2 Ɛkɔndɔ 1:1-17
1 Sɔlɔmɔna ɔna Davidɛ akatalekaka nkeketsha lowandji lande ndo Jehowa Nzambi kande aki kaamɛ la nde ndo akawetɛ woke lo yɛdikɔ y’efula.+
2 Sɔlɔmɔna akatome dui dia telɛ ase Isariyɛlɛ tshɛ, ewandji w’anto nunu nunu ndo w’anto nkama nkama, toshushi ndo ewandji tshɛ wa l’Isariyɛlɛ, ɛtɛ wa nkumbo ya washɛwɔ.
3 Ko Sɔlɔmɔna nde l’etshumanelo k’otondo wakatshu otsha lo dihole dia la diko dia la Ngibiyɔna,+ nɛ dia lɛkɔ mbaki luudu la dipɛma l’esanganelo la Nzambi ka mɛtɛ lakasale Mɔsɛ okambi wa Jehowa l’oswe wa shɛnga.
4 Koko Davidɛ akatɔsa Ɔshɛtɛ wa Nzambi ka mɛtɛ oma la Kiriatɛ-Jarima,+ ko mbela lo dihole diakalɔngɔsɔla Davidɛ dikambo diawɔ; nde akake luudu la dipɛma dikambo diawɔ la Jɛrusalɛma.+
5 Ndo elambwelo+ ka nkonga kakasale Bɛzalɛlɛ+ ɔna Uri ɔna Hura kakakitshama la ntondo ka tabɛrnaklɛ ka Jehowa. Ko Sɔlɔmɔna nde l’etshumanelo wakalɔmbaka la ntondo katɔ.*
6 Oma laasɔ, Sɔlɔmɔna akalambola elambo laawɔ la ntondo ka Jehowa, ndo nde akalambola elambo wa lotshumba kinunu (1 000) lo elambwelo ka nkonga+ ka lo luudu la dipɛma l’esanganelo.
7 L’otsho ɔsɔ, Nzambi akɛnama le Sɔlɔmɔna ko akawotɛ ate: “Ɔnɔmbɛ kɛnɛ kalangayɛ dimi kosha.”+
8 Ko Sɔlɔmɔna akatɛ Nzambi ate: “Wɛ akɛnya ngandji k’efula ka kɔlamelo le Davidɛ+ papa ndo wɛ ambombetɛ nkumekanga lo dihole diande.+
9 Jehowa Nzambi le, wonya ɔnɛ, aya wɛ nkotsha daka+ diakayalake Davidɛ papa, nɛ dia wɛ ambombidja nkumekanga ka wodja wele l’anto efula oko nsɛkɛ ya ditshu dia nkɛtɛ.+
10 Ombisha lomba ndo ewo+ ka nɔmbɔla wodja ɔnɛ,* nɛ dia, akɔna akoka nombosha wodja ayɛ wa woke ɔnɛ?”+
11 Ko Nzambi akatɛ Sɔlɔmɔna ate: “Lam’ele kɛsɔ mbakombola otema ayɛ ndo wɛ hanɔmbi lomombo, ɔngɔnyi ndo kɛnɛmɔ kana nyɔi* ka wanɛ wakohetsha, ndo wɛ hanɔmbi lɔsɛnɔ l’otale,* koko wɛ ambɔlɔmba lomba ndo ewo ka nombosha wodja ami wamomoketɛ nkumekanga kawɔ,+
12 wɛ ayolongola lomba ndo ewo; koko dimi layokosha ndo lomombo, ɔngɔnyi ndo kɛnɛmɔ woho wele ndooko nkumekanga kaki la ntondo kayɛ kana kayonga l’ɔkɔngɔ ayɛ kayonga ngasɔ.”+
13 Ko Sɔlɔmɔna akaye oma lo dihole dia la diko dia la Ngibiyɔna,+ oma la ntondo ka luudu la dipɛma l’esanganelo oya la Jɛrusalɛma; ndo nde akolɛ Isariyɛlɛ.
14 Sɔlɔmɔna akatetemala mɔtshanya pusupusu ndo mfalasa.* Nde aki la pusupusu kinunu la nkama nyɛi (1 400) ndo mfalasa*+ nunu dikumi la pende (12 000), ko nde akayilame lo esomba+ wa pusupusu ndo la Jɛrusalɛma+ suke la nkumekanga.
15 Nkumekanga akakonya mfɛsa ndo paonyi efula oko mbɔkɔ+ la Jɛrusalɛma ndo abaya w’olondo efula oko esongo wa lokumu wele la Shɛfɛla.+
16 Wakatoya la mfalasa yaki Sɔlɔmɔna oma l’Edjibito+ ndo olui w’amundji w’okanda waki nkumekanga wakakondjaka nyemba ya mfalasa* lo oshinga ɔtɔi.+
17 Pusupusu tshɛ kakawela oma l’Edjibito kaki la oshinga wa ekenga 600 wa mfɛsa, ndo mfalasa 1 kaki la oshinga wa 150. Ko vɔ wakayitomaka le nkumi ya dikanga tshɛ y’ase Hiti ndo nkumi ya dikanga ya Suriya.
Nɔtɛ ka l'ɛse ka dikatshi
^ Kana “wakambolaka Nzambi kanyi laawɔ.”
^ Tshɛk., “ntomba la ntondo ka wodja ɔnɛ ndo mbɔtɔ.”
^ Kana “anima.”
^ Tshɛk., “nshi efula.”
^ Kana “ambahemi wa mfalasa.”
^ Kana “ambahemi wa mfalasa.”
^ Kana ondo “oma l’Edjibito ndo oma la Kue; amundji w’okanda waki nkumekanga wakayisombaka oma la Kue,” ondo lo ntɛkɛta dikambo dia Kilikiya.
