1 Joani 5:1-21
5 Onto tshɛ letawɔ dia Yeso ekɔ Kristo, akotɔ oma le Nzambi,+ ndo onto tshɛ lalanga ombutshi nangaka ndo ɔna lambotɔ oma le nde.
2 Oma lo dikambo nɛ mbeyaso dia sho nangaka ana wa Nzambi,+ naka sho nangaka Nzambi ndo kitanyiyaka ɛlɛmbɛ ande.
3 Nɛ dia kɛnɛ kalembetshiya nanga Nzambi tɔ kɛnɛ: dia sho nkitanyiya ɛlɛmbɛ ande,+ koko ɛlɛmbɛ ande bu wotsho,+
4 dikambo onto tshɛ* lambotɔ oma le Nzambi mbidjaka andja ɔnɛ+ otshumba. Ndo la otshumba ɔnɛ, mbuta ate mbetawɔ kaso+ mbakatadje andja ɔnɛ otshumba.
5 Akɔna akoka mbidja andja ɔnɛ+ otshumba? Shi ɔnɛ letawɔ dia Yeso ekɔ Ɔna Nzambi?+
6 Yeso Kristo kele ɔnɛ lakaye l’ekimanyielo k’ashi la dikila. Aha la ashi ato,+ koko la ashi ndo la dikila.+ Ndo nyuma kekɔ ɔmɛnyi,+ nɛ dia nyuma kekɔ mɛtɛ.
7 Nɛ dia ekɔ ɛmɛnyi esato washikikɛ:
8 Nyuma,+ ashi+ la dikila.+ Vɔ akɔ 3 sangaka lolemi.
9 Naka sho mbetawɔka kɛnɛ kata anto, kete kɛnɛ kata Nzambi ndeka. Nɛ dia kɛnɛ kata Nzambi ele kɛnɛ kakandate lo dikambo dia Ɔnande.
10 Onto lele la mbetawɔ le Ɔna Nzambi ekɔ la eshikikelo le nde ndamɛ. Onto lele bu la mbetawɔ le Nzambi ambowetɛ kanga kashi,+ nɛ dia nde bu la mbetawɔ dia kɛnɛ kata Nzambi lo dikambo di’Ɔnande kekɔ mɛtɛ.
11 Ndo kɛnɛ katama ele dia Nzambi akatosha lɔsɛnɔ la pondjo,+ ndo lɔsɛnɔ lɔsɔ lekɔ le Ɔnande.+
12 Onto letawɔ Ɔna ekɔ la lɔsɛnɔ lɔsɔ, onto lahetawɔ Ɔna Nzambi bu la lɔsɛnɔ+ lakɔ.
13 Dimi lambonyofundɛ akambo asɔ dia nyu mbeya dia nyu wanɛ wele la mbetawɔ lo lokombo l’Ɔna Nzambi+ nyekɔ la lɔsɛnɔ la pondjo.+
14 Eshikikelo* kɛnɛ mbele la so le nde+ shoate kɛnɛ tshɛ kɔɔlɔmbaso kɔtɔnɛ la lolango lande, nde tokɛka.+
15 Ndo naka sho mbeyaka dia nde tokɛka lo kɛnɛ tshɛ kɔɔlɔmbaso, kete sho mbeyaka dia tayokondja diangɔ dialɔmbaso lam’ele takɔɔlɔmbɛdiɔ.+
16 Naka onto ɔmɔtshi ambɛna ɔnango asala pɛkato kahakonya lo nyɔi, nde kalɔmbɛ, ko Nzambi ayowosha+ lɔsɛnɔ, eelo, le wanɛ wahasadi pɛkato kakonya lo nyɔi.+ Ekɔ pɛkato kɛmɔtshi kakonya lo nyɔi. Lo kɛnɛ kendana la pɛkato kɛsɔ kahamawote dia nde nɔmba.
17 Dikambo dia kɔlɔ tshɛ diekɔ pɛkato,+ koko ekɔ pɛkato kɛmɔtshi kahakonya lo nyɔi.
18 Sho mbeyaka dia onto tshɛ lakotɔ oma le Nzambi hatetemala nsala pɛkato, koko ɔnɛ lakotɔ oma le Nzambi* ekɔ lo mbolama ndo kanga kɔlɔ hakoke mbosalɛ ndooko dikambo.*+
19 Sho mbeyaka dia sho ndja oma le Nzambi, koko andja w’otondo wekɔ lo nɔmbɔma oma le kanga kɔlɔ.+
20 Koko, sho mbeyaka dia Ɔna Nzambi akaye+ ndo nde akatosha shɛnɔdi* dia sho mbeya ɔnɛ lele mɛtɛ.+ Ndo sho tekɔ kaamɛ la ɔnɛ lele mɛtɛ, lo tshimbo y’Ɔnande Yeso Kristo. Ɔsɔ kele Nzambi ka mɛtɛ ndo lɔsɛnɔ la pondjo.+
21 Ana wa tshitshɛ, nyewɔ dikishi.+
Nɔtɛ ka l'ɛse ka dikatshi
^ Tshɛk., “ɛngɔ tshɛ.”
^ Kana “Dihonga dia ntɛkɛta akambo hwe hwe.”
^ Kana “hawokimɛ la wolo tshɛ.”
^ Mbuta ate Yeso Kristo, Ɔna Nzambi.
^ Tshɛk., “eokelo ka lo yimba; dikoka dia lo yimba.”
