2 Ɛkɔndɔ 14:1-15
14 Oma laasɔ, Abidja aketama dia momuya kaamɛ la watshɛnde, ndo wakookundɛ l’Osomba wa Davidɛ,+ ko ɔnande Asa akayala nkumekanga lo dihole diande. Lo nshi yande, wodja wakayala la momuya l’edja k’ɛnɔnyi 10.
2 Asa akasalaka kɛnɛ kaki ɔlɔlɔ ndo kosembwe lo washo wa Jehowa Nzambi kande.
3 Nde akanya dilambwelo+ di’ase wedja ekina ndo ahole wa la diko; nde akaatshatsha dimɛta dia l’ave+ ndo akahendjahendja dimɛta dia l’esongo.*+
4 Ndo nto, nde akatɛ ase Juda dia nyanga Jehowa Nzambi ka watshɛwɔ ndo dia nkitanyiya Ɛlɛmbɛ la wadjango.
5 Ɔnkɔnɛ, nde akanya ahole wa la diko ndo dilambwelo dia tshɔ+ oma l’esomba tshɛ wa la Juda, ndo lo ɛlɔmbwɛlɔ kande, diolelo diakatshikala ki aha la ofukutanu.
6 Nde akake esomba wodingami la mpele la Juda+ lam’ele wodja komonga la ofukutanu ndo ndooko onto lakɔɔlɔsha lo ɛnɔnyi ɛsɔ, nɛ dia Jehowa akawosha momuya.+
7 Nde akatɛ ase Juda ate: “Nyɛsɔ toke esomba akɔ kele taadinge la mpele ndo la totshoto,+ nkuke ndo tokengete. Nɛ dia wodja weke lo anya aso dikambo sho takayange Jehowa Nzambi kaso. Sho takayange, ko nde ambotosha momuya lo wedi akɔ tshɛ.” Ɔnkɔnɛ vɔ wakatondoya olimu wa wokelo.+
8 Asa aki l’asɔlayi wakakengama l’apami nunu nkama shato (300 000) w’oma la Juda waki la dingawo dia weke ndo la akɔnga. Oma laka Bɛnjamina, andɔshi wa ta wa wolo nunu nkama hiende l’akumi enanɛi (280 000) wakɛmbaka dingawo dia totshitshɛ* ndo waki la eta.*+
9 L’ɔkɔngɔ diko, Zera ose Etiyɔpiya akaye kaamɛ l’asɔlayi waki l’apami miliyɔ ɔtɔi (1 000 000) ndo pusupusu+ 300 dia ndjaalɔsha. Lam’akandakome la Maresha,+
10 Asa akatombe dia ndjɔlɔ la nde, ko vɔ wakalɔngama dia ndɔ ta lo Okidi wa Zɛfata suke la Maresha.
11 Oma laasɔ, Asa akalɔmbɛ Jehowa Nzambi+ kande ate: “Jehowa le, le yɛ bu ohomba dia wanɛ wakimanyiyayɛ monga efula kana monga la wolo.+ Jehowa Nzambi kaso le, otokimanyiya nɛ dia tamboyaɛkɛ le yɛ,+ ndo lo lokombo layɛ kambotoya dia ndjɔlɔsha olui w’anto ɔnɛ.+ Jehowa le, wɛ kele Nzambi kaso. Tetawɔke dia onto okovɔ koleka wolo.”+
12 Ko Jehowa akalɛndja ase Etiyɔpiya la ntondo ka Asa ndo la ntondo k’ase Juda, ko ase Etiyɔpiya wakalawɔ.+
13 Asa nde l’anto waki kaamɛ la nde wakayelana la wɔ polo la Ngɛrara,+ ko wakatetemala ndjaka ase Etiyɔpiya polo ndo ndooko onto l’atei awɔ lakatshikala la lɔsɛnɔ, nɛ dia vɔ wakatɛtshatɛtshama oma le Jehowa ndo oma le alembe ande. L’ɔkɔngɔ wa laasɔ, vɔ wakɔshi diangɔ dia dimbo efula ka mamba.
14 Ndo nto, vɔ wakalanya esomba tshɛ wakadinge Ngɛrara, nɛ dia vɔ wakandama la wɔma wa Jehowa; ndo vɔ wakambe diangɔ dia l’esomba akɔ tshɛ dikambo diangɔ dia vɔ mimba diaki efula.
15 Vɔ wakatshu tɔlɔsha ndo lo mvudu y’apɛma ya wanɛ wakalamaka dongalonga, ko wakɔshi ɛkɔkɔ la kamɛlɔ lo yɛdikɔ y’efula, ndo l’ɔkɔngɔ wa laasɔ, vɔ wakakalola la Jɛrusalɛma.
Nɔtɛ ka l'ɛse ka dikatshi
^ Enda Elembetshielo.
^ Tshɛk., “ndo wakanɛka ota.”
^ Mbala efula, amboki w’eta mbakɛmbaka dingawo dia totshitshɛ sɔ.
