1 Nkumi ya dikanga 7:1-51
7 Sɔlɔmɔna akɔshi ɛnɔnyi 13 dia mbika luudu lande hita,*+ polo lam’akashile luudu lande l’otondo.+
2 Ko nde akake luudu lelamɛ ɔnɛ Luudu l’Okonda wa Lɛbanɔna+ laki la otale wa kubita* 100, woke wa kubita 50 ndo tanga dia kubita 30, laki la ɛnɔngɔ 4 wa dikundji di’osongo w’olondo; ndo esembe w’olondo+ waki lo dikundji diakɔ.
3 Lɔ lakakombama l’abaya w’olondo waki la diko ndo wakasukamɛka lo dikundji diakɔ. Diɔ diaki tshɛ tshɛ 45, ɔnɔngɔ l’ɔnɔngɔ 15.
4 Ɛnɔngɔ 3 w’adidishi waki la kadrɛma wakikɔ ndo didishi tshɛ diakɛlanɛ la didishi dikina lo tenyi diakɔ 3.
5 Kadrɛma yele la atshuku 4 wɛdimi* yaki lo asoko tshɛ ndo lo dikundji dia la soko oko wakidiɔ oma la ntondo k’adidishi wakɛlanɛ lo tenyi diakɔ 3.
6 Nde akake Mbalasa* ka dikundji kaki la otale wa kubita 50, woke wa kubita 30 ndo tshoto y’otale yaki la ntondo katɔ kaamɛ la dikundji diatɔ ndo dɛfu.
7 Nde akake ndo Mbalasa* ka Kiti ka lowandji+ lɛnɛ akandahombe nomboshaka, mbuta ate Mbalasa ka Kilombo+ ndo wakamame abaya w’olondo lɔkɔ oma lo odihe polo l’odiko.
8 Luudu* la lɛnɛ akandadjasɛka lo sɛkɛ+ dikina laki lo otshimba wa Mbalasa,* ndo lɔ lakafɔnaka la tɔ lo asango. Ndo nto, nde akake luudu lakafɔnaka la Mbalasa kakɔ dikambo dia ɔna Farawɔ la womoto lakatshuke+ Sɔlɔmɔna.
9 Yɔ tshɛ yakakama la ave+ w’oshinga wolo wa lɔkɔlɔnga, lo ndjela yɛdikɔ, wakaatema la si yatawɔ ave l’etei ndo l’andja, oma ko etshina ka luudu polo lam’akomɛ ehele, ndo l’andja polo lo sɛkɛ dia woke.+
10 Etshina ka luudu kakasalema la ave wa weke efula w’oshinga wolo. Ave amɔtshi waki la yɛdikɔ ya kubita 10 ndo ave akina kubita 8.
11 La diko diawɔ mbaki ave w’oshinga wolo wakakɔlɔngama lo ndjela yɛdikɔ kaamɛ ndo abaya w’olondo.
12 Lokombo la sɛkɛ dia woke laki la ɛnɔngɔ 3 w’ave wa lɔkɔlɔnga ndo ɔnɔngɔ 1 w’abaya w’olondo, oko waki lokombo la sɛkɛ dia l’etei+ dia luudu la Jehowa ndo tshoto y’otale ya lo luudu+ lakɔ.
13 Nkumekanga Sɔlɔmɔna akatome dui dia telɛ Hirama,+ ko wakatoya la nde oma la Tura.
14 Nde aki ɔna wadi aki odo ɔmɔtshi la lo dioho dia Nafɛtali ndo she aki otshudi wa yaandjo+ w’ose Tura. Nde aki la diewo di’efula, aki la yimba+ ndo nde akeyaka weho tshɛ w’elimu wa la nkonga.* Ko nde akaye le nkumekanga Sɔlɔmɔna ndo akakambe elimu ande tshɛ.
15 Nde akasale dikundji 2 dia nkonga.+ Ekundji l’ekundji kaki la otale wa kubita 18 ndo otshimbedi w’ekundji l’ekundji*+ waki kubita 12 l’otale wa ɔkɔdi wa yɛdikɔ.
16 Nde akasale ɛtɛ 2 la nkonga dia mbidja lo tɔsɔdi ta dikundji diakɔ. Ɔtɛ ɔmɔtshi waki la otale wa kubita 5 ndo ɔtɛ okina otale wa kubita 5.
17 Ɔtɛ waki lo shɔdi y’ekundji l’ekundji waki la asango w’ɔtɛyi wodingami mɔlɔla;+ 7 lo ɔtɛ ɔmɔtshi ndo 7 lo ɔtɛ okina.
18 Nde akasale ɛnɔngɔ 2 wa pɔmɛgranatɛ l’otshimbedi wa ɔtɛyi l’ɔtɛyi dia nkomba ɛtɛ waki lo tɔsɔdi ta dikundji diakɔ. Nde akasale ngasɔ lo ɛtɛ akɔ 2.
19 Ɛtɛ waki lo tɔsɔdi ta dikundji dia lo omamu wa tshoto y’otale yaki la asango w’alɛmbɔlɛmbɔ waki la otale wa kubita 4.
20 Ɛtɛ waki lo dikundji 2, l’otshimbedi yema la diko dia etenyi kakamamatanaka la ɔtɛyi ndo ɛnɔngɔ wa pɔmɛgranatɛ 200 waki l’otshimbedi w’otondo wa ɔtɛ l’ɔtɛ.+
21 Nde akemɛ dikundji lo omamu wa tshoto y’otale ya lo tɛmpɛlɔ.*+ Nde akemɛ ekundji ka lo lonya l’omi,* ko akakiɔlɛ Jakina* ndo oma laasɔ, nde akemɛ ekundji ka lo lonya la lɔmɔsɔ,* ko akakiɔlɛ Bɔaza.*+
22 Tɔsɔdi ta dikundji diakɔ taki oko alɛmbɔlɛmbɔ. Ko olimu wa dikundji wakashile.
23 Oma laasɔ, nde akasale Oduwa* wa la mbolo ya lɔlɛlɔla.+ Vɔ waki obolonga ndo woke awɔ oma l’ohembo ɔmɔtshi polo l’ohembo okina aki kubita 10; tanga diawɔ kubita 5 ndo otshimbedi awɔ waki la otale wa kubita 30 y’ɔkɔdi wa yɛdikɔ.+
24 Asango wa sɛlɛ+ waki l’ɛse ka ohembo awɔ l’otshimbedi awɔ tshɛ, 10 lo kubita 1 l’otshimbedi w’otondo w’Oduwa akɔ, kaamɛ la ɛnɔngɔ 2 w’asango wa sɛlɛ waki ɛngɔ ɔtɔi.
25 Vɔ wakakitshama laadiko dia ngɔmbɛ 12,+ shato mbɛlɛ lo nɔrdɛ, 3 mbɛlɛ lo owɛstɛ, 3 mbɛlɛ lo sidɛ ndo 3 mbɛlɛ lo ɛstɛ; ko Oduwa akɔ wakahema laadiko diayɔ ndo yɔ tshɛ yakɛdiya ɛkɔngɔ ayɔ otsha l’atei atei.
26 Nkeka kawɔ kaki yɛdikɔ y’etambe ka lonya,* ndo ohembo awɔ wakasalema oko ohembo wa dikɔhɔ, oko dɛmbɔlɛmbɔ. Vɔ wakɔtɔka tɛdikɔ ta bata* nunu pende (2 000) y’ashi.
27 Oma laasɔ, nde akasale pusupusu+ 10 ya nkonga. Pusupusu tshɛ kaki la otale wa kubita 4, woke wa kubita 4 ndo tanga dia kubita 3.
28 Nganɛ mbakasalema pusupusu yakɔ: Yɔ yaki la bɛtshi l’emamu ndo bɛtshi diakɔ dia l’emamu diaki lam’asa esembe.
29 Asango wa ntambwɛ,+ ngɔmbɛ la akɛruba+ waki lo bɛtshi dia l’emamu diaki lam’asa esembe, ndo sango diakɔ diamɛ diaki lo esembe. Dɛngalɛnga di’akɔtɛ akɔtɛ diakalɛndalɛndaka la diko ndo l’ɛse ka ntambwɛ la ngɔmbɛ.
30 Pusupusu tshɛ kaki la etshimbi 4 wa nkonga ndo la esembe wa nkonga, ndo diangɔ 4 dia l’atshuku diaki oko esukɔ. Esukɔ waki l’ɛse ka dɔnga dia woke ndo vɔ wakamamatanyema la dɛngalɛnga lo wedi awɔ tshɛ.
31 Onyɔ adiɔ waki l’etei k’ohembo wa la diko, wakatanunaka otsha la diko kubita 1. Onyɔ atɔ waki obolonga, wakasalema ekitshelo ka kubita 1 la etenyi ndo asango waki l’onyɔ atɔ. Bɛtshi diatɔ dia l’emamu diaki la atshuku 4 wɛdimi, aha ebolonga.
32 Etshimbi atɔ 4 waki l’ɛse ka bɛtshi dia lo emamu ndo esukɔ w’etshimbi akɔ wakakɔhama lo pusupusu, ndo otshimbi tshɛ waki la tanga dia kubita 1 la etenyi.
33 Etshimbi akɔ wakasalema oko etshimbi wa pusupusu ya weho ekina. Esukɔ, engangɔ, ɛsɛkɛ ndo mpoke yawɔ yakasalema tshɛ la mbolo ya lɔlɛlɔla.
34 Pusupusu tshɛ kaki la esukɔ 4 lo atshuku 4. Esukɔ atɔ wakamamatanyema oko etenyi kɛmɔtshi ka* pusupusu.
35 Ohembo waki la tanga dia k’ahende ɔtɔi ka kubita waki l’otshimbedi wa la diko wa pusupusu, ndo la diko dia pusupusu kakɔ aki diangɔ diatɔ dia l’asɔnga ndo bɛtshi diatɔ dia lo emamu diakamamatanyema oko etenyi katɔ kɛmɔtshi.*
36 Nde akasange akɛruba, ntambwɛ ndo atoko lo diangɔ dia l’asɔnga ndo lo bɛtshi dia lo emamu lo ndjela woke wa dihole dia ɛngɔ l’ɛngɔ, kaamɛ ndo dɛngalɛnga l’otshimbedi w’otondo.+
37 Ngasɔ kakandasale pusupusu+ yakɔ 10. Yɔ tshɛ yakasalema la mbolo ya lɔlɛlɔla,+ la yɛdikɔ yaamɛ ndo woho waamɛ.
38 Nde akasale alɔnga wa weke+ wa nkonga 10. Dɔnga tshɛ diakakokaka mbɔtɔ tɛdikɔ ta bata 40 y’ashi. Dɔnga la dɔnga diaki la yɛdikɔ ya kubita 4.* Lo pusupusu yakɔ 10, pusupusu tshɛ kaki la dɔnga dia woke 1.
39 Oma laasɔ, nde akakitsha pusupusu 5 lo lɛkɛ la lonya l’omi la luudu ndo 5 nkina lo lɛkɛ la lonya la lɔmɔsɔ la luudu, ko nde akakitsha Oduwa lo lɛkɛ la lonya l’omi la luudu, otsha lo sidɛ ɛstɛ.+
40 Ndo nto, Hirama+ akasale alɔnga wa weke, mpawo+ ndo alɔnga w’afuku.+ Ko Hirama akashidiya olimu tshɛ wakandasalɛ nkumekanga Sɔlɔmɔna lo luudu la Jehowa:+
41 Dikundji+ 2 ndo ɛtɛ wele oko alɔnga w’afuku waki lo tɔsɔdi ta dikundji diakɔ 2; ɛtɛyi+ 2 dia mbifɛ ɛtɛ wele oko alɔnga w’afuku waki lo tɔsɔdi ta dikundji diakɔ;
42 asango wa pɔmɛgranatɛ+ 400 dikambo dia ɛtɛyi akɔ 2, ɛnɔngɔ 2 wa pɔmɛgranatɛ dikambo dia ɔtɛyi l’ɔtɛyi dia mbifɛ ɛtɛ 2 wele oko alɔnga w’afuku waki lo dikundji diakɔ 2;
43 pusupusu+ 10 ndo alɔnga wa weke+ 10 wa lo pusupusu yakɔ;
44 Oduwa+ la ngɔmbɛ 12 ya l’ɛse k’Oduwa akɔ;
45 nkenga ya mbidjaka otoko, mpawo, alɔnga w’afuku ndo diangɔ dikina tshɛ dia la nkonga ka dimɛna diakasalɛ Hirama nkumekanga Sɔlɔmɔna dikambo dia luudu la Jehowa.
46 Nkumekanga akadilɛlɔla lo nkɛtɛ ya diwomba ya lo distrikɛ dia Jɔrdana lam’asa Sukɔta la Zarɛtana.
47 Sɔlɔmɔna akatshike diangɔ tshɛ aha la mbɛdika wotsho adiɔ, nɛ dia diaki efula ka mamba. Wotsho wa nkonga kombeyama shikaa.+
48 Sɔlɔmɔna akasale diangɔ nɛ tshɛ dikambo dia luudu la Jehowa: Elambwelo+ ka paonyi; mɛsa+ wa paonyi wa kitshaka mapa wa lɛɛnya;
49 dikundji dia atala+ dia la paonyi ka pudipudi, 5 lo lonya l’omi ndo 5 lo lonya la lɔmɔsɔ la ntondo ka luudu loleki l’etei; alɛmbɔlɛmbɔ,+ atala ndo manu la paonyi;+
50 alɔnga wa weke, diangɔ dia dimaka dja,+ alɔnga w’afuku, akɔhɔ+ ndo diangɔ dia mɛmbaka dja+ la paonyi ka pudipudi; diangɔ diakimɛ nkuke ya luudu la l’etei,+ mbuta ate Dihole dioleki Ekila, ndo diakimɛ nkuke ya luudu la tɛmpɛlɔ,+ dia paonyi.
51 Ko nkumekanga Sɔlɔmɔna akashidiya olimu tshɛ wakandahombe nkamba dikambo dia luudu la Jehowa. Oma laasɔ, Sɔlɔmɔna akadje diangɔ diakakidia+ Davidɛ dia she l’etei ndo nde akadje mfɛsa, paonyi ndo diangɔ dikina lo waombelo wa lo luudu la Jehowa.+
Nɔtɛ ka l'ɛse ka dikatshi
^ Kana “luudu l’owandji.”
^ Kana “bɛkɛ nɛi; rɛktanglɛ (bɛkɛ pende etale ndo bɛkɛ pende tomondo).”
^ Kana “Tshoto y’otale.”
^ Kana “Tshoto y’otale.”
^ Kana “luudu l’owandji.”
^ Tshɛk., “luudu la Mbalasa.”
^ Kana “wodjolo,” lanɛ ndo lo ahole akina wayela wele lo tshapita nyɛ.
^ Kana “otshimbedi w’ekundji l’ekundji ka lo dikundji diakɔ 2 waki la kubita 12.”
^ Tɛmpɛlɔ lanɛ mendanaka la Dihole di’ekila.
^ Kana “ka lo sidɛ.”
^ Kitshimudi ate: “Nde [mbuta ate Jehowa] ashikikadia nge.”
^ Kana “ka lo nɔrdɛ.”
^ Ondo kitshimudi ate: “Lo wolo.”
^ Kana “ɛngɔ ka mombaka ashi.”
^ Kana “waki ɛngɔ 1 la.”
^ Kana “diaki ɛngɔ 1.”
^ Kana “kubita 4 l’otshimbedi.”
