2 Ɛkɔndɔ 25:1-28
25 Amaziya aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 29 la Jɛrusalɛma. Nyango lokombo lande Jɛhɔadana ose Jɛrusalɛma.+
2 Nde akatetemala nsala kɛnɛ kaki ɔlɔlɔ lo washo wa Jehowa, koko aha la otema ɔtɔi.
3 Kam’akashikikala diolelo lo anya ande, nde akadiake ekambi ande wakadiake she laki nkumekanga.+
4 Koko nde kondjaka anawɔ, nɛ dia nde akasale akambo lo ndjela kɛnɛ kofundami lo Ɛlɛmbɛ, lo dibuku dia Mɔsɛ lɛnɛ akadjanga Jehowa ate: “Ambutshi hawohombe mvɔ l’ɔtɛ wa kɛnɛ kasala anawɔ, ndo ana hawohombe mvɔ l’ɔtɛ wa kɛnɛ kasala ambutshi awɔ. Onto pombaka mvɔ paka l’ɔtɛ wa pɛkato kande hita.”+
5 Amaziya akatshumanya ase Juda ndo akawaemadia lo ndjela mvudu ya washɛwɔ, lo ndjela ewandji w’anto nunu nunu ndo lo ndjela ewandji w’anto nkama nkama wa lo Juda y’otondo la Bɛnjamina k’otondo.+ Nde akaafundja nkombo ntatɛ oma le wanɛ waki l’ɛnɔnyi 20 otsha la diko,+ ko nde akɛnyi dia vɔ waki andɔshi wa ta wakalowanyema* nunu nkama shato (300 000) wakahombe nkamba olimu w’ɔsɔlayi, waki la akoka wa nkamba la dikɔnga ndo la engawo ka woke.
6 Ndo nto, nde akafutɛ andɔshi wa ta wa wolo w’oma lo Isariyɛlɛ nunu lokama (100 000) la talata* 100 ya mfɛsa.
7 Koko okambi wa Nzambi ka mɛtɛ ɔmɔtshi akaye le nde, ko akate ate: “Nkumekanga le, tetawɔke dia asɔlayi w’ase Isariyɛlɛ ntshɔ kaamɛ la yɛ, nɛ dia Jehowa keema kaamɛ la Isariyɛlɛ,+ ndo nde keema kaamɛ kaanga la oseka Efrayimɛ 1.
8 Koko tshɔka wɛmɛ tɔlɔsha ndo onga la dihonga. Naka wɛ hasadi ngasɔ, kete Nzambi ka mɛtɛ koka nsala dia wɛ totakana la ntondo k’otunyi ayɛ, nɛ dia Nzambi ekɔ la wolo wa nkimanyiya+ ndo wa nkonya onto dia ntakana.”
9 Ko Amaziya akatɛ okambi wa Nzambi ka mɛtɛ ate: “Ko laasɔ talata 100 yamomosha elui w’asɔlayi w’ase Isariyɛlɛ?” Okambi wa Nzambi ka mɛtɛ akakadimola ate: “Jehowa ekɔ la akoka wa kosha nyɛ yoleki shɔ.”+
10 Ɔnkɔnɛ Amaziya akakɛndja elui w’asɔlayi wakaye oma laka aseka Efrayimɛ ndo akaakaloya otsha l’ahole awɔ hita. Koko vɔ wakomalɛ Juda nkɛlɛ k’efula, ko vɔ wakakalola otsha l’ahole awɔ hita watadɔdɔ la nkɛlɛ.
11 Oma laasɔ, Amaziya akayala la dihonga ndo akalɔmbɔla elui ande w’asɔlayi otsha l’Okidi wa Lɛɛhɔ,+ ko nde akadiake apami nunu dikumi (10 000) w’ase Seirɛ.+
12 Apami w’ase Juda wakande anto nunu dikumi (10 000) wasɛna. Ko vɔ wakaatɔlɛ lo shɔdi ya dive ndo wakaasokola oma lo shɔdi ya dive diakɔ, ko vɔ tshɛ wakaatshatshema bɛtshi bɛtshi.
13 Koko ase olui wele Amaziya akaakaloya diaha vɔ ntshɔ la nde lo ta+ wakalɔshaka lo esomba wa la Juda, oma la Samariya+ polo la Bɛtɛ-Hɔrɔna.+ Vɔ wakadiake anto nunu sato (3 000) l’atei awɔ ndo wakɔshi diangɔ dia dimbo efula.
14 Koko l’ɔkɔngɔ wa Amaziya nkalola oma la todiaka ase Ɛdɔmɛ, nde akaye la tozambizambi t’ase Seirɛ, ko akatiemɛ dia tɔ monga tozambizambi+ tande ndo nde akatatɛ nkusama la ntondo katɔ ndo titshumbɛ elambo.
15 Ko Jehowa akomalɛ Amaziya nkɛlɛ ka mamba ndo nde akootomɛ omvutshi ɔmɔtshi dia ndjowotɛ ɔnɛ: “Lande na kayelayɛ tozambizambi t’anto tele kotshungola anto awɔ oma lo anya ayɛ?”+
16 Etena kakandatɛkɛtaka la nde, nkumekanga akate ate: “Onde sho takakɔsɔnɛ ondaki wa nkumekanga?+ Ɔlama ki,+ watokokodiaka!” Ko omvutshi akɔ akɔlama, koko nde akatatshi ate: “Dimi mbeyaka dia Nzambi ambɔsa yɛdikɔ ya kela elanyelo, lam’ele wɛ ambosala dikambo nɛ ndo wɛ hahokame dako diami.”+
17 L’ɔkɔngɔ wa nde mimbola andaki ande kanyi, Amaziya nkumekanga ka Juda akatomɛ Jɛhɔashi ɔna Jɛhɔahaza ɔna Jehu, nkumekanga k’Isariyɛlɛ dikɛndji ate: “Yaka toyɔlɔ.”*+
18 Jɛhɔashi nkumekanga k’Isariyɛlɛ akatomɛ Amaziya nkumekanga ka Juda dikɛndji ate: “Ɔkɔdi w’atɛndɛ wa la Lɛbanɔna akatomɛ olondo wa la Lɛbanɔna dikɛndji ate: ‘Etawɔ dia ɔnami ntshuka ɔnayɛ la womoto.’ Koko nyama kɛmɔtshi ka l’okonda wa la Lɛbanɔna kakete laawɔ, ko kakahɔtshahɔtsha ɔkɔdi akɔ w’atɛndɛ.
19 Wɛ akate wate: ‘Eenda, dimi* lambɔlɛndja Ɛdɔmɛ.’+ Ɔnkɔnɛ otema ayɛ waya la lotamanya ndo woyanga lotombo. Koko wonya ɔnɛ, tshikala lo luudu* layɛ hita. Lande na kayayangɛyɛ elanyelo ndo ɔkwɛlɔ ayɛ wɛ la Juda?”
20 Koko Amaziya komboka,+ nɛ dia dui sɔ diakaye oma le Nzambi ka mɛtɛ dia mbakimɔ lo anya w’otunyi,+ dikambo vɔ wakayele tozambizambi t’ase Ɛdɔmɛ.+
21 Ɔnkɔnɛ Jɛhɔashi nkumekanga k’Isariyɛlɛ akatshu, ko nde la Amaziya nkumekanga ka Juda wakalɔ la Bɛtɛ-Shɛmɛshɛ+ k’ase Juda.
22 Isariyɛlɛ akalɛndja Juda, ko onto l’onto akalawɔ otsha lakande.*
23 Jɛhɔashi nkumekanga k’Isariyɛlɛ akande Amaziya nkumekanga ka Juda, ɔna Jɛhɔashi ɔna Jɛhɔahaza* la Bɛtɛ-Shɛmɛshɛ. Ko nde akatshu la nde la Jɛrusalɛma ndo nde akatondola wosho lo ehele ka lokombo la Jɛrusalɛma, oma la Soko di’Efrayimɛ+ polo la Soko dia Tshuku,+ kubita 400.*
24 Nde akɔshi paonyi tshɛ la mfɛsa ndo diangɔ tshɛ diaki lo luudu la Nzambi ka mɛtɛ kaamɛ la* Ɔbɛdɛ-Ɛdɔmɛ ndo lo waombelo wa lo luudu la nkumekanga,*+ kaamɛ ndo esunge. Oma laasɔ, nde akakalola la Samariya.
25 Amaziya+ ɔna Jɛhɔashi nkumekanga ka Juda akasɛnɛ ɛnɔnyi 15 l’ɔkɔngɔ wa nyɔi ka Jɛhɔashi+ ɔna Jɛhɔahaza nkumekanga k’Isariyɛlɛ.+
26 Lo kɛnɛ kendana l’etenyi kekina k’ɔkɔndɔ wa Amaziya, oma l’etatelo polo l’ekomelo kawɔ, shi awui asɔ fundama lo Dibuku dia Nkumi ya dikanga ya Juda ndo y’Isariyɛlɛ?
27 Oma ko etena kakatshike Amaziya ndjela Jehowa, vɔ wakawɔtwɛ sheke+ la Jɛrusalɛma, ko nde akalawɔ la Lakishi ndo vɔ wakatome apami dia mboyela la Lakishi ko wakatoodiaka lɛkɔ.
28 Ɔnkɔnɛ, vɔ wakakalola la nde lo waa mfalasa ko wakayookundɛ lale watshɛnde l’osomba wa Juda.
Nɔtɛ ka l'ɛse ka dikatshi
^ Tshɛk., “wakasɔnama.”
^ Kana “tohomane elungi l’elungi.”
^ Tshɛk., “wɛ.”
^ Kana “luudu l’owandji.”
^ Tshɛk., “lo mvudu y’apɛma.”
^ Nde kelamɛ nto Ahaziya.
^ Kana “diakoombaka.”
^ Kana “luudu l’owandji.”
