yanyu yambodimanyiyama l’ɔtɛ wa lokombo+ lande.
13 Waa papa le, dimi lambonyofundɛ dikambo nyu nyambeya ɔnɛ lele oma k’etatelo. Ɛlɔngɔlɔngɔ le, dimi lambonyofundɛ dikambo nyu nyambɔlɛndja kanga kɔlɔ.+ Ana w’akɛnda le, dimi lambonyofundɛ dikambo nyu nyambeya Shɛso.+
14 Waa papa le, dimi lambonyofundɛ dikambo nyu nyambeya ɔnɛ lele oma k’etatelo. Ɛlɔngɔlɔngɔ le, dimi lambonyofundɛ dikambo nyekɔ la wolo+ ndo ɔtɛkɛta wa Nzambi tshikalaka le nyu+ ndo nyambɔlɛndja kanga kɔlɔ.+
15 Tanyolangake andja ɔnɛ kana diangɔ dia l’andja ɔnɛ.+ Naka onto ambolanga andja ɔnɛ, kete ngandji ka Shɛso keema le nde,+
16 nɛ dia ɛngɔ tshɛ kele l’andja ɔnɛ, nsaki ka demba+ ndo nsaki ka washo+ ndo ɔsɛmɔ wa kɛnɛ kele la onto lo lɔsɛnɔ* haye oma le Shɛso, koko ndja oma l’andja ɔnɛ.
17 Ndo nto, andja ɔnɛ la nsaki yawɔ+ wekɔ lo teete, koko ɔnɛ lasala lolango la Nzambi tshikalaka pondjo.+
18 Anami w’akɛnda le, ɔnɛ ekɔ wonya w’ekomelo ndo oko wakanyoke dia otunyi wa Kristo ekɔ lo ndjaye,+ kaanga kakianɛ atunyi wa Kristo efula wambɛnama,+ diakɔ dieyaso dia taya wonya w’ekomelo.
19 Vɔ wakatombe oma l’atei aso, koko vɔ komonga weho w’anto wele oko sho,*+ nɛ dia otondonga vɔ waki weho w’anto wele oko sho, tshike wototshikala kaamɛ la so. Koko, vɔ wakatombe oma l’atei aso dia mɛnama hwe ɔnɛ aha anto tshɛ mbele weho w’anto wele oko sho.+
20 Koko nyu nyakasɔnama oma le ɔnɛ lele ekila+ ndo nyu tshɛ nyekɔ la ewo.
21 Dimi lambonyofundɛ, aha l’ɔtɛ w’ɔnɛ nyu hanyeye akambo wa mɛtɛ,+ koko nɛ dia nyu mbaeyaka ndo nɛ dia ndooko kashi kaya oma lo mɛtɛ.+
22 Akɔna ele kanga kashi naka aha ɔnɛ lahetawɔ dia Yeso ekɔ Kristo?+ Ɔsɔ ekɔ otunyi wa Kristo,+ ɔnɛ languna Shɛso ndo Ɔnande.
23 Onto tshɛ languna Ɔna hetawɔma ndo+ le Shɛso. Onto letawɔ Ɔna+ mbetawɔmaka ndo+ le Shɛso.
24 Koko, kɛnɛ kakanyoke oma l’etatelo pombaka ntshikala le nyu.+ Naka kɛnɛ kakanyoke oma l’etatelo ntshikala le nyu, kete nyayotetemala monga kaamɛ la Ɔna ndo kaamɛ la Shɛso.
25 Ndo nto, kɛnɛ kakandatolake tɔ kɛnɛ: Lɔsɛnɔ la pondjo.+
26 Dimi lambonyofundɛ akambo asɔ lo kɛnɛ kendana la wanɛ walanga nyonganyiya.
27 Koko nyu, okitamelo w’esɔ wakanyalongola oma le nde+ wekɔ lo ntshikala le nyu ndo nyu bu l’ohomba w’onto ɔmɔtshi nyetsha; koko okitamelo w’esɔ w’oma le nde wekɔ lo nyetsha akambo tshɛ+ ndo wekɔ mɛtɛ, aha kashi. Oko wakawanyetsha, nyotshikale kaamɛ la nde.+
28 Ɔnkɔnɛ, nyu ana wa tshitshɛ, nyotshikale kaamɛ la nde, kele lam’ayondɛnama, katɔtɛkɛtɛ akambo hwe hwe+ ndo aha la nkakitɔna la nde la nsɔnyi tshɛ lo woongelo ande.
29 Naka nyu mbeyaka dia nde ekɔ ɔlɔlɔ, nyu mbeyaka nto dia onto tshɛ lasala ɔlɔlɔ akotɔ oma le nde.+
Nɔtɛ ka l'ɛse ka dikatshi
^ Kana “ɔtɛkɛtɛdi.”
^ Kana “olambo wakomba pɛkato; ehomɔ katutadia.”
^ Kana “ofunu wa diangɔ diele la onto.”
^ Kana “vɔ komonga waso.”
