2 Ɛkɔndɔ 15:1-19
-
Etshikitanu wakasale Asa (1-19)
15 Nyuma ka Nzambi kakaye le Azariya ɔna Ɔdɛdɛ.
2 Ko nde akatshu tɛnana la Asa ndo akawotɛ ate: “Asa le, ompokame wɛ l’ase Juda tshɛ ndo aseka Bɛnjamina! Jehowa ayongaka kaamɛ la nyu edja tshɛ kayonyotshikalaka kaamɛ la nde;+ ndo naka nyu mboyanga, nde ayoyashola le nyu,+ ko naka nyu mbooka ɔkɔngɔ, nde ayonyoka ɔkɔngɔ.+
3 L’etena k’otale,* Isariyɛlɛ komonga la Nzambi ka mɛtɛ, komonga la ɔlɔmbɛdi wawaetsha ndo komonga la ɛlɛmbɛ.+
4 Koko lam’akawakalola le Jehowa Nzambi k’Isariyɛlɛ lo asui awɔ ndo lam’akawooyange, nde akayashola le wɔ.+
5 Lo nshi shɔ, ndooko onto lakakokaka mɛngɔla lo wɔladi,* nɛ dia momuya komonga ndooko yema le anto tshɛ wodjashi lo wedja.
6 Wodja wakalanyemaka oma le wodja okina ndo osomba ɔmɔtshi oma le osomba okina, nɛ dia Nzambi akawadje lo lofunge kaamɛ la weho tshɛ w’asui.+
7 Koko nyu, nyokeketale ndo tanyɔkɔmɔke,*+ nɛ dia nyayofutama l’ɔtɛ wa kɛnɛ kasalanyu.”
8 Kam’akoke Asa awui asɔ ndo prɔfɛsiya kaki omvutshi Ɔdɛdɛ, nde akayala la dihonga ndo akanya dikishi dia nyɛtɛɛtɛ oma lo ɛtshi ka nkɛtɛ k’otondo ka Juda+ ndo ka Bɛnjamina, ndo oma lo esomba wakandɔshi lo lɛkɛ l’akona la Efrayimɛ, ko nde akakaloya elambwelo ka Jehowa kaki la ntondo ka tshoto y’otale ya lo luudu la Jehowa.+
9 Nde akasanganya Juda y’otondo ndo Bɛnjamina la angɛndangɛnda waki kaamɛ la wɔ w’oma lo Efrayimɛ, Manase ndo Simɛyɔna,+ nɛ dia efula ka l’atei awɔ wakamɔ oma l’Isariyɛlɛ, ko wakaye le nde lam’akawɛnyi dia Jehowa Nzambi kande ekɔ kaamɛ la nde.
10 Ɔnkɔnɛ, vɔ wakasangana la Jɛrusalɛma lo ngɔndɔ ka 3 ka l’ɔnɔnyi wa 15 w’ɛlɔmbwɛlɔ ka Asa.
11 Lushi lɔsɔ, vɔ wakalambola Jehowa elambo oma lo diangɔ dia dimbo diakawela, ngɔmbɛ 700 ndo ɛkɔkɔ nunu esambele (7 000).
12 Ndo nto, vɔ wakadje sheke dia nyanga Jehowa Nzambi ka watshɛwɔ la otema awɔ tshɛ ndo la anima* awɔ tshɛ.+
13 Onto tshɛ laki konyanga Jehowa Nzambi k’Isariyɛlɛ akahombe ndjakema, oyadi dikɛnda kana opalanga, pami kana womoto.+
14 Ɔnkɔnɛ, vɔ wakatshibɛ Jehowa la dui dia wolo, la waelo w’ɔngɛnɔngɛnɔ, la amama ndo la wɛɛndjɔ.
15 Ase Juda tshɛ wakangɛnangɛna l’ɔtɛ w’etshibelo kakɔ, nɛ dia vɔ wakakitshibe la otema ɔtɔi ndo vɔ wakooyange la wangasanu tshɛ, ko nde akayashola le wɔ+ ndo Jehowa akatetemala mbasha momuya lo wedi akɔ tshɛ.+
16 Nkumekanga Asa akanya ndo Maaka,+ tshɛnde ka womoto oma lo dihole diande dia nyango nkumekanga, nɛ dia nde akasale ekishi ka nsɔnyi dikambo di’ɔtɛmwɛlɔ wa kimɛta ka l’osongo.*+ Asa akahembola ekishi kande ka nsɔnyi, akakietɛ ofushi oto ndo akakitshumbe lo Okidi wa Kidirɔna.+
17 Koko ahole wa la diko kominyɛma+ oma l’Isariyɛlɛ.+ Kaanga mbakidiɔ ngasɔ, otema wa Asa waki la kɔlamelo tshɛ lo tshɛ* lɔsɛnɔ lande l’otondo.*+
18 Ndo nde akela diangɔ diakandakidia nde la she lo luudu la Nzambi ka mɛtɛ, mbuta ate mfɛsa, paonyi ndo diangɔ diotshikitanyi.+
19 Ta komonga nto polo l’ɔnɔnyi wa 35 w’ɛlɔmbwɛlɔ ka Asa.+
Nɔtɛ ka l'ɛse ka dikatshi
^ Tshɛk., “Nshi efula.”
^ Tshɛk., “wɔladi komongaka le ɔnɛ lakatombaka kana ɔnɛ lakɔtɔka.”
^ Tshɛk., “tanyoholoyake anya anyu.”
^ Enda Elembetshielo.
^ Enda Elembetshielo.
^ Kana “wakakimɔma tshɛ lo tshɛ.”
^ Tshɛk., “nshi yande tshɛ.”
