2 Ɛkɔndɔ 13:1-22
13 L’ɔnɔnyi wa 18 w’ɛlɔmbwɛlɔ ka nkumekanga Jɛrɔbɔama, Abidja akayala nkumekanga ka Juda.+
2 Nde akolɛ l’edja k’ɛnɔnyi 3 la Jɛrusalɛma. Nyango lokombo lande Mikaya,*+ ɔna Uriyɛlɛ ose Ngibɛa.+ Ndo nto, ta diaki lam’asa Abidja nde la Jɛrɔbɔama.+
3 Ko Abidja akatshu l’asɔlayi wa wolo, andɔshi wa ta wakalowanyema* nunu nkama nyɛi (400 000). Jɛrɔbɔama nde lawɔ kaamɛ l’apami wakalowanyema,*+ andɔshi wa ta wa wolo nunu nkama enanɛi (800 000) wakatɔlɔngama dia ndɔ la nde.
4 Ko Abidja akatemala lo Dikona dia Zemarayima diele lo lɛkɛ l’akona la Efrayimɛ ko akate ate: “Wɛ Jɛrɔbɔama ndo Isariyɛlɛ w’otondo le, nyompokame.
5 Onde nyu hanyeye dia Jehowa Nzambi k’Isariyɛlɛ akasha Davidɛ nde l’anande+ diolelo lo Isariyɛlɛ pondjo pondjo+ lo ekimanyielo ka sheke ya lɛɛhɔ?*+
6 Koko Jɛrɔbɔama+ ɔna Nebatɛ, okambi wa Sɔlɔmɔna ɔna Davidɛ akatombe, ko akatɔmbɔkwɛ nkumɛnde.+
7 Ko akanga wa dinginya, anto w’anyanya wakatetemala ntshumana lalende. Vɔ wakaleke Rɛhɔbɔama ɔna Sɔlɔmɔna etena kaki Rɛhɔbɔama dikɛnda ndo kakinde yɔmɔma, ndo nde kokoka nshika ekolo la ntondo kawɔ.
8 “Laasɔ wonya ɔnɛ, nyu nyɔɔfɔnya dia nyu kokoka ndɔshana la diolelo dia Jehowa diele lo anya w’ana w’apami wa Davidɛ dikambo nyu nyekɔ olui wa woke ndo nyekɔ la tana ta ngɔmbɛ ta paonyi takanyosalɛ Jɛrɔbɔama oko tozambizambi.+
9 Shi nyambotshanya ɛlɔmbɛdi wa Jehowa,+ tokanula ta Arɔna kaamɛ ndo ase Lɛwi, ndo nyamboyasɔnɛ ɛlɔmbɛdi anyu hita oko ase wedja ekina?+ Onto tshɛ lakayaka la* ɔsɔngɔ wa ngɔmbɛ ndo la ɛkɔkɔ wa waomi 7 akakoke monga ɔlɔmbɛdi wa diangɔ diele bu kaanga tozambizambi.
10 Koko sho, Jehowa kele Nzambi+ kaso ndo sho hatowoki ɔkɔngɔ; ɛlɔmbɛdi aso, tokanula ta Arɔna wekɔ lo kambɛ Jehowa ndo ase Lɛwi wekɔ lo mbisha lonya l’olimu.
11 Vɔ wekɔ lo tshumbɛ Jehowa elambo wa lotshumba pindju tshɛ ndo dikɔlɔ tshɛ+ kaamɛ la tshɔ+ y’opumu ndo mapa wa lahatanya*+ wekɔ lo mɛsa wa paonyi ka pudipudi, ndo vɔ wekɔ lo mpɛtsha atala wele lo ekundji ka tala ka paonyi+ dikɔlɔ tshɛ,+ nɛ dia sho tekɔ lo nkotsha ɔkɛndɛ aso le Jehowa Nzambi kaso; koko nyu nyambowoka ɔkɔngɔ.
12 Nyolonge, Nzambi ka mɛtɛ ekɔ kaamɛ la so, ekɔ lo tɔlɔmbɔla, kaamɛ la ɛlɔmbɛdi ande wele l’amama wa mbidaka ombeka wa nyɔlɔsha ta. Ase Isariyɛlɛ le, tanyɔlɔshanake la Jehowa Nzambi ka watshɛnyu, nɛ dia hanyototondoya.”+
13 Koko Jɛrɔbɔama akatome anto dia toholama dia mbatombɛ oma l’ɔkɔngɔ, ko vɔ wakayala la ntondo ka Juda ndo wanɛ wakaholama waki l’ɔkɔngɔ awɔ.
14 Lam’akakadimɔ apami w’ase Juda, vɔ wakɛnyi dia vɔ pombaka ndɔsha oma la ntondo ndo oma l’ɔkɔngɔ. Ko vɔ wakatatɛ ndelɛ Jehowa+ etena kakadaka ɛlɔmbɛdi amama la wolo.
15 Apami w’ase Juda wakade kioko ya ta, ndo lam’akade apami w’ase Juda kioko ya ta, Nzambi ka mɛtɛ akalɛndja Jɛrɔbɔama nde l’ase Isariyɛlɛ tshɛ la ntondo ka Abidja nde l’ase Juda.
16 Ase Isariyɛlɛ wakalawɔ oma la ntondo k’ase Juda ndo Nzambi akaakimɔ lo anya awɔ.
17 Abidja nde l’anto ande wakaadiake lo yɛdikɔ y’efula, ko edo nunu nkama tshanu (500 000) w’andɔshi wa ta wakalowanyema* w’ase Isariyɛlɛ wakakalema kalakala.
18 Ɔnkɔnɛ, apami w’ase Isariyɛlɛ wakashama nsɔnyi l’etena kɛsɔ, koko apami w’ase Juda wakaaleke wolo, nɛ dia vɔ wakayaɛkɛ le Jehowa Nzambi ka watshɛwɔ.+
19 Abidja akatetemala ndjelana la Jɛrɔbɔama ndo akɔɔhɔtɔla esomba ɛnɛ: Bɛtɛlɛ+ la tosombasomba tendɛ le tɔ,* Jeshana la tosombasomba tendɛ le yɔ, ndo Efarayina+ la tosombasomba tendɛ le wɔ.
20 Lo nshi ya Abidja, Jɛrɔbɔama komonga la wolo waki la nde ntondo; oma laasɔ Jehowa akɔɔkɔmɔla ko nde akavu.+
21 Koko Abidja akatalekaka monga la wolo. L’ɔkɔngɔ diko, nde akatshuke wadi 14+ ko akote ana w’apami 22 ndo ana wa wamato 16.
22 Etenyi kekina k’ɔkɔndɔ wa Abidja, kɛnɛ kakandasale ndo ɛtɛkɛta ande fundama lo efundelo* w’omvutshi Ido.+
Nɔtɛ ka l'ɛse ka dikatshi
^ Tshɛk., “wakasɔnama.”
^ Tshɛk., “wakasɔnama.”
^ Mbuta ate sheke ya pondjo ndo yahatshikitana.
^ Tshɛk., “lakaye ndjolodia anya ande la.”
^ Mbuta ate mapa wa lɛɛnya.
^ Tshɛk., “wakasɔnama.”
^ Kana “tosukanyi la tɔ.”
^ Kana “elembetshielo; kɔmatɛrɛ.”
