2 Ɛkɔndɔ 11:1-23
11 Lam’akakome Rɛhɔbɔama la Jɛrusalɛma, mbala kakɔ ɔtɔi nde akasanganya luudu la Juda ndo dioho dia Bɛnjamina,+ andɔshi wa ta wakalowanyema* nunu lokama l’akumi enanɛi (180 000) dia ndɔsha ase Isariyɛlɛ la oyango wa nkaloya diolelo le Rɛhɔbɔama.+
2 Ko ɔtɛkɛta wa Jehowa wakaye le Shemaya,+ okambi wa Nzambi ka mɛtɛ ɔnɛ:
3 “Tɛ Rɛhɔbɔama ɔna Sɔlɔmɔna nkumekanga ka Juda ndo ase Isariyɛlɛ tshɛ wele la Juda ndo la Bɛnjamina wate:
4 ‘Jehowa kata ate: “Tanyotshɔke ndo tanyɔlɔshake anangɛnyu. Onto l’onto l’atei anyu akalole lakande, nɛ dia dimi kakasale dia dui nɛ salema.”’”+ Ɔnkɔnɛ vɔ wakakitanyiya ɔtɛkɛta wa Jehowa ko wakakalola ndo vɔ kotshɔ dia tɔlɔsha Jɛrɔbɔama.
5 Rɛhɔbɔama akadjasɛ la Jɛrusalɛma ndo akake esomba wodingami la mpele la Juda.
6 Ko nde akake* Bɛtɛlɛhɛma,+ Etamɛ, Tekoa,+
7 Bɛtɛ-Zurɛ, Sɔkɔ,+ Adulama,+
8 Ngata,+ Maresha, Zifu,+
9 Adɔrayima, Lakishi,+ Azeka,+
10 Zɔra, Aidjalɔna+ ndo Hɛbɛrɔna,+ esomba wodingami la mpele waki la Juda ndo la Bɛnjamina.
11 Ndo nto, nde akakeketsha ahole akɔ, akakitsha ɛnɔmbɔdi w’asɔlayi lɛkɔ ndo akawashaka mbo ya ndɛ, esɔ ndo wanu,
12 ndo nde akatome dingawo dia weke la akɔnga lo esomba akɔ tshɛ; nde akaakeketsha lo yɛdikɔ y’efula. Ko Juda la Bɛnjamina wakatetemala monga lo wedi ande.
13 Ɛlɔmbɛdi ndo ase Lɛwi waki lo Isariyɛlɛ w’otondo wakemala kaamɛ la nde wakatombe oma lo bɛtshi diawɔ dia nkɛtɛ tshɛ.
14 Ase Lɛwi wakatshike ahole awɔ+ wa ndeshaka dongalonga ndo diangɔ diawɔ, ko wakaye la Juda ndo la Jɛrusalɛma, nɛ dia Jɛrɔbɔama nde l’anande wakaashimbe diaha vɔ kambɛ Jehowa+ oko ɛlɔmbɛdi.
15 Ko Jɛrɔbɔama akasɔnɛ ɛlɔmbɛdi ande hita dikambo dia ahole wa la diko,+ dikambo dia ɛdiɛngɛ wele oko mbudi,*+ ndo dikambo dia tana ta ngɔmbɛ takandasale.+
16 Ko anto w’oma lo waoho tshɛ w’Isariyɛlɛ wakashikikɛ etema awɔ dia nyanga Jehowa Nzambi k’Isariyɛlɛ wakaayele la Jɛrusalɛma dia tolambola Jehowa Nzambi ka watshɛwɔ elambo.+
17 L’edja k’ɛnɔnyi 3, vɔ wakakeketsha lowandji la Juda ndo wakasukɛka Rɛhɔbɔama ɔna Sɔlɔmɔna, nɛ dia vɔ wakakɛndakɛndaka lo mboka ka Davidɛ nde la Sɔlɔmɔna l’edja k’ɛnɔnyi 3.
18 Oma laasɔ, Rɛhɔbɔama akatshuke Mahalata, ɔna Jerimɔtɛ la womoto ɔna Davidɛ ndo Abihayilɛ, ɔna Eliyabɛ+ la womoto ɔna Jɛse.
19 L’ɔkɔngɔ diko, nde akote la nde ana w’apami anɛ: Jeushɛ, Shemariya ndo Zahama.
20 Laadiko diande, nde akatshuke ndo Maaka, okana wa Abisalɔma.+ L’ɔkɔngɔ diko, nde akote la nde Abidja,+ Atai, Ziza ndo Shelomita.
21 Rɛhɔbɔama akalangaka Maaka okana w’Abisalɔma oleki wadiɛnde akina tshɛ la eseka ande,+ nɛ dia nde akatshuke wadi 18 ndo aki la eseka 60; nde akote ana w’apami 28 ndo ana wa wamato 60.
22 Ko Rɛhɔbɔama akasɔnɛ Abidja ɔna Maaka oko owandji ndo ɔnɔmbɔdi w’anango, nɛ dia nde akasangoyaka dia ndjowetɛ nkumekanga.
23 Koko nde akasale akambo la yimba, ko akatome* anande w’apami amɔtshi lo bɛtshi dia nkɛtɛ tshɛ dia la Juda ndo dia Bɛnjamina, lo esomba tshɛ+ wakadingama la mpele ko akawashaka mbo ya ndɛ efula ndo akaatshukɛ wadi efula.
Nɔtɛ ka l'ɛse ka dikatshi
^ Tshɛk., “wakasɔnama.”
^ Kana “akake mpele.”
^ Tshɛk., “mbudi.”
^ Kana “akahandjola.”
