2 Ɛkɔndɔ 21:1-20
21 Oma laasɔ, Jɛhɔshafata aketama dia momuya kaamɛ la watshɛnde ndo wakookundɛ lale watshɛnde l’Osomba wa Davidɛ. Ko ɔnande Jɛhɔrama akayala nkumekanga lo dihole diande.+
2 Anango, ana w’apami wa Jɛhɔshafata vɔ anɛ: Azariya, Jɛhiyɛlɛ, Zɛkariya, Azariya, Mikayɛlɛ ndo Shefatiya. Vɔ tshɛ waki ana w’apami wa Jɛhɔshafata nkumekanga k’Isariyɛlɛ.
3 Shɛwɔ akawasha weshasha efula wa mfɛsa la paonyi ndo diangɔ dia nɛmɔ, kaamɛ ndo esomba wodingami la mpele wa la Juda.+ Koko nde akasha Jɛhɔrama+ diolelo, nɛ dia nde kaki ɔna l’enondo.
4 Lam’akɔshi Jɛhɔrama diolelo dia she lo anya ande, nde akakeketsha lowandji lande lo ndjaka anango tshɛ+ la lokuwa la ta, kaamɛ ndo ewandji ɛmɔtshi wa l’Isariyɛlɛ.
5 Jɛhɔrama aki l’ɛnɔnyi 32 lam’akandayala nkumekanga ndo nde akolɛ l’edja k’ɛnɔnyi 8 la Jɛrusalɛma.+
6 Nde akakɛndakɛndaka lo mboka ka nkumi ya dikanga y’Isariyɛlɛ,+ oko wakasalaka ase luudu la Ahaba, nɛ dia ɔna aki Ahaba akayonga wadɛnde,+ ndo nde akasalaka kɛnɛ kaki kɔlɔ lo washo wa Jehowa.
7 Koko Jehowa konanga ndanya ase luudu la Davidɛ,+ l’ɔtɛ wa sheke yakandadje la Davidɛ, nɛ dia nde akoolake dia mbosha nde l’anande tala nshi tshɛ.+
8 Lo nshi yande mbakatɔmbɔkwɛ ase Ɛdɔmɛ ase Juda+ ko vɔ ndjasɔnɛ nkumekanga.+
9 Ko Jɛhɔrama nde la ɛnɔmbɔdi ande wakatenyanya kaamɛ la pusupusu yande tshɛ ndo nde akonɛɛ l’otsho, ko akalɛndja ase Ɛdɔmɛ wakoodinge ndo ɛnɔmbɔdi wa pusupusu.
10 Koko ase Ɛdɔmɛ wakatetemala tɔmbɔkwɛ ase Juda polo ndo ɛlɔ. Ase Libina+ vɔ lawɔ wakatɔmbɔkɔ l’etena kɛsɔ, nɛ dia vɔ wakoke Jehowa Nzambi ka watshɛwɔ+ ɔkɔngɔ.
11 Nde akasale ndo ahole wa la diko+ lo akona wa la Juda dia nkonya ase Jɛrusalɛma lo nsala kinumba ka lo nyuma,* ndo nde akanganyiya Juda.
12 L’ɔkɔngɔ diko, omvutshi Elidja+ akoofundɛ mukanda ate: “Jehowa Nzambi ka Davidɛ tshɛyɛ kata ate: ‘Wɛ hakɛndjikɛndji lo mboka ya Jɛhɔshafata+ ya shɔ kana lo mboka ya Asa+ nkumekanga ka Juda.
13 Koko wɛ ambɔkɛndakɛnda lo mboka ka nkumi ya dikanga y’Isariyɛlɛ+ ndo wɛ ambokonya ase Juda l’ase Jɛrusalɛma dia vɔ nsala kinumba+ ka lo nyuma* oko kinumba kakasale ase luudu la Ahaba;+ wɛ ambodiaka ndo ananyɔ,+ ase luudu la shɔ waki ɛlɔlɔ koleka.
14 Ɔnkɔnɛ, Jehowa ayanga nkɔmɔla wodja ayɛ, anayɛ, wadiɛyɛ ndo diangɔ diayɛ tshɛ wolo.
15 Ndo wɛ ayotata hemɔ efula, mbidja ndo hemɔ ka l’ɛsɔhi polo lam’ayotomba ɛsɔhi ayɛ l’andja l’ɔtɛ wa hemɔ, lushi la lushi.’”
16 Oma laasɔ, Jehowa akasɛngiya+ ase Filistiya*+ ndo ase Arabiya+ waki suke l’ase Etiyɔpiya dia vɔ ndɔsha Jɛhɔrama.
17 Ko vɔ wakɔtwɛ Juda la ta, wakɔtɔ la wolo, ko wakɛmbɛ diangɔ tshɛ diaki lo luudu* la nkumekanga,+ mbidja ndo anande la wadiɛnde. Tshɔi yande y’ɔna yakatshikala ko Jɛhɔahaza,*+ ɔnande la kose.
18 L’ɔkɔngɔ w’akambo asɔ tshɛ, Jehowa akoosoya la hemɔ kahakɔnɔ ka l’ɛsɔhi.+
19 L’ɔkɔngɔ w’etena kɛmɔtshi, lam’akete ɛnɔnyi 2 w’etondo, ɛsɔhi ande wakatombe l’andja l’ɔtɛ wa hemɔ kande, ko nde akavu l’ɔkɔngɔ wa nsowa efula la hemɔ kɛsɔ; ndo anto ande kosala otshumbelo dikambo diande oko otshumbelo wakawasale dikambo dia watshɛnde.+
20 Nde aki l’ɛnɔnyi 32 lam’akandayala nkumekanga ndo nde akolɛ l’edja k’ɛnɔnyi 8 la Jɛrusalɛma. Ndooko onto lakanyange lam’akandavu. Ko wakookundɛ l’Osomba wa Davidɛ,+ koko aha lo waombo wa nkumi ya dikanga.+
Nɔtɛ ka l'ɛse ka dikatshi
^ Kana “lo nshisha kɔlamelo le Nzambi.”
^ Kana “nshisha kɔlamelo le Nzambi.”
^ Tshɛk., “yimba y’ase Filistiya.”
^ Kana “luudu l’owandji.”
^ Nde kelamɛ nto Ahaziya.
