1 Joani 4:1-21
4 Analengo wa ngandji, tanyetawɔke ɔtɛkɛta+ tshɛ wakasambiyama,* koko nyohembe ɛtɛkɛta wakasambiyama* dia menda kana vɔ ndja oma le Nzambi,+ nɛ dia amvutshi efula wa kashi wambotomba l’andja.+
2 Nganɛ mbakokanyu mbeya dia kana ɛtɛkɛta ɛmɔtshi wakasambiyama ndja oma le Nzambi: Ɛtɛkɛta tshɛ wakasambiyama wetawɔ dia Yeso Kristo akaye lo demba ndja oma le Nzambi.+
3 Koko, ɛtɛkɛta tshɛ wakasambiyama wahetawɔ Yeso hawoye oma le Nzambi.+ Ndo nto, ɔsɔ ekɔ ɛtɛkɛta wakasambiyama oma le otunyi wa Kristo wakanyoke dia nde ekɔ lo ndjaye+ ndo kakianɛ nde amboshila ndja l’andja.+
4 Ana wa tshitshɛ, nyu nyekɔ ana wa Nzambi ndo nyambowadja otshumba,+ nɛ dia onto lele kaamɛ la nyu+ ndeka ɔnɛ lele kaamɛ la andja.+
5 Vɔ ndja oma l’andja,+ diakɔ diatawɔ akambo wa l’andja ndo andja mbahokamɛka.+
6 Sho ndja oma le Nzambi. Onto lambeya Nzambi tohokamɛka.+ Onto lahaye oma le Nzambi hatohokamɛ.+ Oma lo dikambo sɔ mbatshikitanyaso ɛtɛkɛta wa mɛtɛ wakasambiyama la ɛtɛkɛta wa lokeso+ wakasambiyama.
7 Analengo wa ngandji, totetemale mbokana ngandji lam’asaso,+ nɛ dia ngandji ndja oma le Nzambi ndo onto tshɛ lokana ngandji akotɔ oma le Nzambi ndo mbeyaka Nzambi.+
8 Onto tshɛ lahokana ngandji ateye Nzambi, nɛ dia Nzambi ekɔ ngandji.+
9 Oma lo dikambo nɛ mbakɛnama ngandji ka Nzambi le so: Nzambi akatome Ɔnande+ ɛtɔi lakandote l’andja dia sho nkondja lɔsɛnɔ lo tshimbo yande.+
10 Lo dikambo sɔ mbele ngandji, aha sho mbakoke Nzambi ngandji, koko nde kakatoke ngandji ndo kakatotomɛ Ɔnande oko olambo+ w’ekombelo ka pɛkato*+ yaso.
11 Analengo wa ngandji, lam’ele Nzambi akatoke ngandji ngasɔ, sho lawɔ pombaka mbokana ngandji lam’asaso.+
12 Ndooko onto lakɛnyi Nzambi.+ Naka sho ntetemala mbokana ngandji, kete Nzambi ayongaka kaamɛ la so ndo ngandji kande kambonga kokele le so.+
13 Sho mbeyaka dia tekɔ kaamɛ la nde ndo nde ekɔ kaamɛ la so, nɛ dia nde akatosha nyuma kande.
14 Ndo nto, shoamɛ takɛnyi ndo tekɔ lo mbuta dia Shɛso akatome Ɔnande oko Oshimbedi w’andja.+
15 Onto tshɛ letawɔ dia Yeso Kristo ekɔ Ɔna Nzambi,+ Nzambi ekɔ kaamɛ la onto ɔsɔ ndo nde ekɔ kaamɛ la Nzambi.+
16 Ndo sho tambeya ndo tambetawɔ ngandji kele la Nzambi oya le so.+
Nzambi ekɔ ngandji+ ndo onto tshɛ latshikala lo ngandji tshikalaka kaamɛ la Nzambi ndo Nzambi tshikalaka kaamɛ la nde.+
17 L’ɔtɛ wa dikambo sɔ, ngandji kakakome kokele le so dia sho monga la dihonga dia ntɛkɛta akambo hwe hwe*+ lo lushi la kilombo, nɛ dia oko wele onto ɔsɔ, mbeso lo andja ɔnɛ.
18 Lam’ele ngandji wɔma bu,+ koko ngandji ka kokele minyaka* wɔma, nɛ dia wɔma kaloyaka onto ɛkɔngɔkɔngɔ. Lo mɛtɛ, onto loka wɔma, ngandji kande katakome kokele.+
19 Sho mbokaka anto ngandji, nɛ dia Nzambi akatolange ntondo.+
20 Naka onto mbuta ate: “Dimi mbokaka Nzambi ngandji,” ko nde petshaka ɔnango, kete kanga kashi+ kende. Nɛ dia onto lahalange ɔnango+ lɛnande hakoke nanga Nzambi lahandɛnyi.+
21 Ndo takalongola didjango di’oma le nde diata dia onto loka Nzambi ngandji pombaka nto nanga ɔnango.+
Nɔtɛ ka l'ɛse ka dikatshi
^ Tshɛk., “nyuma.”
^ Tshɛk., “nyuma tshɛ.”
^ Kana “olambo wakomba pɛkato; ehomɔ katutadia.”
^ Kana “mbeso la eshikikelo.”
^ Kana “mbikashaka.”
