2 Ɛkɔndɔ 18:1-34
18 Jɛhɔshafata akayala la ɔngɔnyi ndo la lotombo lo yɛdikɔ y’efula,+ koko nde akadje sheke ya diwala nde la Ahaba.+
2 Ɔnkɔnɛ ɛnɔnyi efula l’ɔkɔngɔ, nde akaholɔ otsha le Ahaba la Samariya,+ ko Ahaba akalambola lokema l’ɛkɔkɔ ndo ngɔmbɛ lo dikambo diande ndo lo dikambo di’anto waki kaamɛ la nde. Nde akootshutshuya* dia ntshɔ la nde dia tɔlɔsha Ramɔta-Ngiliyadɛ.+
3 Ko Ahaba nkumekanga k’Isariyɛlɛ akatɛ Jɛhɔshafata nkumekanga ka Juda ate: “Onde wɛ ayotshɔ kaamɛ la mi otsha la Ramɔta-Ngiliyadɛ?” Nde akookadimola ate: “Dimi lekɔ oko wɛ, anto ami wekɔ oko anto ayɛ ndo tayokosukɛ lo ta.”
4 Koko Jɛhɔshafata akatɛ nkumekanga k’Isariyɛlɛ ate: “Lam’alangayɛ, tokotambodi ntondo kanyi ya Jehowa.”+
5 Ko nkumekanga k’Isariyɛlɛ akatshumanya amvutshi, apami 400 ndo akawambola ate: “Onde totshu totɔlɔsha Ramɔta-Ngiliyadɛ, kana ntshike?” Vɔ wakate vate: “Tshɔka, Nzambi ka mɛtɛ ayokikimɔ lo anya wa nkumekanga.”
6 Oma laasɔ, Jɛhɔshafata akate ate: “Onde ndooko omvutshi okina wa Jehowa+ lanɛ kele tombole Nzambi kanyi lo tshimbo yande?”+
7 Ko nkumekanga k’Isariyɛlɛ akatɛ Jɛhɔshafata ate: “Onto 1 kambotshikala+ lakokaso mimbola Jehowa kanyi, koko dimi mbohetshaka, nɛ dia nde hataka prɔfɛsiya y’ɛlɔlɔ lo dikambo diami, paka ya kɔlɔ tsho.+ Lokombo lande Mikaya, ɔna Imila.” Koko Jɛhɔshafata akate ate: “Nkumekanga hahombe mbuta dui dia ngasɔ.”
8 Ko nkumekanga k’Isariyɛlɛ akelɛ ɔnɛnɛ ɔmɔtshi ndo akawotɛ ate: “Tshɔka toye la Mikaya ɔna Imila yema esadi.”+
9 Nkumekanga k’Isariyɛlɛ nde la Jɛhɔshafata nkumekanga ka Juda wakadjasɛ onto l’onto lo kiti kande ka lowandji, wɔlɔtshi ahɔndɔ wa lowandji; vɔ wakadjasɛ lo dihole di’esuswelo dia lo ɛɔtwɛlɔ ka soko dia Samariya ndo amvutshi tshɛ wakataka prɔfɛsiya la ntondo kawɔ.
10 Ko Zɛdɛkiya ɔna Kɛnana akayasalɛ nseke ya mbolo ndo akate ate: “Jehowa kata ate: ‘La diangɔ nɛ kayoyohomuya* ase Suriya polo lam’ayoyaashila oshiki.’”
11 Amvutshi akina tshɛ wakataka prɔfɛsiya kakɔ kaamɛ vate: “Tshɔka la Ramɔta-Ngiliyadɛ, ko wɛ ayotɔlɛndja.+ Jehowa ayokikimɔ lo anya wa nkumekanga.”
12 Ko ɔkɛndji wakatshu dia telɛ Mikaya akawotɛ ate: “Eenda, amvutshi tshɛ wekɔ lo nsanga lolemi dia nkumekanga ntshɔ. Lam’alangayɛ, kɛnɛ kayoyota kɔtɔne la kɛnɛ katawɔ+ ndo kote awui w’amɛna.”+
13 Koko Mikaya akate ate: “Lo mɛtɛ oko wele Jehowa la lɔsɛnɔ, kɛnɛ tshɛ kayombutɛ Nzambi kami kayomota.”+
14 Oma laasɔ, nde akɔtɔ le nkumekanga, ko nkumekanga akawombola ate: “Mikaya, onde totshu dia tɔlɔsha Ramɔta-Ngiliyadɛ, kana ntshike?” Mbala kakɔ ɔtɔi nde akakadimola ate: “Tshɔka, ko wɛ ayotɔlɛndja. Vɔ wayokimɔma lo anya ayɛ.”
15 Ko nkumekanga akawotɛ ate: “Mbala ngana yahombami kotshibia dia wɛ mbutɛmi paka kɛnɛ kele mɛtɛ lo lokombo la Jehowa?”
16 Ko nde akate ate: “Lekɔ lo mɛna ase Isariyɛlɛ tshɛ wambohandjɔnɛ lo akona oko ɛkɔkɔ waha la olami.+ Jehowa akate ate: ‘Vɔ keema la owandji. Onto l’onto akalole lo luudu lande la ki.’”
17 Oma laasɔ, nkumekanga k’Isariyɛlɛ akatɛ Jɛhɔshafata ate: “Onde dimi hankote nte: ‘Nde hatota prɔfɛsiya k’ɔlɔlɔ lo dikambo diami, paka ka kɔlɔ’?”+
18 Ko Mikaya akate ate: “Ɔnkɔnɛ, nyohokame ɔtɛkɛta wa Jehowa: Dimi lakɛnyi Jehowa odjashi lo kiti kande ka lowandji+ ndo alembe tshɛ wa l’olongo+ wemadi lo lonya lande l’omi ndo lo lonya lande la lɔmɔsɔ.+
19 Oma laasɔ, Jehowa akate ate: ‘Akɔna ayokesa Ahaba nkumekanga k’Isariyɛlɛ dia nde ntshɔ kele atovu la Ramɔta-Ngiliyadɛ?’ Ko ɔnɛ ate nganɛ ndo okina ate nganɛ.
20 Ko nyuma*+ kɛmɔtshi akatombe ndo akemala la ntondo ka Jehowa, ko akate ate: ‘Dimi layowokesa.’ Jehowa akawombola ate: ‘Ngande wayoyosala dui sɔ?’
21 Nde akakadimola ate: ‘Dimi layotshɔ, ko layonga nyuma ka lokeso lo enyɔ w’amvutshi ande tshɛ.’ Ko nde akate ate: ‘Wɛ ayowokesa ndo kɛnɛ koleki ele, wɛ ayotondoya. Tshɔka, tosale ngasɔ.’
22 Wonya ɔnɛ, Jehowa akadjisha nyuma ka lokeso lo enyɔ w’amvutshi ayɛ+ anɛ, koko Jehowa akewoya mpokoso lo dikambo diayɛ.”
23 Ko Zɛdɛkiya+ ɔna Kɛnana akasukana, akakɔmɔla Mikaya+ lo tama+ ndo akate ate: “Lo mboka kakɔna komwe nyuma ka Jehowa oma le mi dia ntɛkɛta la yɛ?”+
24 Mikaya akakadimola ate: “Eenda, wɛ ayɛna mboka kakɔ lushi layoyɔtɔ lo luudu loleki l’etei dia ndjashɛ.”
25 Ko nkumekanga k’Isariyɛlɛ akate ate: “Nyɔshi Mikaya, nyookaloya le Amɔna owandji w’osomba ndo le Jɔashi ɔna nkumekanga.
26 Nyowate nyate: ‘Nkumekanga kata ate: “Nyodje ɔlɔngɔ ɔnɛ lo lokanu+ ndo nyowoshake yema ya mapa tshitshɛ la ashi wa nnɔ polo lam’ayomokalola la ki.”’”
27 Koko Mikaya akate ate: “Naka wɛ nkalola la ki, kete Jehowa hatɛkɛtshi la mi.”+ Ko nde akakotsha ate: “Anto tshɛ nyodje yimba lo dikambo sɔ.”
28 Ko nkumekanga k’Isariyɛlɛ nde la Jɛhɔshafata nkumekanga ka Juda wakadɛ otsha la Ramɔta-Ngiliyadɛ.+
29 Nkumekanga k’Isariyɛlɛ akatɛ Jɛhɔshafata ate: “Dimi layanga ntshikitanya ɛnamelo kami kele ntshu lo ta, koko wɛ kɔlɔtɛ ahɔndɔ ayɛ wa lowandji.” Ɔnkɔnɛ, nkumekanga k’Isariyɛlɛ akatshikitanya ɛnamelo kande, ko wakatshu lo ta.
30 Nkumekanga ka Suriya akadjangɛ ɛnɔmbɔdi ande wa pusupusu ate: “Tanyɔlɔshake onto okina tshɛ, oyadi la tshitshɛ kana la woke, paka nkumekanga k’Isariyɛlɛ.”
31 Kam’akɛnyi ɛnɔmbɔdi wa pusupusu Jɛhɔshafata, vɔ wakatanɛ vate: “Ongo kele nkumekanga k’Isariyɛlɛ.” Ko vɔ wakakadimɔ dia mbɔlɔsha, ndo Jɛhɔshafata akatatɛ ndela dia nyanga ekimanyielo,+ ko Jehowa akookimanyiya ndo mbala kakɔ ɔtɔi Nzambi akawaengesola oma le nde.
32 Lam’akɛnyi ɛnɔmbɔdi wa pusupusu dia aha nde kele nkumekanga k’Isariyɛlɛ, mbala kakɔ ɔtɔi vɔ wakatshike mboyela.
33 Koko pami kɛmɔtshi akoke dikuwa diande wokoka,* ko diakatotshieta nkumekanga k’Isariyɛlɛ lam’asa asɔnga wa dikɔti diande dia mbolo dia mposo mposo. Ko nkumekanga akatɛ ɔnɛ lakatakɛndjakɛndjaka pusupusu kande ate: “Kadimɔ kele ominya oma lo ta,* nɛ dia lambohomɔ wolo.”+
34 Ta diaki wolo lushi lɔsɔ l’otondo ndo wakasungukadia nkumekanga k’Isariyɛlɛ lo pusupusu, mbɛlanɛ l’ase Suriya polo la dikɔlɔ, ko nde akavu lam’akadje wonya.+
Nɔtɛ ka l'ɛse ka dikatshi
^ Kana “akawetawoya.”
^ Kana “kayoyotshindjiya.”
^ Kana “ondjelo.”
^ Kana “aha la nde mbeya.”
^ Tshɛk., “mpango.”
