2 Ɛkɔndɔ 10:1-19
-
Ɔtɔmbɔkwɛlɔ w’ase Isariyɛlɛ otsha le Rɛhɔbɔama (1-19)
10 Rɛhɔbɔama akatshu la Shɛkɛmɛ,+ nɛ dia ase Isariyɛlɛ tshɛ wakaye la Shɛkɛmɛ dia ndjowetɛ nkumekanga.+
2 Kam’akoke Jɛrɔbɔama+ ɔna Nebatɛ dui sɔ (laasɔ ko nde eke l’Edjibito, nɛ dia nde akalawɔ l’ɔtɛ wa nkumekanga Sɔlɔmɔna),+ Jɛrɔbɔama akakalola oma l’Edjibito.
3 Oma laasɔ, vɔ wakatome dui dia towelɛ, ko Jɛrɔbɔama nde l’ase Isariyɛlɛ tshɛ wakaye le Rɛhɔbɔama ndo wakawotɛ vate:
4 “Shɔ aketɛ osembe aso wotsho.+ Ko naka wɛ tokitshɛkitshɛ olimu wa wolo wakatokandjaka shɔ ndo wɛ tɔlɛndjɛlɛndjɛ wotsho* w’osembe wakandatɛndja, kete sho tayokokambɛ.”
5 Ko nde akawatɛ ate: “Kanyoye le mi l’ɔkɔngɔ wa nshi 3.” Ɔnkɔnɛ wodja wakatshu.+
6 Oma laasɔ, nkumekanga Rɛhɔbɔama akasawola l’epalanga w’anto* wakakambɛka Sɔlɔmɔna ka she etena kakinde eke la lɔsɛnɔ ate: “Dako diakɔna diayonyombisha lo woho wahombami nkadimola wodja?”
7 Vɔ wakookadimola vate: “Naka wɛ monga onto ɔlɔlɔ le anto anɛ ndo wɛ mbangɛnyangɛnya ko wɛ mbasha okadimwelo wa dimɛna, kete vɔ wayongaka nshi tshɛ ekambi ayɛ.”
8 Koko nde akatone dako diakawosha epalanga w’anto,* ko akatosawola nde l’ɛlɔngɔ w’apami wakole kaamɛ la nde ndo wakayonga ekambi ande.+
9 Nde akawambola ate: “Dako diakɔna diayonyosha lo woho wahombaso nkadimola anto anɛ wakanɔmbɛ vate: ‘Kitshakitsha wotsho w’osembe wakatɛndja shɔ’?”
10 Ɛlɔngɔ w’apami wakole kaamɛ la nde wakawotɛ vate: “Nganɛ kahombayɛ mbutɛ anto wakakotɛ vate: ‘Shɔ aketɛ osembe aso wotsho, koko wɛ pombaka tokitshɛkitshɛ wotsho awɔ’; wɛ pombaka mbatɛ wate: ‘Lohita lami la tshungutshungu layoleka lokende la papa woke.
11 Papa akanyahɛ osembe wa wotsho, koko dimi layahɛ wotsho okina laadiko di’osembe anyu. Papa akanyoshaka dilanya la mfimbɔ y’esongo, koko dimi layosala dui sɔ la mfimbɔ yele la mbolo lo tokoma.’”
12 Jɛrɔbɔama nde l’anto tshɛ wakaye le Rɛhɔbɔama lushi la 3, oko wakate nkumekanga ate: “Kanyoye le mi lushi la 3.”+
13 Koko nkumekanga akaakadimola la ngala. Ɔnkɔnɛ nkumekanga Rɛhɔbɔama akatone dako di’epalanga w’anto.*
14 Nde akaakadimola lo ndjela dako di’ɛlɔngɔ w’apami ate: “Dimi layosala di’osembe anyu ndeka monga wotsho ndo layahɛ wotsho okina laadiko diawɔ. Papa akanyoshaka dilanya la mfimbɔ y’esongo, koko dimi layosala dui sɔ la mfimbɔ yele la mbolo lo tokoma.”
15 Ɔnkɔnɛ nkumekanga kompokamɛ kɛnɛ kakawotɛ wodja, nɛ dia Nzambi+ ka mɛtɛ kakasale dia akambo salema ngasɔ dia nkotsha ɔtɛkɛta wakate Jehowa lo tshimbo ya Ahidja+ ose Shilo lo dikambo dia Jɛrɔbɔama ɔna Nebatɛ.
16 Lam’ele nkumekanga akatone mbahokamɛ, ase Isariyɛlɛ tshɛ lo wedi awɔ wakakadimola nkumekanga vate: “Kakɔna kele laso le Davidɛ? Sho ndooko l’etenyi k’okitɔ le ɔna Jɛse. Isariyɛlɛ le, nyotshu le tozambizambi tanyu. Davidɛ le,+ endaka akambo wa luudu layɛ hita!” Ko ase Isariyɛlɛ wakakalola lawakawɔ.*+
17 Koko Rɛhɔbɔama akatetemala mbolɛ ase Isariyɛlɛ wakadjasɛka lo esomba wa la Juda.+
18 Oma laasɔ, nkumekanga Rɛhɔbɔama+ akatome Hadɔrama* laki owandji wa wanɛ wakakambaka elimu la wolo, koko ase Isariyɛlɛ wakawoke ave polo nde mvɔ. Nkumekanga Rɛhɔbɔama akalange mbahema lo pusupusu kande dia ndawɔ otsha la Jɛrusalɛma.+
19 Ko ase Isariyɛlɛ wakatɔmbɔkwɛ luudu la Davidɛ polo ndo ɛlɔ.
Nɔtɛ ka l'ɛse ka dikatshi
^ Kana “sui.”
^ Kana “dikumanyi.”
^ Kana “dikumanyi.”
^ Kana “dikumanyi.”
^ Tshɛk., “lo mvudu y’apɛma.”
