1 Joani 3:1-24
3 Nyende woho wa ngandji kakatoke+ Shɛso lo woho wakandetawɔ dia sho mbelamɛ ana wa Nzambi!+ Ndo ngasɔ mbeso. Diakɔ diele andja hawoteye,+ nɛ dia vɔ hawoweye.+
2 Analengo wa ngandji, sho tekɔ ana wa Nzambi,+ koko kɛnɛ kayotoyala+ kateyama. Sho mbeyaka dia etena tshɛ kayondɛnama, tayonga oko nde, nɛ dia tayowɛna woho wende.
3 Ndo onto tshɛ lele l’elongamelo kɛsɔ l’otema ande amboyaɛdia ndamɛ+ oko onto ɔsɔ lele pudipudi.
4 Onto tshɛ latetemala nsala pɛkato ekɔ lo ntetemala mɔnyɔla ɛlɛmbɛ. Ɔnkɔnɛ, pɛkato ekɔ ɛɔnywɛlɔ k’ɛlɛmbɛ.
5 Nyu mbeyaka nto dia nde akɛnama dia ndjonya pɛkato+ yaso ndo nde bu la pɛkato.
6 Onto tshɛ latshikala kaamɛ la nde hatetemala nsala pɛkato.+ Onto tshɛ latetemala nsala pɛkato atawɛnyi ndo ataweye.
7 Anami wa tshitshɛ, tanyetawɔke di’onto ɔmɔtshi nyonganyiya. Onto lasala akambo w’ɛlɔlɔ ekɔ ɔlɔlɔ oko wele onto ɔsɔ ɔlɔlɔ.
8 Onto latetemala nsala pɛkato ndja oma le Diabolo, nɛ dia Diabolo okosalaka pɛkato oma k’etatelo.*+ L’oyango ɔnɛ mbakɛnama Ɔna Nzambi: Dia ndanya etsha wa Diabolo.+
9 Onto tshɛ lambotɔ oma le Nzambi hatetemala nsala pɛkato+ nɛ dia lɔtɔngɔ* Lande tshikalaka le onto ɔsɔ, ndo nde hakoke ntetemala nsala pɛkato dikambo nde ambotɔ oma le Nzambi.+
10 Ana wa Nzambi la ana wa Diabolo mbeyamaka lo dikambo nɛ: Onto tshɛ lahasale kɛnɛ kele ɔlɔlɔ haye oma le Nzambi, popo ndo onto lahalange ɔnango.+
11 Nɛ dia losango lakanyoke oma k’etatelo ele l’ɔnɛ sho pombaka mbokana ngandji lam’asaso,+
12 aha oko Kɛna lakaye oma le kanga kɔlɔ ndo lakadiake ɔnango.+ L’ɔtɛ wa na wakandoodiake? Nɛ dia etsha ande waki kɔlɔ,+ koko w’ɔnango waki ɛlɔlɔ.+
13 Analengo, tanyambake naka andja ɔnɛ wambonyohetsha.+
14 Sho mbeyaka dia taki oko anto wambovɔ, koko kakianɛ taya la lɔsɛnɔ,+ nɛ dia sho mbokaka anangɛso+ ngandji. Onto lahokana ngandji aakatshikadi lo nyɔi.+
15 Onto tshɛ lahetsha ɔnango ekɔ ondjakanyi,+ ndo nyu mbeyaka dia ndooko ondjakanyi wele lɔsɛnɔ la pondjo tshikalaka le nde.+
16 Oma lo dikambo sɔ mbamboteya ngandji, nɛ dia nde akakimɔ lɔsɛnɔ* lande dikambo diaso.+ Ɔnkɔnɛ, sho lawɔ pombaka nkimɔ nsɛnɔ* yaso dikambo di’anangɛso.+
17 Koko onto tshɛ lele la diangɔ dia l’emunyi dia l’andja ɔnɛ, ko nde mɛnaka ɔnango ele lo dihombo, koko halange mbooka kɛtshi, onde sho koka mbuta dia ngandji ka Nzambi kekɔ le nde?+
18 Anami wa tshitshɛ, tatokanake ngandji tsho lo ɛtɛkɛta ndo laadiko di’ɛlɔmɔ,+ koko lo etsha+ ndo lo mɛtɛ.+
19 Oma lo dikambo sɔ mbayoteya dia sho ndja oma lo akambo wa mɛtɛ ndo mbayotoshikikɛ* etema aso la ntondo kande
20 oyadi dikambo diakɔna tshɛ diayokoka etema aso taanya, nɛ dia Nzambi ndeka etema aso woke ndo nde mbeyaka akambo tshɛ.+
21 Analengo wa ngandji, naka etema aso hawotaanya, kete tayonga la dihonga dia ntɛkɛta awui hwe hwe otsha le Nzambi;+
22 ndo kɛnɛ tshɛ kalɔmbaso, nde+ toshakatɔ, nɛ dia tekɔ lo nkitanyiya ɛlɛmbɛ ande ndo tekɔ lo nsala kɛnɛ kangɛnyangɛnya washo ande.
23 Lo mɛtɛ, kɛnɛ katodjangɛnde ele dia sho monga la mbetawɔ lo lokombo l’Ɔnande Yeso Kristo+ ndo dia mbokana+ ngandji oko wakandatodjangɛ.
24 Ndo nto, ɔnɛ lakitanyiya ɛlɛmbɛ ande tshikalaka kaamɛ la nde, ndo nde ekɔ kaamɛ l’onto ɔsɔ.+ L’ekimanyielo ka nyuma kakandatosha, sho mbeyaka dia nde ekɔ kaamɛ la so.+
Nɔtɛ ka l'ɛse ka dikatshi
^ Kana “oma lam’akandatatɛ.”
^ Mbuta ate lɔtɔngɔ lakoka ntomba, kana ntɔ elowa.
^ Kana “anima.”
^ Kana “anima.”
^ Kana “mbayotetawoya.”
