1 Nkumi ya dikanga 8:1-66
8 L’etena kɛsɔ, Sɔlɔmɔna akatshumanya+ dikumanyi dia l’Isariyɛlɛ, ɛtɛ wa waoho tshɛ, ewandji wa mvudu ya washɛwɔ wa l’Isariyɛlɛ.+ Vɔ wakaye le nkumekanga Sɔlɔmɔna la Jɛrusalɛma dia ndjɛmba ɔshɛtɛ wa sheke wa Jehowa oma l’Osomba wa Davidɛ,+ mbuta ate Siɔna.+
2 Apami tshɛ w’ase Isariyɛlɛ wakatshumana la ntondo ka nkumekanga Sɔlɔmɔna lo fɛtɛ* lo ngɔndɔ ka Etanima,* mbuta ate ngɔndɔ ka 7.+
3 Ko dikumanyi tshɛ dia l’Isariyɛlɛ wakaye ndo ɛlɔmbɛdi wakɛmbɛ Ɔshɛtɛ+ akɔ.
4 Vɔ wakɛmbɛ Ɔshɛtɛ wa Jehowa, luudu la dipɛma l’esanganelo+ ndo diangɔ di’ekila tshɛ diaki lo luudu lakɔ la dipɛma. Ɛlɔmbɛdi l’ase Lɛwi mbakadiɛmbɛ.
5 Nkumekanga Sɔlɔmɔna nde l’olui w’otondo w’ase Isariyɛlɛ wakatshumana dia tohomana la nde waki la ntondo k’Ɔshɛtɛ. Ɔnkɔnɛ, wakalambola+ ɛkɔkɔ ndo ngɔmbɛ efula woho wele kokoka mbadiema kana mbeya lofulo lawɔ.
6 Oma laasɔ, ɛlɔmbɛdi wakɔtshiya ɔshɛtɛ wa sheke wa Jehowa lo dihole diawɔ,+ lo luudu loleki l’etei, Dihole dioleki Ekila, l’ɛse k’ahafu w’akɛruba.+
7 Ahafu w’akɛruba wakasandjɔ la diko dia dihole diaki Ɔshɛtɛ, ko dɛdi dia akɛruba akɔ diakakombaka Ɔshɛtɛ la esembe awɔ.+
8 Esembe+ akɔ waki etale efula woho wele tɔsɔdi t’esembe akɔ takɛnamaka oma lo Dihole di’Ekila la ntondo ka luudu loleki l’etei, koko vɔ kɔmɛnamaka l’andja. Vɔ wekɔ laawɔ polo ndo ɛlɔ.
9 Ndooko ɛngɔ kekina kaki lo Ɔshɛtɛ, paka pase 2 di’ave+ diakadje Mɔsɛ lɔkɔ+ la Hɔrɛbɛ lam’akadje Jehowa sheke+ nde l’ase Isariyɛlɛ etena kakawayatombaka oma lo wodja w’Edjibito.+
10 Lam’akatombe ɛlɔmbɛdi oma lo dihole di’ekila, dinge+ diakalole lo luudu la Jehowa.+
11 Ɛlɔmbɛdi komonga nto la akoka wa memala dia nkamba l’ɔtɛ wa dinge, nɛ dia lotombo la Jehowa lakalole lo luudu la Jehowa.+
12 L’etena kɛsɔ, Sɔlɔmɔna akate ate: “Jehowa akate dia nde ayodjasɛ lo wodjima wa tshududu.+
13 Dimi lamboshidiya kokɛ luudu la diambo, dihole dia shikaa diahombayɛ mbidjasɛka pondjo pondjo.”+
14 Ko nkumekanga akakadimɔ otsha le anto ndo akatatɛ ntshɔkɔla etshumanelo k’otondo k’Isariyɛlɛ etena kakemala etshumanelo k’otondo k’Isariyɛlɛ.+
15 Nde akate ate: “Jehowa Nzambi k’Isariyɛlɛ atombɔme, ɔnɛ lele oma l’onyɔ ande hita kakandalake Davidɛ dia papa ndo oma lo lonya lande hita kamondela ekotshamelo, ata ate:
16 ‘Oma ko lushi lakamatondja wodja ami w’Isariyɛlɛ oma l’Edjibito, dimi kɔsɔna osomba ɔmɔtshi oma lo waoho tshɛ w’Isariyɛlɛ dia mbika luudu dia lokombo lami ntshikala lɔkɔ,+ koko lakasɔnɛ Davidɛ dia nde mbolɛ wodja ami w’Isariyɛlɛ.’
17 Otema wa Davidɛ dia papa wakakombola mbika luudu dikambo dia lokombo la Jehowa Nzambi k’Isariyɛlɛ.+
18 Koko Jehowa akatɛ Davidɛ dia papa ate: ‘Otema ayɛ wakakombola dia mbika luudu dikambo dia lokombo lami, ndo wɛ akasale dimɛna dia nkombola dikambo sɔ l’otema ayɛ.
19 Koko wɛ hatoka luudu lakɔ, paka ɔnayɛ layoyota* kayoyoka luudu dikambo dia lokombo lami.’+
20 Jehowa akakotsha daka diakandalake, nɛ dia dimi lakahɛnɛ Davidɛ dia papa ndo lambodjasɛ lo kiti ka lowandji lo Isariyɛlɛ, oko wakalake Jehowa. Ndo nto, dimi lamboka luudu dikambo dia lokombo la Jehowa Nzambi k’Isariyɛlɛ+
21 ndo lamboshikikɛ dihole dimɔtshi lɔkɔ dikambo dia Ɔshɛtɛ wele la sheke+ yakadje Jehowa la watshɛso etena kakandayawatondjaka oma lo wodja w’Edjibito.”
22 Oma laasɔ, Sɔlɔmɔna akemala la ntondo ka elambwelo ka Jehowa, la ntondo k’etshumanelo k’otondo k’Isariyɛlɛ, ndo nde akemɛ anya l’olongo,+
23 ko akate ate: “Jehowa Nzambi k’Isariyɛlɛ le, ndooko Nzambi kele oko wɛ+ l’olongo la diko kana la nkɛtɛ l’ɛse kalama sheke ndo kɛnya ngandji ka kɔlamelo+ le ekambi ayɛ wakɛndakɛnda la ntondo kayɛ la etema awɔ tshɛ.+
24 Wɛ akalame daka diakayalake okambi ayɛ Davidɛ dia papa. Wɛ akalake daka la onyɔ ayɛ hita ndo ɛlɔ wɛ ambodikotsha la lonya+ layɛ hita.
25 Wonya ɔnɛ, Jehowa Nzambi k’Isariyɛlɛ le, okotsha daka diakayalake okambi ayɛ Davidɛ dia papa lam’akayate wate: ‘Ndooko onyake onto ɔmɔtshi la lo ɔlɔndji ayɛ kayodjasɛka la ntondo kami lo kiti ka lowandji k’Isariyɛlɛ naka anayɛ mbidja yimba lo mboka kawɔ, lo nkɛndakɛnda la ntondo kami oko wamboyɔkɛndakɛnda la ntondo kami.’+
26 Ɔnkɔnɛ, Nzambi k’Isariyɛlɛ le, lam’alangayɛ, etawɔ dia daka diakayalake okambi ayɛ Davidɛ dia papa kotshama.
27 “Ko, onde mɛtɛ Nzambi ayodjasɛ la nkɛtɛ?+ Eenda, olongo, ɛɛ, olongo wa la diko di’elongo hawokoke le yɛ,+ kete hoke luudu lɔnɛ lamomoka!+
28 Ɔnkɔnɛ, Jehowa Nzambi kami le, odje yimba lo dɔmbɛlɔ di’okambi ayɛ ndo lo kɛnɛ kakɔlɔmbande dia mbooka kɛtshi, ndo ohokame delo dialɔmbande ekimanyielo ndo dɔmbɛlɔ diakɔlɔmba okambi ayɛ la ntondo kayɛ ɛlɔ.
29 Odiholake washo ayɛ oya lo luudu lɔnɛ otsho la yanyi, oya lo dihole diakayate wate: ‘Lokombo lami layonga lɛkɔ,’+ dia mpokamɛ dɔmbɛlɔ diakɔlɔmba okambi ayɛ lo dihole nɛ.+
30 Ohokamɛke ndo dɔmbɛlɔ diakɔlɔmba okambi ayɛ dia mpomɔ lokolo l’ɔlɔ lo washo ayɛ ndo dɔmbɛlɔ dia wodja ayɛ w’Isariyɛlɛ dialɔmbawɔ lo dihole nɛ. Kohokamɛke oma l’olongo+ lɛnɛ adjasɛyɛ; ɛɛ, kohokamɛke ndo kodimanyiyake.+
31 “Naka onto ɔmɔtshi ambosalɛ osekande kɔlɔ ko ambɔlɔmbama dia nde ntshiba* ndo nde ambokelekama lo etshibelo* kakɔ, ko nde amboya la ntondo ka elambwelo kayɛ lo luudu lɔnɛ+ etena kende lo etshibelo* kakɔ,
32 kohokame oma l’olongo, kekɛ lonya ndo kolombosha ekambi ayɛ lo mbuta dia onto lakasadi kɔlɔ kele la onongo* ndo lo mbela kɛnɛ kakandasadi l’ɔtɛ ande hita; lo mbuta dia ɔnɛ lɔswɛ keema la onongo* ndo lo mbofuta lo ndjela losembwe+ lande hita.
33 “Lam’ayɔlɛndjama wodja ayɛ w’Isariyɛlɛ oma le otunyi awɔ ɔmɔtshi l’ɔtɛ wayowotetemala kosalɛ pɛkato,+ ko vɔ wambokalola le yɛ ndo wambotombola lokombo layɛ+ ko wambokɔlɔmba ndo wambokɔsɛngasɛnga lo luudu lɔnɛ dia wɛ mbaoka kɛtshi,+
34 kohokame oma l’olongo ndo kodimanyiya wodja ayɛ w’Isariyɛlɛ pɛkato yawɔ ndo kowakaloya lo wodja wakayasha watshɛwɔ.+
35 “Lam’ayodihama olongo ko mvula hayɔlɔ+ l’ɔtɛ wayowotetemala kosalɛ pɛkato,+ ko vɔ wambokɔlɔmba oya lo dihole nɛ, wambotombola lokombo layɛ ndo wambokadimɔ oma lo pɛkato kawɔ, nɛ dia wɛ ambaakitshakitsha,*+
36 kohokame oma l’olongo ndo kodimanyiya ekambi ayɛ pɛkato kawɔ, ka wodja ayɛ w’Isariyɛlɛ, nɛ dia wɛ ayowaetsha+ mboka k’ɔlɔlɔ kahombawɔ nkɛndakɛnda. Kɔlɔsha mvula lo wodja+ wakayasha ekambi ayɛ oko etenyi k’okitɔ.
37 “Naka ndjala ka kasha kambonga lo wodja+ kana olando ɔmɔtshi, tanyi talongoya diononɛ, mombolenge,+ ɛndjɔ kana akata walanya diangɔ, kana naka otunyi awɔ ambaadinga l’osomba ɔmɔtshi wa lo wodja* ɔnɛ kana naka woho ɔmɔtshi wa sui kana wa hemɔ wambaakomɛ,+
38 dɔmbɛlɔ diakɔna tshɛ, kɛnɛ tshɛ kayokɔlɔmba onto ɔmɔtshi kana wodja ayɛ w’otondo w’Isariyɛlɛ dia mpomɔ lokolo l’ɔlɔ,+ (nɛ dia onto tshɛ mbeyaka sui dia otema ande hita)+ lam’ayowemɛ anya awɔ oya lo luudu lɔnɛ,
39 kohokame oma l’olongo lɛnɛ adjasɛyɛ,+ kodimanyiya+ ndo kekɛ lonya. Kofute onto l’onto lo ndjela mboka+ yande tshɛ, nɛ dia wɛ mbeyaka otema ande (dikambo wɛ oto keya mɛtɛ otema w’onto tshɛ),+
40 dia vɔ kooka wɔma nshi tshɛ yayowodjasɛ lo wodja wakayasha watshɛso.
41 “Ndo nto, lo kɛnɛ kendana la ɔngɛndangɛnda wele bu ɔmɔtshi l’atei wa wodja ayɛ w’Isariyɛlɛ ndo wayoya oma lo wodja w’etale l’ɔtɛ wa lokombo*+ layɛ,
42 (nɛ dia vɔ wayoka lokumu lendana la lokombo layɛ la woke+ ndo lonya layɛ la wolo la lonya layɛ losembwe tɔɔ), ko nde amboya ndo ambɔlɔmba oya lo luudu lɔnɛ,
43 kohokame oma l’olongo lɛnɛ adjasɛyɛ+ ndo kosale kɛnɛ tshɛ kakɔlɔmba ɔngɛndangɛnda akɔ, kele anto tshɛ wa la nkɛtɛ kaweye lokombo layɛ ndo kawokooke wɔma,+ oko wakooka wodja ayɛ w’Isariyɛlɛ wɔma, ndo kele kaweye dia lokombo layɛ lekɔ lo mbelamɛ lo luudu lɔnɛ lamomoka.
44 “Naka wodja ayɛ wambotshɔ lo ta dia tɔlɔsha otunyi awɔ lo mboka kayoyaatoma,+ ko vɔ wambɔlɔmba+ Jehowa, wɛlɛ oya l’osomba wakayasɔnɛ+ ndo oya lo luudu lamomoka dikambo dia lokombo layɛ,+
45 kohokame dɔmbɛlɔ diawɔ la ɛsɛngɔsɛngɔ awɔ oma l’olongo ndo kosambole lo dikambo diawɔ.
46 “Naka vɔ wambokosalɛ pɛkato (dikambo ndooko onto lahasale pɛkato),+ ko wɛ ambowaoka nkɛlɛ ndo ambaakimɔ le otunyi ɔmɔtshi, ko otunyi awɔ ambaatɔla lo lɔhɔmbɔ lo wodja w’otunyi, w’etale kana wa suke;+
47 ko vɔ wambotokana yimba lo wodja wayowɔtɔlama mfumbe+ ndo wambokadimɔ le yɛ+ ko wambokɔsɛngasɛnga dia wɛ mbaoka kɛtshi lo wodja w’otunyi awɔ+ vate: ‘Sho takasale pɛkato ndo takasale kɔlɔ; takasale akambo lo yoho ya kɔlɔ,’+
48 ko vɔ wambokadimɔ le yɛ la etema+ awɔ tshɛ ndo la anima* awɔ tshɛ lo wodja w’atunyi awɔ wakaatɔlɛ mfumbe ndo vɔ wambokɔlɔmba, wɛlɛ oya lo wodja wakayasha watshɛwɔ ndo oya l’osomba wakayasɔnɛ ndo oya lo luudu lamomoka dikambo dia lokombo layɛ,+
49 kohokame dɔmbɛlɔ diawɔ la ɛsɛngɔsɛngɔ awɔ wa mbaoka kɛtshi oma l’olongo lɛnɛ adjasɛyɛ+ ndo kosambole lo dikambo diawɔ
50 ndo kodimanyiya anto ayɛ wakakosalɛ pɛkato, lo mbadimanyiya lo munga yawɔ tshɛ yakawakosalɛ. Kosale dia atunyi awɔ mbaoka kɛtshi, ko vɔ wayowaoka kɛtshi+
51 (nɛ dia vɔ wekɔ wodja ayɛ ndo etenyi kayɛ k’okitɔ+ kakayatondja oma l’Edjibito,+ oma l’atei wa nkuka kalɛlɔla mbolo).+
52 Kodihole washo ayɛ lo ɛsɛngɔsɛngɔ w’okambi ayɛ dia wɛ mbooka kɛtshi+ ndo lo ɛsɛngɔsɛngɔ wa wodja ayɛ w’Isariyɛlɛ dia wɛ mbaoka kɛtshi lo mpokamɛ etena tshɛ kakɔlɔmbawɔ.*+
53 Nɛ dia, Nkum’Olongo Nkumadiɔndjɔ Jehowa le, wɛ akaakitsha laande oko etenyi kayɛ k’okitɔ oma lo wedja tshɛ wa la nkɛtɛ,+ oko wakayate lo tshimbo y’okambi ayɛ Mɔsɛ etena kakayayatondjaka watshɛso oma l’Edjibito.”
54 Kam’akashidiya Sɔlɔmɔna nɔmba Jehowa dɔmbɛlɔ sɔ tshɛ ndo dɔmbɛlɔ dia mpomɔ lokolo l’ɔlɔ, nde akonɛɛ oma la ntondo ka elambwelo ka Jehowa, lɛnɛ akandake adwe, edisha anya ande otsha l’olongo.+
55 Oma laasɔ, nde akemala ko akatshɔkɔla etshumanelo k’otondo k’Isariyɛlɛ la dui dia wolo, ata ate:
56 “Jehowa atombɔme, nde lambosha wodja ande w’Isariyɛlɛ dihole dia momuya, oko wakandalake.+ Ndooko kaanga dui 1 diambeta pa+ lo alaka tshɛ w’ɛlɔlɔ wakandalake lo tshimbo y’okambi ande Mɔsɛ.
57 Jehowa Nzambi kaso ayale kaamɛ la so, oko wakinde kaamɛ la watshɛso.+ Nde atotɔsɛkake ndo atototshikake.+
58 Nde akotole etema aso otsha le nde+ dia sho nkɛndakɛnda lo mboka yande tshɛ ndo nama ɛlɛmbɛ ande, wadjango ande ndo dombwelo diande diakandadjangɛ watshɛso dia vɔ nkitanyiya.
59 Ɛtɛkɛta ami ɛnɛ wamomɔsɛngasɛnga Jehowa dia mpomɔ lokolo l’ɔlɔ wongake suke la Jehowa Nzambi kaso la yanyi ndo l’otsho, dia nde nsambola dikambo di’okambi ande ndo dikambo dia wodja ande w’Isariyɛlɛ lo ndjela ehomba wa lushi la lushi,
60 kele anto tshɛ wa la nkɛtɛ kaweye dia Jehowa kele Nzambi ka mɛtɛ,+ ndooko okina.+
61 Ɔnkɔnɛ, etema anyu wonge tshɛ lo tshɛ+ le* Jehowa Nzambi kaso lo nkɛndakɛnda lo ndjela wadjango ande ndo lo nkitanyiya ɛlɛmbɛ ande, oko lushi l’ɛlɔ.”
62 Oma laasɔ, nkumekanga nde l’ase Isariyɛlɛ tshɛ waki kaamɛ la nde wakalambola elambo efula la ntondo ka Jehowa.+
63 Sɔlɔmɔna akalambola Jehowa elambo w’osanga+ ɛnɛ: Nde akalambola ngɔmbɛ nunu akumi ahende la pende (22 000) ndo ɛkɔkɔ nunu lokama l’akumi ahende (120 000). Ko nkumekanga nde l’ase Isariyɛlɛ tshɛ wakasapola luudu la Jehowa.+
64 Lushi lɔsɔ, nkumekanga akahombe nambola elambo l’atei wa sɛkɛ diele la ntondo ka luudu la Jehowa, nɛ dia laawɔ kakandahombe nambola elambo wa lotshumba, elambo wa ntɔngɔ ndo diangɔ dia wata di’oma l’elambo w’osanga dikambo elambwelo ka nkonga+ kele la ntondo ka Jehowa kaki tshitshɛ efula ndo kokoka la elambo wa lotshumba, elambo wa ntɔngɔ ndo diangɔ dia wata+ dia l’elambo w’osanga.
65 L’etena kɛsɔ, Sɔlɔmɔna akasale fɛtɛ+ kaamɛ l’ase Isariyɛlɛ tshɛ, etshumanelo ka woke k’oma la Lɛbɔ-Hamatɛ* polo l’Okidi w’ashi* wa l’Edjibito,+ la ntondo ka Jehowa Nzambi kaso l’edja ka nshi 7 ndo oma laasɔ nshi 7 nkina, tshɛ tshɛ nshi 14.
66 La wedi a pindju,* nde akakɛndja anto, ko vɔ wakatshɔkɔla nkumekanga ndo wakatshu lawakawɔ, watangɛnangɛna ndo wele la ɔlɔ l’etema l’ɔtɛ w’akambo w’ɛlɔlɔ+ tshɛ wakasalɛ Jehowa okambi ande Davidɛ ndo wodja ande w’Isariyɛlɛ.
Nɔtɛ ka l'ɛse ka dikatshi
^ Mbuta ate Fɛtɛ ka Totombotombo.
^ Tshɛk., “ɔnayɛ la pami, ɔnɛ layotomba oma lo awondo ayɛ.”
^ Kana “osekande ambowodja mananu.” Mbuta ate etshibelo kele la mananu oko dilanya naka onto ambotshiba lo kashi kana ambokitola.
^ Tshɛk., “mananu.”
^ Tshɛk., “mananu.”
^ Tshɛk., “kanga kɔlɔ.”
^ Tshɛk., “onto ɔlɔlɔ.”
^ Kana “ambaasoya.”
^ Tshɛk., “lo wodja w’asoko ande.”
^ Kana “lokumu.”
^ Enda Elembetshielo.
^ Kana “lo mbahokamɛ lo kɛnɛ tshɛ kakɔlɔmbawɔ.”
^ Kana “wayakimɔ tshɛ lo tshɛ le.”
^ Kana “mbɔtwɛlɔ ka Hamatɛ.”
^ Enda Elembetshielo.
^ Tshɛk., “lushi la 8,” mbuta ate lushi lakayele nshi 7 ya mbala ka 2.
