2 Ɛkɔndɔ 28:1-27
28 Ahaza+ aki l’ɛnɔnyi 20 lam’akandayala nkumekanga ndo nde akolɛ l’edja k’ɛnɔnyi 16 la Jɛrusalɛma. Nde kosala kɛnɛ kaki ɔlɔlɔ lo washo wa Jehowa oko wakasale Davidɛ tshɛnde.+
2 Koko nde akakɛndakɛnda lo mboka ya nkumi ya dikanga y’Isariyɛlɛ,+ ndo nde akasale mpingu ya waa Baala la mbolo ya lɔlɛlɔla.+
3 Ndo nto, nde akatshumbe olambo lo Okidi w’Ɔna Hinɔmɛ* ndo akatshumbe anande w’apami lo dja+ lo ndjela ditshelo dia wɔnɔnyi dia wedja+ wele Jehowa akawatshanya oma la ntondo k’ase Isariyɛlɛ.
4 Ndo nto, nde akatetemala nambola ndo ntshumba olambo lo ahole wa la diko,+ lo tokonakona ndo l’ɛse k’osongo tshɛ wele l’akatshi efula.+
5 Ko Jehowa Nzambi kande akookimɔ lo anya wa nkumekanga ka Suriya,+ ko vɔ wakɔɔlɛndja ndo wakande anto efula ka mamba mfumbe ndo wakaatɔlɛ la Damasɛkɛ.+ Nde akakimɔma ndo l’anya wa nkumekanga k’Isariyɛlɛ ɔnɛ lakadiake anto ande efula ka mamba.
6 Nɛ dia Peka+ ɔna Rɛmaliya akadiake anto nunu lokama l’akumi ahende (120 000) la Juda lushi 1; vɔ tshɛ waki apami wa wolo, nɛ dia vɔ wakoke Jehowa Nzambi ka watshɛwɔ ɔkɔngɔ.+
7 Ndo Zikiri ɔndɔshi wa ta w’oseka Efrayimɛ akadiake Maseya ɔna nkumekanga nde la Azirikama ɔnɛ laki la ɔkɛndɛ wa luudu l’owandji, ndo Elekana lakahɔna la nkumekanga.
8 Ndo nto, ase Isariyɛlɛ wakande anto nunu nkama hiende (200 000) l’atei w’anangɛwɔ oko mfumbe, mbuta ate, ana w’apami ndo ana wa wamato. Vɔ wakɔshi ndo diangɔ dia dimbo efula, ko wakatɔlɛ diangɔ dia dimbo diakɔ la Samariya.+
9 Koko omvutshi ɔmɔtshi wa Jehowa, lokombo lande Ɔdɛdɛ aki laawɔ. Nde akatshu dia tohomana l’asɔlayi wakayayaka la Samariya ko akawatɛ ate: “Nyolonge! Lam’ele Jehowa Nzambi ka watshɛnyu akomalɛ ase Juda, diakɔ diakandaakimɔ lo anya anyu,+ ko nyakaadiake la nkɛlɛ k’efula kambokoma polo l’olongo.
10 Wonya ɔnɛ, nyolanga mbetɛ ase Juda ndo ase Jɛrusalɛma ekambi anyu w’apami ndo wa wamato.+ Ko, aha ndo nyu mbele la onongo la ntondo ka Jehowa Nzambi kanyu?
11 Kakianɛ, nyompokame ndo nyokaloya mfumbe yakanyande oma l’atei w’anangɛnyu, nɛ dia nkɛlɛ kadɔdɔ ka Jehowa kekɔ le nyu.”
12 Ko ewandji ɛmɔtshi w’aseka Efrayimɛ, Azariya ɔna Jɛhɔhanana, Bɛrɛkiya ɔna Meshilɛmɔtɛ, Jɛhizikiya ɔna Shaluma ndo Amasa ɔna Hadilai wakakengɛ wanɛ wakayakalolaka oma lo ta,
13 ndo wakawatɛ vate: “Tanyɔtɔke la mfumbe nyɛ lanɛ, nɛ dia dui sɔ diayotɛndja onongo la ntondo ka Jehowa. Kɛnɛ kalanganyu nsala kayotahatanyiya pɛkato ndo kayoleka tɛndja onongo, nɛ dia onongo wele la so wamboshilaka monga woke ndo nkɛlɛ kadɔdɔ ka Nzambi kekɔ le Isariyɛlɛ.”
14 Ko asɔlayi waki la dihomɔ dia ta wakakimɔ mfumbe ndo diangɔ dia dimbo+ le ewandji ndo le etshumanelo k’otondo.
15 Oma laasɔ, apami wakawole nkombo wakemala ndo wakɔshi mfumbe yakɔ, ko vɔ wakasha wanɛ tshɛ waki la otaka l’atei awɔ ahɔndɔ oma lo diangɔ dia dimbo. Ɔnkɔnɛ, vɔ wakaalɔtsha ahɔndɔ ndo wakawasha sabata, mbo ya ndɛ ndo ya nnɔ kaamɛ la esɔ ka nshinola. Ndo nto, vɔ wakɛmbɛ wanɛ wakalɛmbɛ lo mponda, ko wakaatɔlɛ le anangɛwɔ la Jeriko, osomba w’atoko. L’ɔkɔngɔ wa laasɔ, vɔ wakakalola la Samariya.
16 L’etena kɛsɔ, nkumekanga Ahaza akalɔmbɛ nkumi ya dikanga y’Asuriya ekimanyielo.+
17 Mbala kekina nto, ase Ɛdɔmɛ wakɔtwɛ ase Juda, wakaalɔsha ndo wakande mfumbe.
18 Ase Filistiya+ vɔ lawɔ wakɔtwɛ esomba wa Shɛfɛla+ ndo Nɛngɛbɛ ka la Juda la shashimoya, ko wakɔshi Bɛtɛ-Shɛmɛshɛ,+ Aidjalɔna,+ Ngederɔtɛ, Sɔkɔ la tosombasomba tendɛ le diɔ,* Timina+ la tosombasomba tendɛ le tɔ ndo Ngimizo la tosombasomba tendɛ le diɔ, ko vɔ wakadjasɛ lɛkɔ.
19 Jehowa akasha Juda nsɔnyi l’ɔtɛ wa Ahaza nkumekanga k’Isariyɛlɛ, nɛ dia nde aketawɔ di’ase Juda ntsha akambo otshatsha, dui diakayaakonya dia nshisha kɔlamelo le Jehowa lo yɛdikɔ y’efula.
20 Tilingatɛ-Pilinɛsɛrɛ+ nkumekanga k’Asuriya akayoya dia ndjɔɔlɔsha ndo akawosha lɔkɔnyɔ+ lo dihole dia mbokeketsha.
21 Nɛ dia Ahaza akɔshi diangɔ dia lo luudu la Jehowa ndo dia lo luudu la nkumekanga*+ ndo dia lo mvudu y’ewandji, ko akasha nkumekanga k’Asuriya oko woshasha, koko dui sɔ kombokimanyiya kaanga yema.
22 Etena kakinde la shɔkɔ, nkumekanga Ahaza akaleke nshisha kɔlamelo otsha le Jehowa.
23 Nde akatatɛ nambola tozambizambi ta la Damasɛkɛ+ takɔɔlɛndja+ elambo ndo nde akate ate: “Lam’ele tozambizambi ta nkumi ya dikanga ya Suriya tekɔ lo mbakimanyiya, dimi layanga tilambola elambo dia tɔ kimanyiyami.”+ Koko tɔ takasale dia nde la Isariyɛlɛ w’otondo ntakana.
24 Ndo nto, Ahaza akasanganya diangɔ dia lo luudu la Nzambi ka mɛtɛ. Oma laasɔ, nde akoodiodia diangɔ dia lo luudu la Nzambi ka mɛtɛ,+ akadihe nkuke ya lo luudu la Jehowa+ ndo akayasalɛ dilambwelo lo tshuku tshɛ dia Jɛrusalɛma.
25 Lo esomba tshɛ wa la Juda, nde akasale ahole wa la diko dia tshumbɛka tozambizambi+ tokina elambo ndo nde akokiya Jehowa Nzambi ka watshɛnde nkɛlɛ.
26 Lo kɛnɛ kendana l’etenyi kekina k’ɔkɔndɔ ande, akambo tshɛ wakandasale oma l’etatelo polo l’ekomelo kawɔ, awui asɔ fundama lo Dibuku dia Nkumi ya dikanga ya Juda ndo y’Isariyɛlɛ.+
27 Oma laasɔ, Ahaza aketama dia momuya kaamɛ la watshɛnde ndo wakookundɛ l’osomba, la Jɛrusalɛma nɛ dia vɔ kombɔtɔla lo waombo wa nkumi ya dikanga y’Isariyɛlɛ.+ Ko ɔnande Hɛzɛkiya akayala nkumekanga lo dihole diande.
Nɔtɛ ka l'ɛse ka dikatshi
^ Enda Elembetshielo, “Ngɛhɛna.”
^ Kana “tosukanyi la diɔ.”
^ Kana “luudu l’owandji.”
