1 Petero 4:1-19
4 Lam’ele Kristo akasowe lo demba,+ nyu lawɔ nyonge la woho w’ekanelo kaki la nde,* nɛ dia ɔnɛ lakasowe lo demba akangana la pɛkato,+
2 dia nde nsɛna etena kambootshikalɛ lo demba aha la ndjasha nto lo nsaki y’anto,+ koko dia nsala lolango+ la Nzambi.
3 Nɛ dia lo nshi yakete, nyu nyaketsha etena k’otale lo nsala lolango l’ase wedja+ lam’akanyayashaka lo lɔkɛwɔ la fumbɔ nsɔnyi,* lo nsaki ya kɔlɔ, lo ɔnwɛlɔ wa wanu wa tshambandeko, lo fɛtɛ yele l’awui wa tshambandeko,* lo wodjwelo wa wanu ndo lo ɔtɛmwɛlɔ wa kɔlɔ wa dikishi.+
4 Vɔ wambamba nɛ dia nyu hanyoyotetemala ntshɔ la wɔ lo akambo akɔ waamɛ wa kɔlɔ, ɔnkɔnɛ vɔ wekɔ lo ntɛkɛta kɔlɔ dikambo dianyu.+
5 Koko, anto asɔ wayokoya la ɔnɛ layanga nombosha wanɛ wasɛna ndo wanɛ wakavu.+
6 Lo mɛtɛ, diakɔ diakasambishama lokumu l’ɔlɔlɔ ndo le wanɛ wambovɔ,*+ kele kaanga mbambowolomboshama lo demba lo ndjela kanyi y’anto, wasɛnɛ lo yoho yɔtɔnɛ la nyuma lo ndjela kanyi yaki Nzambi.
7 Ekomelo k’akambo tshɛ kambosukana. Ɔnkɔnɛ, nyoyale la yimba y’ɔlɔlɔ+ ndo nyambalɛke* dia nɔmbaka.+
8 Laadiko di’akambo tshɛ, nyonge la ngandji k’efula lam’asanyu,+ nɛ dia ngandji kombaka lokema la pɛkato.+
9 Nyolongɔnake lam’asanyu aha l’engunungunu.+
10 Lo yɛdikɔ yakalongola onto l’onto losha, nyokambe la lɔ dia kimanyiyana oko wenyu alami w’eshika w’ɔlɔlɔ waheyama mbɛdika waki Nzambi wakɛnɛmɔma lo toho totshikitanyi.+
11 Naka onto ɔmɔtshi ekɔ lo ntɛkɛta, nde asale dui sɔ oko onto lata awui w’oma le Nzambi. Naka onto ekɔ lo kimanyiyana, nde asale dui sɔ oko onto lendɛ oma lo wolo washana+ Nzambi, dia Nzambi tombɔma+ lo akambo tshɛ lo tshimbo ya Yeso Kristo. Lotombo ndo wolo wayalake le nde pondjo pondjo! Aamɛɛ.
12 Analengo wa ngandji, tanyambake dikambo dia ehemba wa wolo oko dja wahomana la nyu+ oko dikambo di’oyoyo kambonyokomɛ.
13 Koko nyɔngɛnangɛnake+ lo woho wasowanyu asui akɔ waamɛ wakasowe Kristo,+ dia nyu ndjɔngɛnangɛna ndo ndjoleka ngɛnangɛna lam’ayoshɔma lotombo lande.+
14 Naka wekɔ lo ntɛkɛta kɔlɔ dikambo dianyu* l’ɔtɛ wa lokombo la Kristo, kete nyekɔ l’ɔngɛnɔngɛnɔ,+ nɛ dia dui sɔ mɛnyaka dia nyekɔ la nyuma ka lotombo, ɛɛ, nyuma kaki Nzambi.
15 Koko, ndooko onto l’atei anyu lahomba nsowa oko ondjakanyi kana oko wovi kana oko otshi wa kɔlɔ kana oko onto layatambiya l’akambo a kana.+
16 Naka onto ɔmɔtshi ekɔ lo nsowa l’ɔtɛ wende Okristo, nde atokake nsɔnyi,+ koko atetemale ntombola Nzambi etena kɛmbande lokombo lɔsɔ.
17 Nɛ dia etena kakashikikɛma ka kilombo ntatɛ lo luudu la Nzambi+ kambokoka. Ko naka tɔ ntatɛ le so,+ kakɔna kayokomɛ wanɛ wahakitanyiya lokumu l’ɔlɔlɔ laki Nzambi+ na?
18 “Ndo naka onto ɔlɔlɔ pombaka nsala la wolo dia nde shimbamɛ, kakɔna kayokomɛ onto a kɔlɔ ndo otshi wa pɛkato+ na?”
19 Ɔnkɔnɛ, wanɛ wasoyama lo woho wasalawɔ lolango laki Nzambi watetemale ndjakimɔ* le Otungi wa kɔlamelo etena kasalawɔ kɛnɛ kele ɔlɔlɔ.+
Nɔtɛ ka l'ɛse ka dikatshi
^ Kana “yɛdikɔ; ndjashikikɛ.”
^ Kana “etsha wa lɔkɛwɔ laha la nsɔnyi.” Tshɛkɛta ya lo Grɛkɛ a·selʹgei·a lo efula. Enda Elembetshielo.
^ Kana “lo ɛngɛnɔngɛnɔ wa kɔlɔ.”
^ Kana “nyɔsɛnake; nyosungukalake.”
^ Kana “wekɔ lo nyɔtɛnga.”
^ Kana “nkimɔ anima awɔ.”
