2 Ɛkɔndɔ 24:1-27
24 Jɛhɔashi aki l’ɛnɔnyi 7 etena kakandonge nkumekanga,+ ndo nde akolɛ l’edja k’ɛnɔnyi 40 la Jɛrusalɛma. Nyango lokombo lande Zibiya ose Bɛrɛ-Shɛba.+
2 Jɛhɔashi akatetemala nsala kɛnɛ kaki ɔlɔlɔ lo washo wa Jehowa nshi tshɛ yaki ɔlɔmbɛdi+ Jɛhɔyada la lɔsɛnɔ.
3 Jɛhɔyada akɔɔsɔnɛ wadi 2, ndo nde akote ana w’apami la ana wa wamato.
4 L’ɔkɔngɔ diko, Jɛhɔashi akakombola l’otema ande dia nɔngɔsɔla luudu la Jehowa.+
5 Ko nde akatshumanya ɛlɔmbɛdi l’ase Lɛwi ndo akawatɛ ate: “Nyotshu lo esomba wa Juda, nyotɔkɔngɔlɛ falanga oma le ase Isariyɛlɛ tshɛ dia nɔngɔsɔlaka luudu la Nzambi kanyu+ ɔnɔnyi l’ɔnɔnyi; ndo nyu pombaka nsala dikambo sɔ yema esadi.” Koko ase Lɛwi kosala esadi.+
6 Ɔnkɔnɛ nkumekanga akelɛ Jɛhɔyada laki owandji ko akawotɛ ate:+ “Lande na kahayalɔmbi ase Lɛwi dia vɔ mbela elambo w’ekila wakadjanga Mɔsɛ+ okambi wa Jehowa oma la Juda ndo oma la Jɛrusalɛma, elambo w’ekila w’etshumanelo k’Isariyɛlɛ dikambo dia luudu la dipɛma l’Ɔmɛnyi?+
7 Nɛ dia ana w’apami wa Ataliya,+ womoto la kɔlɔ wakɔtɔ lo luudu la Nzambi ka mɛtɛ+ la wolo, ko vɔ wakakambe la diangɔ di’ekila tshɛ dia lo luudu la Jehowa dikambo dia waa Baala.”
8 Oma laasɔ, lo ndjela didjango dia nkumekanga, wakasale ɔshɛtɛ+ ndo wakookitsha l’andja la soko dia luudu la Jehowa.+
9 L’ɔkɔngɔ wa laasɔ, wakewoya lo Juda y’otondo ndo la Jɛrusalɛma dia anto mbela Jehowa elambo w’ekila+ wakatadjange Mɔsɛ okambi wa Nzambi ka mɛtɛ ase Isariyɛlɛ l’oswe wa shɛnga.
10 Ewandji tshɛ ndo anto tshɛ wakangɛnangɛna,+ ko vɔ wakelaka weshasha ndo wakadjaka lo ɔshɛtɛ akɔ, polo lam’akawalole.*
11 Etena tshɛ kakelaka ase Lɛwi ɔshɛtɛ akɔ le nkumekanga ndo lam’akawɛnaka dia falanga yaya efula lɔkɔ, ofundji wa nkumekanga nde la ɔlɔhɛ w’owandji w’ɛlɔmbɛdi wakayaka ndo wakayitondjaka oma l’ɔshɛtɛ akɔ,+ ko vɔ wakookaloyaka lo dihole diawɔ. Kɛsɔ mbakawasalaka lushi la lushi ndo vɔ wakatshumanya falanga lo yɛdikɔ y’efula.
12 Oma laasɔ, nkumekanga nde la Jɛhɔyada wakayishaka wanɛ wakalɔmbɔlaka lotumu lendana l’olimu wa lo luudu la Jehowa, ko vɔ wakafutaka ambatshi w’ave ndo etshudi dia vɔ nɔngɔsɔla luudu la Jehowa,+ kaamɛ ndo etshudi wa yaandjo wakakambaka la mbolo ndo la nkonga dia nɔngɔsɔla luudu la Jehowa.
13 Ko wanɛ wakalɔmbɔlaka olimu wakasale dia olimu akɔ ntatɛ ndo olimu w’ɔlɔngɔswɛlɔ wakatatetemalaka lo ɛlɔmbwɛlɔ kawɔ, ko vɔ wakalɔngɔsɔla luudu la Nzambi ka mɛtɛ woho wahombalɔ monga ndo wakalikeketsha.
14 Kam’akawashidiya, vɔ wakatɔlɛ falanga yakatshikala le nkumekanga nde la Jɛhɔyada, ko vɔ wakakambe la yɔ dia nsala diangɔ diendana la luudu la Jehowa, diangɔ diendana l’olimu ndo dia nambolaka elambo, ndo akɔhɔ la diangɔ dia paonyi ndo dia mfɛsa.+ Ko vɔ wakalambolaka elambo wa lotshumba+ lo luudu la Jehowa mbala la mbala nshi tshɛ yaki Jɛhɔyada la lɔsɛnɔ.
15 Lam’akayala Jɛhɔyada osombe ndo ambondoya andja, nde akavu; nde aki l’ɛnɔnyi 130 lam’akandavu.
16 Wakookundɛ l’Osomba wa Davidɛ lale nkumi ya dikanga,+ nɛ dia nde akasale awui w’ɔlɔlɔ lo Isariyɛlɛ+ lo kɛnɛ kendana la Nzambi ka mɛtɛ ndo luudu Lande.
17 L’ɔkɔngɔ wa nyɔi ka Jɛhɔyada, ewandji wa la Juda wakaye, ko wakakusamɛ nkumekanga ndo nkumekanga akawaokɛ.
18 Vɔ wakasɛkɛ luudu la Jehowa Nzambi ka watshɛwɔ ndo wakatatɛ kambɛ dimɛta dia l’esongo* ndo dikishi, ko nkɛlɛ ka Nzambi kakaye* le Juda ndo le Jɛrusalɛma, nɛ dia vɔ waki la onongo.
19 Nde akatetemala mbatomɛ amvutshi dia mbakaloya le Jehowa, ndo vɔ wakaahɛmɔlaka,* koko vɔ wakatone mpokamɛ.+
20 Nyuma ka Nzambi kakaye le* Zɛkariya ɔna ɔlɔmbɛdi Jɛhɔyada,+ ko nde akemala lo dihole dia laadiko ndo akatɛ anto ate: “Nzambi ka mɛtɛ kata ate: ‘Lande na kɔnyɔlanyu ɛlɛmbɛ wa Jehowa? Nyu hanyototondoya! Lam’ele nyambɔsɛka Jehowa, nde lawɔ ayonyɔsɛka.’”+
21 Koko vɔ wakawɔtwɛ sheke+ ko wakawooke ave lo ndjela didjango dia nkumekanga lo sɛkɛ dia luudu la Jehowa.+
22 Ɔnkɔnɛ nkumekanga Jɛhɔashi kombohɔ ngandji ka kɔlamelo kakawɛnya Jɛhɔyada she,* ndo nde akadiake ɔnande lakate lam’akinde suke la mvɔ ate: “Jehowa eende dikambo nɛ ndo akoya la yɛ.”+
23 L’etatelo k’ɔnɔnyi,* asɔlayi w’ase Suriya wakaye dia ndjɔlɔsha Jɛhɔashi ndo vɔ wakɔtwɛ Juda ndo Jɛrusalɛma la ta.+ Ko vɔ wakadiake ewandji tshɛ+ w’anto ndo vɔ wakatome diangɔ diawɔ tshɛ dia dimbo le nkumekanga ka Damasɛkɛ.
24 Kaanga mbele asɔlayi w’ase Suriya wakawaɔtwɛ waki anto yema tshitshɛ, Jehowa akakimɔ olui wa woke efula w’asɔlayi+ lo anya awɔ, nɛ dia vɔ wakasɛkɛ Jehowa Nzambi ka watshɛwɔ; ɔnkɔnɛ vɔ* wakela elombwelo le Jɛhɔashi.
25 Lam’akawamɔ oma lalende (nɛ dia vɔ wakootshike ambohomɔ wolo*), ekambi ande hita wakawɔtwɛ sheke dikambo nde akakɛdia dikila dia ana* w’apami w’ɔlɔmbɛdi Jɛhɔyada.+ Vɔ wakoodiake lo mbeto kande hita.+ Ɔnkɔnɛ nde akavu, ko wakookundɛ l’Osomba wa Davidɛ,+ koko vɔ kombokundɛ lo waombo wa nkumi ya dikanga.+
26 Wanɛ wakawɔtwɛ sheke+ vɔ anɛ: Zabada ɔna Shimeatɛ, womoto l’ose Amɔna ndo Jɛhɔzabada ɔna Shimiritɛ, womoto l’ose Mɔaba.
27 Lo kɛnɛ kendana l’anande w’apami, la awui efula wakawate lo dikambo diande+ ndo dia ɔlɔngɔswɛlɔ* wa luudu la Nzambi ka mɛtɛ,+ awui asɔ tshɛ fundama lo efundelo* wa lo Dibuku dia Nkumi ya dikanga. Ko ɔnande Amaziya akayala nkumekanga lo dihole diande.
Nɔtɛ ka l'ɛse ka dikatshi
^ Kana ondo “polo lam’akawakimɔma tshɛ.”
^ Enda Elembetshielo.
^ Tshɛk., “nkɛlɛ kaki.”
^ Kana “wakaasambisha.”
^ Tshɛk., “kakalɔtɛ.”
^ Mbuta ate she Zɛkariya.
^ Tshɛk., “ekadimwelo k’ɔnɔnyi.”
^ Mbuta ate ase Suriya.
^ Kana “ele la hemɔ efula.”
^ Kana “ɔna.” Ondo ekɔ lo efula dia mɛnya lɔnɛnɛ.
^ Tshɛk., “ehikamelo.”
^ Kana “elembetshielo; kɔmatɛrɛ.”
