1 Nkumi ya dikanga 1:1-53
1 L’etena kɛsɔ ko nkumekanga Davidɛ aya osombe wa lokosombe+ ndo kaanga mbakawookombaka ahɔndɔ, nde akokaka paka tshitshi keto.
2 Ko ekambi ande wakawotɛ vate: “Toyange osekaseka ɔmɔtshi w’emuma dikambo dia nkumɛmi nkumekanga, ko nde ayotshikalaka lale nkumekanga oko olami ande. Nde ayetamaka laleyɛ, dia nde kɔhɛtshahɛtshaka, wɛ nkumɛmi nkumekanga.”
3 Vɔ wakayange ɔna womoto l’olangala lo ɛtshi ka nkɛtɛ k’Isariyɛlɛ k’otondo, ko wakatotana Abishangɛ+ ose Shunɛma+ ko wakawela le nkumekanga.
4 Ɔna womoto akɔ aki olangala wahadjama anya, ko nde akayala olami wa nkumekanga ndo akatshikalaka lalende; koko nkumekanga kombeyana la nde.
5 L’etena kɛsɔ, Adɔnidja+ ɔna Hangiti akayadiya, ata ate: “Dimi layanga monga nkumekanga!” Nde akayasalɛ pusupusu, aki la ambahemi wa mfalasa ndo apami 50 dia vɔ talawɔka la ntondo kande.+
6 Koko she kombaanya* ndooko lushi lo mbuta ɔnɛ: “Lande na kamboyosala nganɛ?” Ndo nto, nde aki olangala efula ndo nyango akawote l’ɔkɔngɔ wa mbota Abisalɔma.
7 Nde akasawola la Jɔaba ɔna Zeruya nde la ɔlɔmbɛdi Abiyatara,+ ko vɔ wakakimanyiya Adɔnidja ndo wakoosukɛ.+
8 Koko ɔlɔmbɛdi Zadɔka,+ Bɛnaya+ ɔna Jɛhɔyada, omvutshi Natana,+ Shimei,+ Rɛi ndo andɔshi wa ta+ wa wolo waki Davidɛ kosukɛ Adɔnidja.
9 L’edjedja ka wonya, Adɔnidja akalambola+ ɛkɔkɔ, ngɔmbɛ ndo nyama ya wata suke la dive dia Zɔhɛlɛtɛ diele suke la Ɛnɛ-Rɔngɛlɛ, ko nde akelɛ anango tshɛ, mbuta ate ana w’apami wa nkumekanga ndo apami tshɛ w’aseka Juda wele ekambi wa nkumekanga.
10 Koko nde kombelɛ omvutshi Natana, Bɛnaya ndo andɔshi wa ta wa wolo kana Sɔlɔmɔna k’ɔnango.
11 Ko Natana+ akatɛ Batɛ-Shɛba+ nyango+ Sɔlɔmɔna ate: “Onde wɛ atoke dia Adɔnidja+ ɔna Hangiti aya nkumekanga, ko nkumɛso Davidɛ heye ndooko dui lo dikambo sɔ?
12 Ɔnkɔnɛ lam’alangayɛ, yaka nkolake, dia wɛ mbitsha lɔsɛnɔ layɛ hita ndo lɔsɛnɔ la* ɔnayɛ Sɔlɔmɔna.+
13 Tshɔka le nkumekanga Davidɛ kele towote wate: ‘Nkumɛmi nkumekanga le, shi wɛ kakatshibɛ okambi ayɛ wate: “Ɔnayɛ Sɔlɔmɔna kayonga nkumekanga l’ɔkɔngɔ ami ndo nde kayodjasɛ lo kiti kami ka lowandji”?+ Ko lande na kaya Adɔnidja nkumekanga?’
14 Etena kayoyɔtɛkɛtaka la nkumekanga, dimi layɔtɔ ndo layoshikikɛ ɛtɛkɛta ayɛ.”
15 Ko Batɛ-Shɛba akɔtɔ le nkumekanga lo luudu lande la l’etei. Nkumekanga akayala osombe efula ndo Abishangɛ+ ose Shunɛma akatshikalaka lale nkumekanga.
16 Batɛ-Shɛba akakɔlama ndo akakusamɛ nkumekanga ko nkumekanga akate ate: “Ayangayɛ?”
17 Nde akakadimola ate: “Nkumɛmi, wɛ kakatshibɛ okambi ayɛ lo lokombo la Jehowa Nzambi kayɛ wate: ‘Ɔnayɛ Sɔlɔmɔna kayonga nkumekanga l’ɔkɔngɔ ami ndo nde kayodjasɛ lo kiti kami ka lowandji.’+
18 Ko ohenda, Adɔnidja aya nkumekanga, koko nkumɛmi nkumekanga heye ndooko dui lo dikambo sɔ.+
19 Nde ambolambola ngɔmbɛ, nyama ya wata la ɛkɔkɔ efula ka mamba, ndo nde ambelɛ ana w’apami tshɛ wa nkumekanga kaamɛ la ɔlɔmbɛdi Abiyatara nde la Jɔaba owandji w’asɔlayi,+ koko nde hele okambi ayɛ Sɔlɔmɔna.+
20 Wonya ɔnɛ, nkumɛmi nkumekanga le, washo w’ase Isariyɛlɛ tshɛ wekɔ le yɛ dia wɛ mbatɛ onto layodjasɛ lo kiti ka lowandji ka nkumɛmi nkumekanga l’ɔkɔngɔ ande.
21 Naka aha ngasɔ, kete kam’ayetama nkumɛmi nkumekanga dia momuya kaamɛ la watshɛnde, dimi la ɔnami Sɔlɔmɔna tayɔsama oko afungi.”
22 Etena kakandatɛka nkumekanga awui asɔ, omvutshi Natana akɔtɔ.+
23 Ko wakatɛ nkumekanga vate: “Omvutshi Natana amboya!” Nde akɔtɔ la ntondo ka nkumekanga ndo akakusamɛ nkumekanga elungi polo la nkɛtɛ.
24 Ko Natana akate ate: “Nkumɛmi nkumekanga le, onde wɛ akate wate ‘Adɔnidja ayonga nkumekanga l’ɔkɔngɔ ami ndo nde kayodjasɛ lo kiti kami ka lowandji’?+
25 Dikambo nde akaholwe ɛlɔ dia tolambola+ ngɔmbɛ, nyama ya wata ndo ɛkɔkɔ efula ka mamba, ndo nde akele ana w’apami tshɛ wa nkumekanga, ewandji w’asɔlayi ndo ɔlɔmbɛdi+ Abiyatara. Vɔ wekɔ lɛkɔ wonya ɔsɔ, walɛ ndo wanɔ kaamɛ la nde ndo wekɔ lo ntetemala mbuta vate: ‘Nkumekanga Adɔnidja alombe!’
26 Koko nde hambele dimi okambi ayɛ, hele ɔlɔmbɛdi Zadɔka, hele Bɛnaya+ ɔna Jɛhɔyada ndo hele okambi ayɛ Sɔlɔmɔna.
27 Onde nkumɛmi nkumekanga akasha lotshungɔ lo dikambo sɔ aha la mbutɛ okambi ayɛ onto lahomba mbidjasɛ lo kiti ka lowandji ka nkumɛmi nkumekanga l’ɔkɔngɔ ande?”
28 Ko nkumekanga Davidɛ akakadimola ate: “Nyombele Batɛ-Shɛba.” Ko nde akɔtɔ ndo akemala la ntondo ka nkumekanga.
29 Oma laasɔ, nkumekanga akatshibe ate: “Lo mɛtɛ oko wele Jehowa la lɔsɛnɔ, ɔnɛ lakantshungola* oma lo shɔkɔ+ tshɛ,
30 paka oko wakamakotshibɛ lo lokombo la Jehowa Nzambi k’Isariyɛlɛ nte: ‘Ɔnayɛ Sɔlɔmɔna kayonga nkumekanga l’ɔkɔngɔ ami ndo nde kayodjasɛ lo kiti kami ka lowandji lo dihole diami,’ kɛsɔ kayangami nkotsha ɛlɔ.”
31 Ko Batɛ-Shɛba akakɔlama ndo akakusamɛ nkumekanga, ko akate ate: “Nkumɛmi nkumekanga Davidɛ alombe pondjo!”
32 Mbala kakɔ ɔtɔi, nkumekanga Davidɛ akate ate: “Nyombele ɔlɔmbɛdi Zadɔka, omvutshi Natana ndo Bɛnaya+ ɔna Jɛhɔyada.”+ Ko vɔ wakɔtɔ le nkumekanga.
33 Nkumekanga akawatɛ ate: “Nyɔshi ekambi wa nkumɛnyu ndo nyahenya ɔnami Sɔlɔmɔna laadiko dia mfalo*+ kami hita, kele nyoholɔ la nde otsha la Ngihɔna.+
34 Ɔlɔmbɛdi Zadɔka nde la omvutshi Natana kawotookite esɔ+ lɛkɔ dia nde monga nkumekanga k’Isariyɛlɛ. Oma laasɔ, kanyode dimama ndo kanyote nyate: ‘Nkumekanga Sɔlɔmɔna+ alombe!’
35 L’ɔkɔngɔ wa laasɔ, ko nyu tawoyelaka l’ɔkɔngɔ ndo nde kaye, kadjasɛ lo kiti kami ka lowandji, ko nde ayonga nkumekanga lo dihole diami ndo dimi layowosha ɔkɛndɛ wa nɔmbɔla Isariyɛlɛ la Juda.”
36 Ko Bɛnaya ɔna Jɛhɔyada akatɛ nkumekanga ate: “Aamɛɛ! Jehowa Nzambi ka nkumɛmi nkumekanga ashikikɛ dui nɛ.
37 Oko waki Jehowa kaamɛ la nkumɛmi nkumekanga, nde oonge kaamɛ la Sɔlɔmɔna+ ndo Nde eetɛ kiti kande ka lowandji woke efula oleki kiti ka lowandji ka nkumɛmi nkumekanga Davidɛ.”+
38 Oma laasɔ, ɔlɔmbɛdi Zadɔka, omvutshi Natana, Bɛnaya+ ɔna Jɛhɔyada ndo ase Kerɛtɛ vɔ l’ase Pelɛtɛ+ wakaholɔ, ko wakahenya Sɔlɔmɔna lo mfalo ka nkumekanga Davidɛ+ ko wakɔɔtɔlɛ la Ngihɔna.+
39 Ko ɔlɔmbɛdi Zadɔka akɔshi loseke l’esɔ+ oma lo luudu la dipɛma,+ akakite Sɔlɔmɔna esɔ ndo akatatɛ mbida dimama, ko anto tshɛ wakatatɛ mbuta la dui dia wolo vate: “Nkumekanga Sɔlɔmɔna+ alombe!”
40 L’ɔkɔngɔ wa laasɔ, anto tshɛ wakooyele ndo wakadɛ, watade tohonge ndo watangɛnangɛna efula, ko nkɛtɛ yakaatɛ l’ɔtɛ wa londjo+ lakawadjaka.
41 Adɔnidja ndo wanɛ tshɛ wakandelɛ wakoke dui sɔ lam’akawashidiya la ndɛ.+ Kam’akoke Jɔaba wendjo wa dimama, nde akate ate: “Lande na kele londjo la lofunguso ngasɔ l’osomba?”
42 Etena kakandatɛkɛtaka, Jɔnatana+ ɔna ɔlɔmbɛdi Abiyatara akaye. Ko Adɔnidja akate ate: “Ɔtɔ, nɛ dia wɛ ekɔ onto ɔlɔlɔ ndo weho akɔ tshɛ wɛ amboya la losango l’ɔlɔlɔ.”
43 Koko Jɔnatana akakadimola Adɔnidja ate: “Keema! Nkumɛso nkumekanga Davidɛ ambetɛ Sɔlɔmɔna nkumekanga.
44 Nkumekanga akootomi nde la ɔlɔmbɛdi Zadɔka, omvutshi Natana, Bɛnaya ɔna Jɛhɔyada ndo ase Kerɛtɛ vɔ l’ase Pelɛtɛ, ko vɔ wakawahenyisha lo mfalo ka nkumekanga.+
45 Oma laasɔ, ɔlɔmbɛdi Zadɔka nde l’omvutshi Natana wakookitshi esɔ la Ngihɔna dia nde monga nkumekanga. L’ɔkɔngɔ diko, vɔ wakade oma lɛkɔ wayangɛnangɛna ndo lofunguso lekɔ l’osomba. Ɔsɔ kele londjo lakanyoki.
46 Ndo nto, Sɔlɔmɔna ambodjasɛ lo kiti ka lowandji.
47 Dui dikina ele, ekambi wa nkumekanga wakaye ndjandola nkumɛso nkumekanga Davidɛ vate: ‘Nzambi kayɛ eetɛ lokombo la Sɔlɔmɔna woke oleki lokombo layɛ ndo Nde eetɛ kiti kande ka lowandji woke oleki kiti kayɛ ka lowandji!’ Ko nkumekanga akakusami lo mbeto.
48 Nkumekanga akatshi nto ate: ‘Jehowa Nzambi k’Isariyɛlɛ atombɔme, nde lambosha onto ɔmɔtshi diɛsɛ ɛlɔ dia mbidjasɛ lo kiti kami ka lowandji ndo lambetawɔ dia washo ami hita tɛnyi dikambo diakɔ!’”
49 Ko wanɛ tshɛ wakelamɛ le Adɔnidja wakoke wɔma ndo onto l’onto akonɛɛ, ko akatshu lo mboka kande.
50 Adɔnidja nde lawɔ akoke Sɔlɔmɔna wɔma, ko nde akonɛɛ, ko akatshu tokimɛ nseke ya lo elambwelo.+
51 Wakayotɛ Sɔlɔmɔna vate: “Adɔnidja ekɔ lo mboka nkumekanga Sɔlɔmɔna wɔma ndo nde ambokimɛ nseke ya lo elambwelo, ata ate: ‘Nkumekanga Sɔlɔmɔna atantshibe ntondo dia nde hatodiaka okambi ande la lokuwa la ta.’”
52 Ko Sɔlɔmɔna akate ate: “Naka nde nsala akambo lo yoho ya dimɛna, kete ndooko kaanga wɔɔngi wa divo diande wayɔkɔ la nkɛtɛ. Ko naka dui dia kɔlɔ tanema le nde,+ kete nde ayohomba mvɔ.”
53 Ko nkumekanga Sɔlɔmɔna akatome dui dia vɔ toya la nde oma lo elambwelo. Oma laasɔ, nde akɔtɔ ko akakusamɛ nkumekanga Sɔlɔmɔna ndo oma laasɔ, Sɔlɔmɔna akawotɛ ate: “Tshɔka lakayɛ.”
Nɔtɛ ka l'ɛse ka dikatshi
^ Kana “mbonyangiya; mbohangwɛ.”
^ Kana “anima ayɛ hita ndo anima wa.”
^ Kana “lakatsha anima ami.”
^ Kana “mfalo ka wadi.”
