2 Ɛkɔndɔ 12:1-16
12 Yema tshitshɛ l’ɔkɔngɔ wa lowandji laki Rɛhɔbɔama shikikɛma+ wolo ndo wa nde monga la wolo, nde akanya Ɛlɛmbɛ wa Jehowa+ yimba ndo Isariyɛlɛ w’otondo wakasale oko nde.
2 L’ɔnɔnyi wa 5 w’ɛlɔmbwɛlɔ ka nkumekanga Rɛhɔbɔama, Shishakɛ+ nkumekanga k’Edjibito akaye dia ndjɔlɔsha Jɛrusalɛma, nɛ dia vɔ wakashisha kɔlamelo yawɔ le Jehowa.
3 Nde aki la pusupusu kinunu la nkama hiende (1 200), ambahemi wa mfalasa nunu akumi asamalo (60 000), ndo elui w’asɔlayi waheyama mbadia wakaye la nde oma l’Edjibito, ase Libiya, waa Sukima ndo ase Etiyɔpiya.+
4 Nde akɔshi esomba wakadingama la mpele wa la Juda ndo akatokoma la Jɛrusalɛma.
5 Omvutshi Shemaya+ akaye le Rɛhɔbɔama nde la ewandji wa Juda wakasangana la Jɛrusalɛma l’ɔtɛ wa Shishakɛ, ko nde akawatɛ ate: “Jehowa kata ate: ‘Nyu nyambomboka ɔkɔngɔ, ɔnkɔnɛ dimi lawɔ lambonyoka ɔkɔngɔ+ lo nyokimɔ lo anya wa Shishakɛ.’”
6 Ko ewandji wa l’Isariyɛlɛ vɔ la nkumekanga wakayakitshakitsha+ ndo wakate vate: “Jehowa ekɔ la losembwe.”
7 Lam’akɛnyi Jehowa dia vɔ wamboyakitshakitsha, ɔtɛkɛta wa Jehowa wakaye le Shemaya ndjowotɛ ɔnɛ: “Vɔ wamboyakitshakitsha. Ɔnkɔnɛ, dimi hantowalanya,+ ndo keema edja dimi layanga mbatshungola. Dimi hantotshola nkɛlɛ kami la Jɛrusalɛma lo tshimbo ya Shishakɛ.
8 Koko vɔ wayoyala ekambi ande, kele kaweye otshikitanu wele lam’asa kambɛmi la kambɛ nkumi ya dikanga* ya wedja ekina.”
9 Ko Shishakɛ nkumekanga k’Edjibito akaye dia ndjɔlɔsha Jɛrusalɛma. Nde akɔshi diangɔ dia nɛmɔ dia lo luudu la Jehowa+ ndo diangɔ dia nɛmɔ dia lo luudu* la nkumekanga. Nde akɔshi diangɔ tshɛ, mbidja ndo dingawo dia paonyi diakasale Sɔlɔmɔna.+
10 Ko nkumekanga Rɛhɔbɔama akasale dingawo dia nkonga dia dihɛnya ko nde akadisha ewandji w’alami* wakalamaka soko dia luudu la nkumekanga.
11 Etena tshɛ kakayaka nkumekanga lo luudu la Jehowa, alami wakɔtɔka, wakadiɛmbaka ko oma laasɔ, vɔ wakadikaloyaka lo luudu l’alami.
12 Lam’ele nkumekanga akayakitshakitsha, nkɛlɛ ka Jehowa kakamɔ oma le nde,+ ko nde kombalanya tshɛ lo tshɛ.+ Ndo nto, awui amɔtshi w’ɛlɔlɔ waki la Juda.+
13 Nkumekanga Rɛhɔbɔama akakeketsha lowandji lande la Jɛrusalɛma ndo akatetemala mbolɛ; Rɛhɔbɔama aki l’ɛnɔnyi 41 lam’akandayala nkumekanga ndo nde akolɛ l’edja k’ɛnɔnyi 17 la Jɛrusalɛma, osomba wakasɔnama oma le Jehowa l’atei wa waoho tshɛ w’Isariyɛlɛ oko dihole dia nkitsha lokombo lande. Nyango nkumekanga Rɛhɔbɔama lokombo lande Naama, ose Amɔna.+
14 Koko nde akasalaka kɛnɛ kaki kɔlɔ, nɛ dia nde kondjashikikɛ lo otema ande dia nyanga Jehowa.+
15 Lo kɛnɛ kendana l’ɔkɔndɔ wa Rɛhɔbɔama, oma l’etatelo polo l’ekomelo kawɔ, shi awui asɔ fundama l’atei w’ɛtɛkɛta w’omvutshi Shemaya+ ndo wa Ido+ ɔmɛnyi wa waɛnɛlɔ lo ɔkɔndɔ w’ɔlɔndji? Ata wakongaka tena tshɛ lam’asa Rɛhɔbɔama nde la Jɛrɔbɔama.+
16 Oma laasɔ, Rɛhɔbɔama aketama dia momuya kaamɛ la watshɛnde ndo wakookundɛ l’Osomba wa Davidɛ;+ ko ɔnande Abidja+ akayala nkumekanga lo dihole diande.
