1 Nkumi ya dikanga 2:1-46
2 Lam’aki Davidɛ suke la mvɔ, nde akatɛ ɔnande Sɔlɔmɔna ate:
2 “Dimi laya suke la mvɔ.* Ɔnkɔnɛ, keketala+ ndo onga pami.+
3 Wɛ pombaka nkotsha ɔkɛndɛ wele la yɛ le Jehowa Nzambi kayɛ lo kɛndakɛndaka lo mboka yande ndo lo kitanyiyaka wadjango ande, ɛlɛmbɛ ande, dombwelo diande ndo waohwelo ande oko wofundamiwɔ lo Ɛlɛmbɛ wa Mɔsɛ,+ ko wɛ ayotondoya* lo kɛnɛ tshɛ kasalayɛ ndo lo dihole tshɛ diayoyotshɔ.
4 Jehowa ayokotsha daka diakandalake lo dikambo diami ate: ‘Naka anayɛ mbidja yimba lo mboka kawɔ lo nkɛndakɛnda la kɔlamelo tshɛ la ntondo kami la etema awɔ tshɛ ndo la anima*+ awɔ tshɛ, kete ndooko onyake onto ɔmɔtshi la lo ɔlɔndji* ayɛ kayodjasɛka lo kiti ka lowandji k’Isariyɛlɛ.’+
5 “Ndo nto, wɛ mbeyaka dimɛna kɛnɛ kakansalɛ Jɔaba ɔna Zeruya, kɛnɛ kakandasalɛ ewandji 2 w’asɔlayi wa l’Isariyɛlɛ, mbuta ate Abinɛrɛ+ ɔna Nɛrɛ nde la Amasa+ ɔna Jɛtɛrɛ. Nde akaadiake, akakɛdia dikila+ dia ta l’etena ka wɔladi ndo nde akadje dikila dia ta lo oya wa lo lokende lande ndo lo sabata ya l’ekolo ande.
6 Kosale akambo la lomba layɛ ndo tetawɔke dia divo diande dia ndjwe ntshɔ lo Diombo*+ la ki.
7 “Koko kɛnya ngandji ka kɔlamelo le ana wa Barazilai+ ose Ngiliyadɛ ndo vɔ pombaka monga l’atei w’anto wayɔlɛka lo mɛsa ayɛ, nɛ dia ngasɔ mbakawemalaka suke la mi+ etena kakamalawɔ ɔnanyɔ Abisalɔma.+
8 “Ndo nto, Shimei ɔna Ngɛra oseka Bɛnjamina k’oma la Bahurima ekɔ kaamɛ la yɛ. Nde kakambidje mananu la etshii+ wa wolo lushi lakamatatshɔka otsha la Mahanayima.+ Koko lam’akandaholɔ dia ndjohomana la mi lo Jɔrdana, dimi lakootshibɛ lo lokombo la Jehowa nte: ‘Dimi hantokodiaka la lokuwa la ta.’+
9 Ɔnkɔnɛ, tootshikake aha la mbosha dilanya,+ nɛ dia wɛ ekɔ kanga lomba ndo wɛ mbeyaka kɛnɛ kahombayɛ mbosalɛ. Wɛ pombaka ntɔla divo diande dia ndjwe lo Diombo* kaamɛ la dikila.”+
10 Oma laasɔ, Davidɛ aketama dia momuya kaamɛ la watshɛnde ndo wakookundɛ l’Osomba wa Davidɛ.+
11 Davidɛ akolɛ Isariyɛlɛ l’edja k’ɛnɔnyi 40. Nde akolɛ ɛnɔnyi 7 la Hɛbɛrɔna+ ndo ɛnɔnyi 33+ la Jɛrusalɛma.
12 L’ɔkɔngɔ wa laasɔ, Sɔlɔmɔna akadjasɛ lo kiti ka lowandji ka Davidɛ she, ndo yema yema lowandji lande lakatashikimalaka nge.+
13 Oma laasɔ, Adɔnidja ɔna Hangiti akaye le Batɛ-Shɛba nyango Sɔlɔmɔna. Batɛ-Shɛba akambola ate: “Onde lo ki kamboyoya?” Nde akakadimola ate: “Eelo, lo ki.”
14 Ko Adɔnidja akate ate: “Lekɔ la dui dimɔtshi dia kotɛ.” Nde akate ate: “Ɛsɔ ta.”
15 Nde akatetemala mbuta ate: “Wɛ mbeyaka dimɛna dia dimi kakahombe mbɔsa lowandji lɔnɛ ndo ase Isariyɛlɛ tshɛ wakalongamɛka* dia dimi monga nkumekanga,+ koko wakankɔsɔla lowandji, ko lɔ lakayala laki ɔnalengo, nɛ dia Jehowa kakawoshalɔ dia lɔ monga lande.+
16 Koko wonya ɔnɛ lekɔ lo nanga kɔlɔmba dui dimɔtshi. Totonake.” Ko nde akawotɛ ate: “Ɛsɔ ta.”
17 Oma laasɔ, nde akate ate: “Lam’alangayɛ, lɔmba nkumekanga Sɔlɔmɔna dia nde mbishami Abishangɛ+ ose Shunɛma wadi, nɛ dia nde hatotona.”
18 Ko Batɛ-Shɛba akate ate: “Ekɔ dimɛna! Dimi layokɔtɛkɛtɛ le nkumekanga.”
19 Ɔnkɔnɛ Batɛ-Shɛba akɔtɔ le nkumekanga Sɔlɔmɔna dia tosawola la nde lo dikambo dia Adɔnidja. Mbala kakɔ ɔtɔi, nkumekanga akemala dia mpomana la nde ndo akookusamɛ. Ko nde akadjasɛ lo kiti kande ka lowandji ndo akakitsha kiti kekina ka lowandji lo lonya lande l’omi dia nyango nkumekanga mbidjasɛ.
20 Oma laasɔ, Batɛ-Shɛba akate ate: “Lekɔ lo nanga kɔlɔmba vuiwui tshɔi. Totonake.” Ko nkumekanga akawotɛ ate: “Mama, lɔmba, nɛ dia dimi hantotona.”
21 Nde akate ate: “Etawɔ dia ɔnanyɔ Adɔnidja mbɔsa Abishangɛ ose Shunɛma wadi.”
22 Ko nkumekanga Sɔlɔmɔna akakadimola nyango ate: “Lande na kalɔmbɛyɛ Adɔnidja Abishangɛ ose Shunɛma? Wɛ mbeyaka mbɔlɔmbɛ ndo lowandji,+ nɛ dia nde ekɔ enondo+ ami ndo ɔlɔmbɛdi Abiyatara nde la Jɔaba+ ɔna Zeruya+ wekɔ lo mbosukɛ.”
23 Ko nkumekanga Sɔlɔmɔna akatshibe lo lokombo la Jehowa ate: “Nzambi ambisha dilanya dia wolo naka aha dia nshisha lɔsɛnɔ* lande hita kakalɔmbi Adɔnidja dikambo sɔ.
24 Lo mɛtɛ oko wele Jehowa la lɔsɛnɔ, ɔnɛ lambonshikikadia+ ndo lambombidjashiya lo kiti ka lowandji ka Davidɛ dia papa ndo lambombisha luudu,*+ oko wakandalake, Adɔnidja ayodiakema+ ɛlɔ.”
25 Mbala kakɔ ɔtɔi, nkumekanga Sɔlɔmɔna akatome Bɛnaya+ ɔna Jɛhɔyada, ko nde akatshu, akatɔkɔmɔla* Adɔnidja, ko nde akavu.
26 Nkumekanga akatɛ ɔlɔmbɛdi Abiyatara+ ate: “Tshɔka otsha la Anatɔta+ lo ɛtshi kayɛ ka nkɛtɛ! Wɛ ekɔ onto lahomba mvɔ, koko dimi hantokodiaka ɛlɔ, nɛ dia wɛ akɛmbaka Ɔshɛtɛ wa Nkum’Olongo Nkumadiɔndjɔ Jehowa la ntondo ka Davidɛ dia papa,+ ndo nɛ dia wɛ akasowe asui tshɛ wakasowe papa.”+
27 Ɔnkɔnɛ Sɔlɔmɔna akanya Abiyatara oma l’olimu w’ɔlɔmbɛdi wa Jehowa dia nkotsha kɛnɛ kakate Jehowa la Shilo+ lo dikambo dia luudu la Eli.+
28 Lam’akakome losango lɔsɔ le Jɔaba, dikambo Jɔaba akasukɛ Adɔnidja+ koko nde kosukɛ Abisalɔma,+ Jɔaba akalawɔ otsha lo luudu la dipɛma la Jehowa+ ko akatokimɛ nseke ya lo elambwelo.
29 Oma laasɔ, wakayotɛ nkumekanga Sɔlɔmɔna vate: “Jɔaba ambolawɔ lo luudu la dipɛma la Jehowa ndo nde ekɔ lɛkɔ suke la elambwelo.” Ko Sɔlɔmɔna akatome Bɛnaya ɔna Jɛhɔyada ate: “Tshɔka towodiake!”
30 Ko Bɛnaya akatshu otsha lo luudu la dipɛma la Jehowa ndo akawotɛ ate: “Nkumekanga kata ate: ‘Tomba!’” Koko nde akate ate: “Keema, dimi layovɔ lanɛ.” Bɛnaya akayotɛ nkumekanga awui asɔ ate: “Ngasɔ mbakatshi Jɔaba ndo ngasɔ mbakandakadimodi.”
31 Ko nkumekanga akawotɛ ate: “Sala oko wotshinde. Diakande kele nyookundɛ ndo nyominye dimi l’ase luudu la papa dikila diakakɛdia Jɔaba ɔkɛdiakɛdia.+
32 Jehowa ayokaloya dikila diande l’ɔtɛ ande ndamɛ, nɛ dia, aha la Davidɛ dia papa mbeya, nde akakɔmɔla ndo akadiake apami 2 waki anto w’ɛlɔlɔ ndo w’amɛna efula mboleka la lokuwa la ta: Abinɛrɛ+ ɔna Nɛrɛ, owandji w’asɔlayi wa lo Isariyɛlɛ+ ndo Amasa+ ɔna Jɛtɛrɛ, owandji w’asɔlayi wa la Juda.+
33 Dikila diawɔ diayokalola l’ɔtɛ wa Jɔaba ndo l’ɔtɛ wa tokanula tande pondjo pondjo.+ Koko wɔladi w’oma le Jehowa wayale le Davidɛ, le tokanula tande, lo luudu lande ndo lo kiti kande ka lowandji pondjo pondjo.”
34 Ko Bɛnaya ɔna Jɛhɔyada akatshu, akatɔkɔmɔla Jɔaba ndo akoodiake, ko wakookundɛ lo luudu lande hita la l’oswe.
35 Oma laasɔ, nkumekanga akasɔnɛ Bɛnaya+ ɔna Jɛhɔyada dia monga owandji w’asɔlayi lo dihole diande ndo nkumekanga akasɔnɛ ɔlɔmbɛdi Zadɔka+ lo dihole dia Abiyatara.
36 L’ɔkɔngɔ wa laasɔ, nkumekanga akelɛ Shimei+ ko akawotɛ ate: “Ka luudu lanɛ la Jɛrusalɛma kele djasɛ. Totombake oma lɔkɔ dia ntshɔ dihole diakɔna tshɛ.
37 Lushi layoyotomba ndo layoyotenyanya Okidi wa Kidirɔna,+ eya dia wɛ ayovɔ. Dikila diayɛ diayonga l’ɔtɛ ayɛ wɛmɛ.”
38 Shimei akakadimola nkumekanga ate: “Kɛnɛ kamboyota kekɔ dimɛna. Okambi ayɛ ayosala oko wamboyota, wɛ nkumɛmi nkumekanga.” Ko Shimei akatshikala la Jɛrusalɛma l’edja ka nshi efula.
39 Koko l’ekomelo k’ɛnɔnyi 3, mfumbe 2 yaki Shimei yakalawɔ otsha le Akishi+ ɔna Maaka nkumekanga ka Ngata. Lam’akawayotɛ Shimei vate: “Eenda, mfumbe yayɛ yekɔ la Ngata,”
40 mbala kakɔ ɔtɔi, Shimei akakitsha edee lo mponda kande, ko akatshu la Ngata dia tɛnana la Akishi dia toyanga mfumbe yande. Lam’akakalola Shimei oma la Ngata kaamɛ la mfumbe yande,
41 wakatɛ Sɔlɔmɔna vate: “Shimei akatombe oma la Jɛrusalɛma ko akatshu la Ngata ndo nde ambokalola.”
42 Ko nkumekanga akelɛ Shimei ndo akawotɛ ate: “Onde dimi kokotshibia lo lokombo la Jehowa ndo dimi kokɔhɛmɔla nte: ‘Lushi layoyotomba oma lanɛ otsha lo dihole diakɔna tshɛ, eya dia wɛ ayovɔ’? Shi wɛ akambutɛ wate: ‘Kɛnɛ katayɛ kekɔ dimɛna, dimi layokitanyiya’?+
43 Lande na kakiyɛ kɔnɛmiya etshibelo kakayatshibe la ntondo ka Jehowa ndo didjango diakamakodjangɛ?”
44 Oma laasɔ, nkumekanga akatɛ Shimei ate: “Wɛ mbeyaka wɛmɛ l’otema ayɛ kɔlɔ tshɛ yakayasalɛ Davidɛ dia papa+ ndo Jehowa ayokokaloyɛ kɔlɔ yakɔ l’ɔtɛ+ ayɛ wɛmɛ.
45 Koko nkumekanga Sɔlɔmɔna ayɔtshɔkwama+ ndo kiti ka lowandji ka Davidɛ kayoshikimala nge la ntondo ka Jehowa pondjo pondjo.”
46 Ko nkumekanga akadjangɛ Bɛnaya ɔna Jɛhɔyada, ko nde akatshu, akatɔɔkɔmɔla ko nde akavu.+
Ngasɔ mbakashikikɛma diolelo nge lo anya wa Sɔlɔmɔna.+
Nɔtɛ ka l'ɛse ka dikatshi
^ Tshɛk., “Dimi layanga ntshɔ lo mboka ka nkɛtɛ tshɛ.”
^ Kana “ayosala akambo la lomba.”
^ Enda Elembetshielo.
^ Tshɛk., “pami k’oma le yɛ hatodiakema.”
^ Kana “Sheɔlɛ,” mbuta ate odimu a pɛngando. Enda Elembetshielo.
^ Kana “Sheɔlɛ,” mbuta ate odimu a pɛngando. Enda Elembetshielo.
^ Tshɛk., “wakadje dungi diawɔ lo.”
^ Kana “anima.”
^ Kana “lowandji la l’ɔlɔndji wa nkumbo.”
^ Kana “akayaokɛ le.”
