1 Nkumi ya dikanga 21:1-29
21 L’ɔkɔngɔ w’akambo asɔ, dui dimɔtshi diakatombe lo kɛnɛ kendana la ekambɔ ka vinyɔ kaki Nabɔta ose Jezɛrɛlɛ.+ Diɔ diakasalema la Jezɛrɛlɛ suke la luudu l’owandji laki Ahaba, nkumekanga ka Samariya.
2 Ahaba akatɛ Nabɔta ate: “Ombisha ekambɔ kayɛ ka vinyɔ dia dimi kikonya ekambɔ k’afuki, nɛ dia tɔ kekɔ suke la luudu lami. Dimi layokosha ekambɔ kekina ka vinyɔ koleki dimɛna lo dihole diatɔ. Kana naka wɛ alanga, dimi layokosha falanga yɛdimi la oshinga atɔ.”
3 Koko Nabɔta akatɛ Ahaba ate: “Lo ndjela kanyi ya Jehowa, dimi haafɔnya dia ayonga dimɛna dimi kosha etenyi k’okitɔ ka watshɛmi.”+
4 Ko Ahaba akakalola lakande ele la lonyangu ndo demba kɔmɔ l’ɔtɛ w’okadimwelo wakawosha Nabɔta ose Jezɛrɛlɛ lam’akandate ate: “Dimi hantokosha etenyi k’okitɔ ka watshɛmi.” Ko nde aketama lo mbeto kande, akɛdiya elungi kande dihole dikina ndo akatone ndɛ.
5 Jezabɛlɛ+ ya wadɛnde akɔtɔ le nde, ko akawombola ate: “Lande na keyɛ* la lonyangu nganɛ polo lo wɛ ntona ndɛ?”
6 Nde akookadimola ate: “Nɛ dia lakate Nabɔta ose Jezɛrɛlɛ nte: ‘Onsondja ekambɔ kayɛ ka vinyɔ. Kana naka wɛ alanga, dimi layokosha ekambɔ kekina ka vinyɔ lo dihole diatɔ.’ Koko nde akatshi ate: ‘Dimi hantokosha ekambɔ kami ka vinyɔ.’”
7 Jezabɛlɛ ya wadɛnde akawotɛ ate: “Shi wɛ kele nkumekanga kolɛ lo Isariyɛlɛ? Etɔ, lɛka yangɔ ndo otema ayɛ wangɛnɛngɛnɛ. Dimi layokosha ekambɔ ka vinyɔ kaki Nabɔta ose Jezɛrɛlɛ.”+
8 Ko nde akafunde mikanda lo lokombo la Ahaba ndo akadje ohomɔ ande,+ ko akatome mikanda akɔ le dikumanyi+ la ɛlɔhɛ waki lo osomba wakadjasɛka Nabɔta.
9 Nde akafunde lo mikanda akɔ ate: “Nyewoya dia anto nkila mbo ya ndɛ kele nyodjashiya Nabɔta la ntondo k’anto.
10 Apami 2 w’anyanya kawodjasɛ la ntondo kande kele kawote lo lokombo lande vate:+ ‘Wɛ akadje Nzambi ndo nkumekanga mananu!’+ Oma laasɔ, kanyootondja l’andja kele kanyowoke ave polo nde mvɔ.”+
11 Ɔnkɔnɛ apami wa lo osomba ande, dikumanyi la ɛlɔhɛ wakadjasɛka lo osomba ande wakasale oko wakadiafundama lo mikanda wakaatomɛ Jezabɛlɛ.
12 Vɔ wakewoya dia anto nkila mbo ya ndɛ ndo wakadjashiya Nabɔta la ntondo k’anto.
13 Oma laasɔ, apami 2 w’anyanya wakaye, wakadjasɛ la ntondo kande ndo wakatatɛ nsɔngwɛ Nabɔta la ntondo k’anto vate: “Nabɔta akadje Nzambi ndo nkumekanga mananu!”+ L’ɔkɔngɔ wa laasɔ, vɔ wakɔɔtɔlɛ l’omamu w’osomba ndo wakawooke ave polo nde mvɔ.+
14 Ko vɔ wakatomɛ Jezabɛlɛ dui vate: “Wamboka Nabɔta ave polo nde mvɔ.”+
15 Kam’akoke Jezabɛlɛ dia wamboka Nabɔta ave polo nde mvɔ, nde akatɛ Ahaba ate: “Onɛɛ, tshɔka tɔshi ekambɔ ka vinyɔ kaki Nabɔta ose Jezɛrɛlɛ+ kakandatone kosondja, nɛ dia Nabɔta aya bu la lɔsɛnɔ. Nde ambovɔ.”
16 Kam’akoke Ahaba dia Nabɔta ambovɔ, Ahaba akonɛɛ, akaholɔ otsha lo ekambɔ ka vinyɔ kaki Nabɔta ose Jezɛrɛlɛ dia tokiɔsa.
17 Ko ɔtɛkɛta wa Jehowa wakaye le Elidja+ ose Tishibɛ dia ndjowotɛ ɔnɛ:
18 “Onɛɛ, holɔ tohomane la Ahaba nkumekanga k’Isariyɛlɛ kele la Samariya.+ Nde ekɔ lɛkɔ lo ekambɔ ka vinyɔ kaki Nabɔta, lɛnɛ amondotshɔ dia tokiɔsa.
19 Towote wate: ‘Jehowa kata ate: “Wɛ ambodiaka onto,+ ko wɛ olanga mbɔsa ndo ekambɔ kande?”’+ Oma laasɔ, kowote wate: ‘Jehowa kata ate: “Lo dihole diakalɔmbɔla mfɔ dikila diaki Nabɔta mbayɔlɔmbɔla mfɔ dikila diayɛ.”’”+
20 Ahaba akatɛ Elidja ate: “Otunyi ami le,+ laasɔ wɛ ambombishola?” Nde akakadimola ate: “Lambokoshola. ‘Lam’ele wɛ amboyashikikɛ* dia nsala kɛnɛ kele kɔlɔ lo washo wa Jehowa,+
21 dimi layanga kela mpokoso, layɔmba l’ɔkɔngɔ ayɛ ndo layomana apami tshɛ*+ wa laka Ahaba, mbidja ndo ɔnɛ laha la ekimanyielo ndo lele wɔdu lo Isariyɛlɛ.+
22 Dimi layetɛ luudu layɛ oko luudu la Jɛrɔbɔama+ ɔna Nebatɛ ndo oko luudu la Baasha+ ɔna Ahidja, nɛ dia wɛ ambokutshumbola nkɛlɛ kami ndo wɛ ambokonya Isariyɛlɛ dia nsala pɛkato.’
23 Lo kɛnɛ kendana la Jezabɛlɛ, Jehowa akate ate: ‘Mfɔ yayɔlɛ Jezabɛlɛ lo ɛtshi ka nkɛtɛ ka Jezɛrɛlɛ.+
24 Oseka Ahaba tshɛ layovɔ lo osomba, mfɔ yayowɔlɛ ndo onto tshɛ layovɔ l’oswe, tofudu ta l’olongo tayowɔlɛ.+
25 Lo mɛtɛ, ndooko onto lambonga oko Ahaba+ lakayashikikɛ* dia nsala kɛnɛ kele kɔlɔ lo washo wa Jehowa l’ɔtɛ wawotshutshuya wadɛnde Jezabɛlɛ.+
26 Nde ambosala akambo lo yoho ya wɔnɔnyi efula lo ndjela dikishi dia nyɛtɛɛtɛ,* oko kɛnɛ tshɛ kakasale ase Amɔra wanɛ wele Jehowa akawatshanya oma la ntondo k’ase Isariyɛlɛ.’”+
27 Kam’akoke Ahaba ɛtɛkɛta ɛsɔ, nde akaatshatsha ahɔndɔ ande ndo akalɔtɛ akoto. Nde akakile mbo ya ndɛ, aketamaka lo akoto ndo akakɛndakɛndaka ele demba kɔmɔ.
28 Oma laasɔ, ɔtɛkɛta wa Jehowa wakaye le Elidja ose Tishibɛ ndjowotɛ ɔnɛ:
29 “Onde wɛ ambɛna woho wamboyakitshakitsha Ahaba la ntondo kami?+ Lam’ele nde amboyakitshakitsha la ntondo kami, dimi hantela mpokoso etena kekende la lɔsɛnɔ. Dimi layoyela mpokoso lo luudu lande lo nshi y’ɔnande.”+
Nɔtɛ ka l'ɛse ka dikatshi
^ Tshɛk., “kele yimba yayɛ.”
^ Tshɛk., “wɛ amboyasondja.”
^ Tshɛk., “onto tshɛ lanɔ wanyi lo ehele.” Etelo ka lo Hɛbɛru ka diɔnyɔ kendana la apami.
^ Tshɛk., “lamboyasondja.”
^ Tshɛkɛta ya lo Hɛbɛru yele lanɛ mbeyaka mbɔtɔnɛ la tshɛkɛta yalembetshiya “tumi” ndo vɔ nkamba la yɔ dia mɛnya diɔnyɔ di’efula.
