1 Petero 2:1-25
2 Ɔnkɔnɛ, nyoyaɛdia oma lo kɔlɔ tshɛ,+ lokeso, lɔsɛnɔ la dungi pende, kandjema ndo ntɛndɔ tshɛ.
2 Oko ana w’ashashi,+ nyonge la nsaki k’efula k’abɛlɛ wa pudipudi w’ɔtɛkɛta wa Nzambi dia nyu mpama dia ndjokondja panda+ lo tshimbo yawɔ,
3 nɛ dia nyambɔlɛta* dia Nkumadiɔndjɔ ekɔ ɔlɔlɔ.
4 Lam’ele nyamboya le nde, nde lele dive diasɛna diakakasha anto,+ koko diakasɔnama ndo dia nɛmɔ le Nzambi,+
5 nyuamɛ nyekɔ oko ave wasɛna wahikama lo luudu+ la lo nyuma dia nyu monga dioho di’ekila di’ɛlɔmbɛdi, dia nyu nambola elambo+ wa lo nyuma wetawɔma le Nzambi lo tshimbo ya Yeso Kristo.+
6 Nɛ dia Afundelo mbutaka ɔnɛ: “Nyende, dimi lambokitsha dive diakasɔnama la Siɔna, dive dia tshuku di’ohomba ndo ndooko onto longa la mbetawɔ le diɔ layɛmba ɛkɔndjɔ.”*+
7 Ɔnkɔnɛ, le nyu mbende la nɛmɔ, nɛ dia nyu nyekɔ ambetawudi. Koko le wanɛ wele bu ambetawudi, “dive diakakasha+ ambiki wa luudu sɔ diaya dive dia woke dia tshuku,”*+
8 ndo “dive diatakanya ndo dive diakɔshana.”+ Vɔ wekɔ lo ntakana nɛ dia vɔ hawokitanyiya ɔtɛkɛta. L’ɔtɛ wa dikambo sɔ mbakawasɔnama.
9 Koko, nyu nyekɔ “dioho di’ɛsɔnami, ɛlɔmbɛdi wakamba oko nkumi ya dikanga, wodja w’ekila,+ anto waki Nzambi wa laande,+ dia nyu mbewoya l’ahole tshɛ waonga w’amɛna efula”+ wa Ɔnɛ lakanyelɛ oma lo wodjima oya l’osase ande wa diambo.+
10 Nɛ dia ntondo nyu komonga wodja, koko kakianɛ nyaya wodja wa Nzambi.+ Ntondo nyu kombokama kɛtshi, koko kakianɛ nyambokama kɛtshi.+
11 Analengo wa ngandji, dimi lambonyokeketsha oko wenyu angɛndangɛnda ndo ambetshi a mboka+ dia nyu ntetemala nsɛka nsaki+ ya demba yalɔshana la nyu.*+
12 Nyonge la lɔkɛwɔ l’ɔlɔlɔ l’atei w’ase wedja,+ kele naka wambonyofunda ɔnɛ nyekɔ atshi wa kɔlɔ, kawɛnyi etsha anyu w’ɛlɔlɔ,+ kele kawotombole Nzambi lo lushi layondonyɔsɛdingola.
13 L’ɔtɛ wa Nkumadiɔndjɔ, nyoyakitshakitsha l’ɛse ka mandji tshɛ y’ana w’anto,+ oyadi nkumekanga+ oko wende laadiko,
14 kana waa nguvɛrnɛrɛ oko wewɔ atomami ande dia mbisha atshi wa kɔlɔ dilanya ndo dia mandola wanɛ wasala kɛnɛ kele ɔlɔlɔ.+
15 Nɛ dia Nzambi nangaka nyu nsala kɛnɛ kele ɔlɔlɔ dia nyu ndjiha enyɔ w’akanga wa dinginya watɛkɛta ɔtɛkɛtatɛkɛta.+
16 Nyoyale oko anto wele la lotshungɔ+ ndo nyokambe la lotshungɔ lɔsɔ, aha oko okombɔ* dia nyu nsala kɛnɛ kele kɔlɔ,+ koko oko ɛhɔmbɔ wa Nzambi.+
17 Nyɔlɛmiya weho w’anto tshɛ,+ nyoke nkumbo k’otondo k’anangɛso*+ ngandji, nyoke Nzambi+ wɔma ndo nyosha nkumekanga+ kɛnɛmɔ.
18 Ase olimu wayakitshakitsha l’ɛse ka ewandji awɔ w’olimu la wɔma+ tshɛ wahombama, aha tsho le wanɛ wele ɔlɔlɔ ndo la ekanelo k’ɔlɔlɔ, koko ndo le wanɛ wele awui wolo.
19 Nɛ dia ekɔ dui dia dimɛna efula etena kakikɛ onto awui wa kandji* ndo kasoyamande aha l’onongo l’ɔtɛ wa nkum’otema kande le Nzambi.+
20 Wahɔ akɔna wele la nyu naka nyu kɔmama l’ɔtɛ wakanyasale pɛkato ko nyekɔ lo mbikikɛ?+ Ko naka nyu mbikikɛ asui l’ɔtɛ wakanyasale ɔlɔlɔ, ɔsɔ ekɔ dikambo di’ɔlɔlɔ le Nzambi.+
21 Lo mɛtɛ, l’ɔtɛ wa dikambo sɔ mbakanyelamɛ, nɛ dia kaanga Kristo akanyosowɛ+ ndo akanyotshikɛ ɛnyɛlɔ dia nyu mboyela dimɛna dimɛna+ lo wanya ande.
22 Nde kosala pɛkato+ ndo lokeso kotanema l’onyɔ+ ande.
23 Etena kakawɔtɛngaka,*+ nde kombatɛngaka.*+ Etena kakandasoyamaka,+ nde komanɛka wanɛ wakoosoyaka, koko nde akayakimɔ le Ɔnɛ lalombosha+ la losembwe.
24 Ndamɛ akɛmbɛ pɛkato+ yaso lo demba diande hita l’otamba,*+ dia sho mvɔ lo* pɛkato yaso ndo nsɛna lo salaka kɛnɛ kele ɔlɔlɔ. Ndo “nyu nyakakɔnɔ+ diɛsɛ la mpota yande.”
25 Dikambo nyu nyaki oko ɛkɔkɔ wakatanganɛka,+ koko kakianɛ nyu nyambokalola oya le olami w’ɛkɔkɔ+ ndo omendji w’anima anyu.*
Nɔtɛ ka l'ɛse ka dikatshi
^ Kana “nyambɛna.”
^ Tshɛk., “layɔsa nsɔnyi.”
^ Tshɛk., “ɔtɛ wa tshuku.”
^ Kana “anima.”
^ Kana “yɛkɛ nɛndɛ.”
^ Tshɛk., “nkumbo k’onto l’ɔnango.”
^ Kana “awui wa lɔkɔnyɔ.”
^ Kana “kakawohetshaka.”
^ Kana “kombahetsha.”
^ Kana “osongo.”
^ Kana “nshidiya la.”
^ Kana “wa nsɛnɔ yanyu.”
