2 Ɛkɔndɔ 35:1-27
35 Jɔsiya akasalɛ Jehowa Fɛtɛ k’Elekanelo+ la Jɛrusalɛma, ndo wakadiake nyama k’olambo w’Elekanelo+ lo ngɔndɔ ka ntondo nshi 14.+
2 Nde akasha ɛlɔmbɛdi ɛkɛndɛ awɔ ndo akaakeketsha dia vɔ nkamba olimu awɔ wa lo luudu la Jehowa.+
3 Oma laasɔ, nde akatɛ ase Lɛwi, embetsha wa lo Isariyɛlɛ w’otondo,+ wanɛ waki ekila le Jehowa ate: “Nyodje Ɔshɛtɛ w’ekila lo luudu lakake Sɔlɔmɔna ɔna Davidɛ nkumekanga k’Isariyɛlɛ;+ nyu hanyotowɛmba nto lo ahɛka anyu.+ Nyokambɛke Jehowa Nzambi kanyu ndo wodja ande w’Isariyɛlɛ.
4 Nyoyalɔngɔsɔlɛ lo ndjela mvudu ya washɛnyu lo elui anyu, lo ndjela kɛnɛ kakafunde Davidɛ+ nkumekanga k’Isariyɛlɛ ndo ɔnande Sɔlɔmɔna.+
5 Nyemale lo dihole di’ekila lo elui lo ndjela mvudu ya washe anangɛnyu, anto akina tshɛ* onto l’onto lo ndjela olui wa luudu la washe ase Lɛwi.
6 Nyodiake nyama k’olambo w’Elekanelo,+ nyoyakidia ndo nyosale ɛlɔngɔswɛlɔ dikambo dia anangɛnyu dia nkotsha ɔtɛkɛta wa Jehowa wakandate lo tshimbo ya Mɔsɛ.”
7 Jɔsiya akasha wodja dongalonga, ɛsɔngɔ w’ɛkɔkɔ wa waomi ndo ɛsɔngɔ wa weombe wa mbudi dikambo dia olambo w’Elekanelo, tshɛ tshɛ nunu akumi asato (30 000), mbidja ndo ngɔmbɛ nunu sato (3 000) dikambo dia wanɛ tshɛ waki laawɔ. Diangɔ sɔ diaki diangɔ dia nkumekanga ndamɛ.+
8 Ewandji ande vɔ lawɔ wakakimɔ woshasha wa la lolango dikambo dia wodja, dikambo dia ɛlɔmbɛdi ndo dikambo dia ase Lɛwi. Hilikiya,+ Zɛkariya ndo Jɛhiyɛlɛ ɛnɔmbɔdi wa lo luudu la Nzambi ka mɛtɛ wakasha ɛlɔmbɛdi nyama nunu pende la nkama shamalo (2 600) y’olambo w’Elekanelo ndo ngɔmbɛ 300.
9 Konaniya nde la Shemaya la Netanɛlɛ, anango kaamɛ la Hashabiya, Jeyɛlɛ ndo Jɔzabada ewandji w’ase Lɛwi wakakimɔ nyama nunu tanu (5 000) y’olambo w’Elekanelo ndo ngɔmbɛ 500 dikambo dia ase Lɛwi.
10 Olimu wakalɔngɔsɔma, ko ɛlɔmbɛdi wakemala lo ahole awɔ, ndo ase Lɛwi lo ndjela elui awɔ,+ oko wakadjanga nkumekanga.
11 Vɔ wakadiake nyama y’olambo w’Elekanelo,+ ko ɛlɔmbɛdi wakamɔngɛ dikila diakawɔshi oma le wɔ+ etena kakowolaka ase Lɛwi nkoho ya nyama+ yakɔ.
12 Oma laasɔ, vɔ wakalɔngɔsɔla elambo wa lotshumba dia mbakahanya le anto akina tshɛ wakatshumana lo ndjela mvudu ya washɛwɔ, dia nambola elambo akɔ le Jehowa lo ndjela kɛnɛ kofundami lo dibuku dia Mɔsɛ; ngasɔ mbakawasale ndo la ngɔmbɛ.
13 Vɔ wakakatɛ* nyama k’olambo w’Elekanelo lo dja lo ndjela mbekelo+ kawɔ, ndo vɔ wakakatɛ elambo w’ekila lo mpoke, mpoke y’awomba ndo mpanu; l’ɔkɔngɔ wa laasɔ, vɔ wakayiela esadi le anto akina tshɛ.
14 Oma laasɔ, vɔ wakasale ɛlɔngɔswɛlɔ dikambo diawɔ vɔamɛ ndo dikambo dia ɛlɔmbɛdi, nɛ dia ɛlɔmbɛdi, tokanula ta Arɔna wakalambolaka elambo wa lotshumba ndo diangɔ dia wata polo lam’akadje wonya; ɔnkɔnɛ, ase Lɛwi wakasale ɛlɔngɔswɛlɔ dikambo diawɔ vɔamɛ ndo dikambo dia ɛlɔmbɛdi, tokanula ta Arɔna.
15 Amembi, mbuta ate ana w’apami wa Asafu+ waki lo ahole awɔ lo ndjela didjango dia Davidɛ,+ Asafu,+ Hemana ndo Jedutuna+ ɔmɛnyi wa waɛnɛlɔ wa nkumekanga; ndo alami w’asoko waki lo asoko wotshikitanyi.+ Komonga ohomba dia vɔ ntshika olimu awɔ, nɛ dia anangɛwɔ ase Lɛwi wakasale ɛlɔngɔswɛlɔ dikambo diawɔ.
16 Ɔnkɔnɛ, olimu tshɛ wa Jehowa wakalɔngɔsɔma lushi lɔsɔ dia nsala Fɛtɛ k’Elekanelo+ ndo dia nambola elambo wa lotshumba lo elambwelo ka Jehowa, lo ndjela didjango dia nkumekanga Jɔsiya.+
17 Ase Isariyɛlɛ waki laawɔ wakasale Fɛtɛ k’Elekanelo etena kɛsɔ ndo Fɛtɛ ka mapa waha la wodoya l’edja ka nshi 7.+
18 Fɛtɛ k’Elekanelo ka ngasɔ katasalemaka ndooko lushi lo Isariyɛlɛ, ntatɛ lo nshi y’omvutshi Samuɛlɛ, ndo ndooko nkumekanga ka l’Isariyɛlɛ kakasale Fɛtɛ k’Elekanelo kele oko kɛnɛ kakasale Jɔsiya,+ ɛlɔmbɛdi, ase Lɛwi, ase Juda tshɛ l’ase Isariyɛlɛ waki laawɔ ndo ase Jɛrusalɛma.
19 Fɛtɛ k’Elekanelo kɛsɔ kakasalema lo ɔnɔnyi wa 18 w’ɛlɔmbwɛlɔ ka Jɔsiya.
20 L’ɔkɔngɔ w’akambo asɔ tshɛ, lam’akalɔngɔsɔla Jɔsiya tɛmpɛlɔ,* Neko+ nkumekanga k’Edjibito akaye dia ndjɔlɔsha Karakɛmishɛ suke la Efaratɛ. Ko Jɔsiya akatshu dia tɔɔlɔsha.+
21 Ko nde akootomɛ akɛndji dia towotɛ ɔnɛ: “Nkumekanga ka Juda le, dikambo sɔ akendadiɔ? Aha dia ndjokɔlɔsha kayamaye ɛlɔ, koko dia ndjɔlɔsha ase luudu lokina, ndo Nzambi kata dia dimi pombaka nsamanya. Lo wahɔ ayɛ, tshika ndɔshana la Nzambi ɔnɛ lele kaamɛ la mi; naka aha ngasɔ, kete nde ayokolanya.”
22 Koko Jɔsiya kombotshika; nde akatshikitanya ɛnamelo kande+ dia mbɔlɔsha ndo nde kompokamɛ ɔtɛkɛta wa Neko waki oma l’onyɔ wa Nzambi. Ɔnkɔnɛ nde akatshu dia tɔlɔsha lo Okidi wa Mengido.+
23 Amboki wa mpito wakatshieta nkumekanga Jɔsiya, ko nkumekanga akatɛ ekambi ande ate: “Nyominya oma lanɛ, nɛ dia lambohomɔ wolo.”
24 Ko ekambi ande wakawɛmbɛ lo pusupusu ndo wakawahenya lo pusupusu kande ka 2 ka ta, ko wakɔɔtɔlɛ la Jɛrusalɛma. Ɔnkɔnɛ nde akavu ndo wakookundɛ lo waombo wa watshɛnde,+ ko Juda y’otondo ndo Jɛrusalɛma wakalele Jɔsiya.
25 Ko Jɛrɛmiya+ akembe lo dikambo dia Jɔsiya, ndo amembi tshɛ w’apami+ la wa wamato wekɔ lo ntetemala memba nkembo y’otanda* lo dikambo dia Jɔsiya polo ndo ɛlɔ; ko yɛdikɔ yakɔsama dia yɔ pombaka membama lo Isariyɛlɛ, ndo yɔ fundama l’atei wa nkembo y’otanda.
26 Lo kɛnɛ kendana l’etenyi kekina k’ɔkɔndɔ wa Jɔsiya ndo etsha ande wa ngandji ka kɔlamelo, lo nkitanyiya kɛnɛ kakafundama lo Ɛlɛmbɛ wa Jehowa,
27 ndo kɛnɛ kakandasale, oma l’etatelo polo l’ekomelo kawɔ, awui asɔ fundama lo Dibuku dia Nkumi ya dikanga y’Isariyɛlɛ ndo ya Juda.+
Nɔtɛ ka l'ɛse ka dikatshi
^ Tshɛk., “ana w’apami w’anto.”
^ Kana ondo “wakafumbe.”
^ Tshɛk., “luudu.”
^ Kana “lomamba.”
