2 Ɛkɔndɔ 23:1-21
23 L’ɔnɔnyi wa 7, Jɛhɔyada akasale akambo la dihonga ndo akakɔtsha losalo* la ewandji w’anto nkama nkama,+ mbuta ate Azariya ɔna Jɛrɔhama, Ishimaɛlɛ ɔna Jɛhɔhanana, Azariya ɔna Ɔbɛdɛ, Maseya ɔna Adaya ndo Elishafata ɔna Zikiri.
2 Oma laasɔ, vɔ waketeta lo Juda y’otondo ko wakatshumanya ase Lɛwi+ w’oma l’esomba tshɛ wa la Juda ndo ɛtɛ wa nkumbo ya washe ase Isariyɛlɛ. Lam’akawaye la Jɛrusalɛma,
3 etshumanelo k’otondo wakadje sheke+ vɔ la nkumekanga lo luudu la Nzambi ka mɛtɛ, ndo l’ɔkɔngɔ wa laasɔ, Jɛhɔyada akawatɛ ate:
“Nyolonge, ɔna nkumekanga ayolɛ oko wakalake Jehowa lo dikambo dia ana wa Davidɛ.+
4 Nyosale nganɛ: K’asato ɔtɔi k’ɛlɔmbɛdi ndo k’ase Lɛwi wayokambaka olimu+ lo Sabato kawonge alami w’asoko;+
5 k’asato ɔtɔi kekina kawonge lo luudu* la nkumekanga,+ ndo k’asato ɔtɔi kekina nto kawonge la Soko di’Etshina, ndo anto akina tshɛ kawonge lo asɛkɛ wa luudu la Jehowa.+
6 Tanyetawɔke dia onto mbɔtɔ lo luudu la Jehowa, onyake ɛlɔmbɛdi l’ase Lɛwi wanɛ wakamba olimu.+ Vɔ mbeyaka mbɔtɔ, nɛ dia vɔ wekɔ olui w’ekila, ndo anto akina tshɛ wayokotshaka ɔkɛndɛ awɔ le Jehowa.
7 Ase Lɛwi pombaka dinga nkumekanga lo wedi akɔ tshɛ, onto l’onto la dihomɔ diande dia ta lo anya. Onto tshɛ layɔtɔ lo luudu lakɔ pombaka ndjakema. Nyongake kaamɛ la nkumekanga dihole tshɛ diatshɔnde.”*
8 Ase Lɛwi l’ase Juda tshɛ wakasale paka oko wakawadjangɛ ɔlɔmbɛdi Jɛhɔyada. Ɔnkɔnɛ, onto l’onto akɔshi apami ande waki la ɔkɛndɛ lo Sabato kaamɛ la wanɛ waki komonga la ɔkɛndɛ lo Sabato,+ nɛ dia ɔlɔmbɛdi Jɛhɔyada kɔkɛndja elui+ wa wanɛ waki la ɔkɛndɛ.
9 Oma laasɔ, ɔlɔmbɛdi Jɛhɔyada akasha ewandji w’anto nkama nkama+ akɔnga, dingawo dia totshitshɛ* ndo dingawo di’etshimbedi dia nkumekanga Davidɛ+ diaki lo luudu la Nzambi ka mɛtɛ.+
10 Ko nde akemadia anto tshɛ, onto l’onto la ehomɔ kande ka ta* lo lonya, oma lo lɛkɛ la lonya l’omi la luudu polo lo lɛkɛ la lonya la lɔmɔsɔ la luudu, suke la elambwelo ndo suke la luudu lakɔ, dinga nkumekanga.
11 Oma laasɔ, vɔ wakatondja ɔna nkumekanga+ ko wakɔɔlɔtsha dɛmbɔ dia nkoso* ndo Ɔmɛnyi,*+ ko wakawetɛ nkumekanga ndo Jɛhɔyada nde l’anande w’apami wakookite esɔ. Oma laasɔ, vɔ wakate vate: “Nkumekanga alombe!”+
12 Lam’akoke Ataliya nkindo y’anto watalawɔ ndo watatombola nkumekanga, mbala kakɔ ɔtɔi nde akaye le anto lo luudu la Jehowa.+
13 Oma laasɔ, nde akɛnyi nkumekanga emadi lɛkɔ suke la ekundji kande la soko. Ewandji+ ndo ambidi w’amama waki kaamɛ la nkumekanga ndo anto tshɛ wa lo wodja wakangɛnangɛnaka+ ndo wakadaka amama, ndo amembi waki la dihomahoma dia mishiki wakalɔmbɔlaka* otombwelo. Ko Ataliya akaatshatsha ahɔndɔ ande ndo akate la dui dia wolo ate: “Wambɔmbɔtwɛ sheke! Wambɔmbɔtwɛ sheke!”
14 Koko ɔlɔmbɛdi Jɛhɔyada akatondja ewandji w’anto nkama nkama, wanɛ wakasɔnama oko ewandji w’asɔlayi ko akawatɛ ate: “Nyowonya oma lo ɛnɔngɔ w’anto ndo naka onto ɔmɔtshi mboyela, kanyoodiake la lokuwa la ta!” Dikambo ɔlɔmbɛdi akate ate: “Tanyoodiakake lo luudu la Jehowa.”
15 Ɔnkɔnɛ vɔ wakawonde ndo lam’akandakome lo ɛɔtwɛlɔ ka Soko dia Mfalasa diele lo luudu* la nkumekanga, mbala kakɔ ɔtɔi vɔ wakoodiake laawɔ.
16 Ko Jɛhɔyada akadje sheke lam’asande l’anto tshɛ ndo la nkumekanga dia vɔ wayotetemala monga ekambi wa Jehowa.+
17 L’ɔkɔngɔ wa laasɔ, anto tshɛ wakatshu lo luudu* la Baala, ko wakalinyukola,+ wakahandjola dilambwelo diande ndo dikishi diande vwa,+ ko wakadiake Matanɛ ɔlɔmbɛdi wa Baala+ la ntondo ka dilambwelo.
18 Oma laasɔ, Jɛhɔyada akasha ɛlɔmbɛdi l’ase Lɛwi ɔkɛndɛ wa namaka luudu la Jehowa, wanɛ wele Davidɛ akaasɔnɛ oko olui walama luudu la Jehowa dia nambolaka elambo wa lotshumba wa Jehowa+ lo ndjela kɛnɛ kofundami lo Ɛlɛmbɛ wa Mɔsɛ+ la ɔngɛnɔngɛnɔ ndo la esambo oko wakatatshi* Davidɛ.
19 Ndo nto, nde akakitsha alami w’asoko+ lo asoko wa luudu la Jehowa diaha onto ɔmɔtshi lele mindo lo yoho mɔtshi mbɔtɔ lɔkɔ.
20 Oma laasɔ, nde akɔshi ewandji w’anto nkama nkama,+ ɛlɔhɛ, emboledi w’anto ndo anto tshɛ wa lo wodja, ko wakaholɔ kaamɛ la nkumekanga oma lo luudu la Jehowa. L’ɔkɔngɔ wa laasɔ, vɔ wakete lo soko dia la diko otsha lo luudu la nkumekanga* ndo wakadjashiya nkumekanga lo kiti ka lowandji+ ka lo diolelo.+
21 Ɔnkɔnɛ, anto tshɛ wa lo wodja wakangɛnangɛna ndo osomba waki ki, nɛ dia wakadiake Ataliya la lokuwa la ta.
Nɔtɛ ka l'ɛse ka dikatshi
^ Kana “akadje sheke.”
^ Kana “luudu l’owandji.”
^ Tshɛk., “lam’ayondotombaka ndo lam’ayondɔtɔka.”
^ Mbala efula, amboki w’eta mbakɛmbaka dingawo dia totshitshɛ sɔ.
^ Kana “dikuwa.”
^ Ondo wɔɔmbɔ waki la Ɛlɛmbɛ wa Nzambi.
^ Kana “diadɛmɛ.”
^ Kana “wɛnya djembetelo ya.”
^ Kana “luuudu l’owandji.”
^ Kana “tɛmpɛlɔ.”
^ Tshɛk., “lo anya wa.”
^ Kana “luudu l’owandji.”
