1 Petero 1:1-25
1 Dimi Petero, ɔpɔstɔlɔ+ wa Yeso Kristo lambofundɛ ambetshi a mboka wakahandjɔnɛ la Poto, la Ngalatiya, la Kapadɔsɛ,+ la Aziya ndo la Bituniya ndo lambofundɛ ɛsɔnami
2 lo ndjela woho weya Nzambi Shɛso+ akambo la ntondo, kaamɛ la woho wakawakidiama la nyuma+ dia vɔ monga l’okitanyiya ndo mɔngama dikila dia Yeso Kristo+ nte:
Ɔlɔlɔ waheyama mbɛdika ndo wɔladi wafule le nyu!
3 Nzambi, She Nkumɛso Yeso Kristo atombɔme, nɛ dia oma lo kɛtshi kande k’efula, nde akatoote nto+ dia sho monga l’elongamelo kasɛna+ l’ekimanyielo ka eolwelo ka Yeso Kristo oma lo nyɔi,+
4 dia sho nkondja etenyi k’okitɔ+ kahahɔndɛ, kahɔtɔ mindo ndo kahalana. Wambolama etenyi kakɔ k’okitɔ l’olongo dikambo dianyu,+
5 nyu wanɛ walamema lo wolo wa Nzambi, nɛ dia nyekɔ la mbetawɔ dia nyu nkondja panda kaya suke la mbishɔma l’etena k’ekomelo.
6 Oma lo dikambo sɔ mbenyu l’ɔngɛnɔngɛnɔ w’efula, kaanga mbele l’etena ka tshitshɛ keto, naka dui sɔ pombaka salema, nyu pombaka diɛnɛ la ehemba+ wa weho la weho,
7 l’oyango wa mpemba mbetawɔ kanyu+ kele la nɛmɔ dioleki paonyi yalana kaanga mbakayahembama* la dja, dia tɔ nyokimanyiya dia nyu nongola lotombo, diando ndo kɛnɛmɔ lo woshwelo wa Yeso Kristo.+
8 Kaanga mbenyu nyatawɛnaka, nyu mbookaka ngandji. Kaanga mbahanyawɛnyi kakianɛ, nyekɔ la mbetawɔ le nde ndo nyekɔ lo ngɛnangɛna efula l’ɔlɔ waheyama mbuta ndo wa lotombo,
9 nɛ dia nyekɔ lo nkotsha oyango wa mbetawɔ kanyu, mbuta ate panda+ kanyu.*
10 Lo kɛnɛ kendana la panda kɛsɔ, amvutshi wakate prɔfɛsiya lo dikambo dia ɔlɔlɔ waheyama mbɛdika wakawahombe nyosalɛ, wakasale eyangelo+ wa wolo ndo wa lotshimola.
11 Vɔ wakatetemala nyangiayangia dia mbeya etena ka laande kana eleko kakɔna kakahombe mɛnya nyuma kele le wɔ, lo dikambo dia Kristo+ lam’akashikikɛka nyuma kakɔ la ntondo awui wendana la asui wakahombe nkomɛ Kristo+ ndo lotombo lakahombe ndjonga la nde l’ɔkɔngɔ.
12 Wakawasholɛ dia vɔ kondjakambɛka vɔamɛ, koko wakanyokambɛka, lo kɛnɛ kendana la kɛnɛ kanyewoyawɔ kakianɛ oma le wanɛ wakanyewoya lokumu l’ɔlɔlɔ la wolo wa nyuma k’ekila kakaholɔ oma l’olongo.+ Akambo asɔ mbatokombolaka andjelo l’asolo walomɔlomɔ dia mbeya.
13 Ɔnkɔnɛ, nyɔlɔngɔsɔlɛ timba tanyu dia nkamba olimu,+ nyolame akoka anyu w’ekanelo ka yimba dimɛna.+ Nyokitsha elongamelo kanyu lo ɔlɔlɔ waheyama mbɛdika wayowonyosalɛ lo woshwelo wa Yeso Kristo.
14 Oko wenyu ana wele la okitanyiya, nyotshike tshikitanyema* oma le nsaki yaki la nyu ntondo lam’akinyu nyateye Nzambi,
15 koko oko Ɔnɛ lele Ekila lakanyelɛ, nyoyale ekila lo dionga+ dianyu tshɛ,
16 dikambo akafundama ɔnɛ: “Nyu pombaka monga ekila, nɛ dia dimi lekɔ ekila.”+
17 Naka nyekɔ lo mbelɛ* Shɛso, ɔnɛ lalombosha aha la shɔnɔdi+ lo ndjela etsha w’onto l’onto, nyɔkɛndɛkɛndɛ la wɔma+ l’etena kekenyu ambetshi a mboka.
18 Nɛ dia nyu mbeyaka dia aha la diangɔ diahɔnda, mfɛsa kana paonyi mbakanyatshungɔ+ oma lo yoho yanyu ya lɔsɛnɔ y’anyanya yakanyotshikɛ watshɛnyu.*
19 Koko, la dikila dia nɛmɔ+ diele oko dia ɔna ɔkɔkɔ+ waha l’ɛkɔmɔ ndo waha la vadi, mbuta ate Kristo.+
20 Lo mɛtɛ, nde akeyama la ntondo k’andja+ tongama,* koko nde akɛnama l’ekomelo ka tena lo wahɔ+ anyu.
21 Lo tshimbo yande mbenyu ambetawudi le Nzambi,+ ɔnɛ lakawoolola oma lo nyɔi+ ndo lakawosha lotombo+ dia mbetawɔ kanyu ndo elongamelo kanyu monga le Nzambi.
22 Etena kɛnɛ kamonyoyaɛdia* lo monga la okitanyiya lo akambo wa mɛtɛ, ko nyaya la ngandji k’onto l’ɔnango+ kaha ka dungi pende, nyokane ngandji k’efula k’oma k’ɛse otema+ lam’asanyu.
23 Dikambo nyu nyambotɔ nto,+ aha oma le lɔtɔngɔ lahɔnda, koko oma le lɔtɔngɔ lahahɔndɛ*+ l’ekimanyielo k’ɔtɛkɛta wa Nzambi+ kasɛna ndo ka pondjo.
24 Nɛ dia “onto* tshɛ ekɔ oko diyo ndo lotombo lande tshɛ lekɔ oko dɛmbɔlɛmbɔ dia l’oswe. Diyo diatomaka, ko dɛmbɔlɛmbɔ diatɔkɔka,
25 koko ɔtɛkɛta wa Jehowa* tshikalaka pondjo.”+ Ndo “ɔtɛkɛta” ɔsɔ kele lokumu l’ɔlɔlɔ lakawanyewoya.+
Nɔtɛ ka l'ɛse ka dikatshi
^ Kana “mbakayɛdiama.”
^ Kana “panda k’anima anyu.”
^ Kana “kengama.”
^ Kana “ntɛndɛ.”
^ Kana “oma lo kutimɛ.”
^ Tshɛk., “mboka woho la nkɛtɛ,” mbuta ate la ntondo ka Adama la Eva mbota ana.
^ Kana “kambonyɛdia anima anyu.”
^ Mbuta ate lɔtɔngɔ lakoka ntomba, kana ntɔ elowa.
^ Tshɛk., “emunyi.”
