2 Ɛkɔndɔ 36:1-23
36 Oma laasɔ, anto wa lo wodja wakɔshi Jɛhɔahaza+ ɔna Jɔsiya, ko wakawetɛ nkumekanga la Jɛrusalɛma lo dihole dia she.+
2 Jɛhɔahaza aki l’ɛnɔnyi 23 lam’akandayala nkumekanga ndo nde akolɛ l’edja ka ngɔndɔ 3 la Jɛrusalɛma.
3 Koko nkumekanga k’Edjibito akawonya lo lowandji la Jɛrusalɛma ndo akahike dia wodja nkimɔ kibawo ka talata* 100 ya mfɛsa ndo lotalata la paonyi.+
4 Ndo nto, nkumekanga k’Edjibito aketɛ Eliyakima w’ɔnango Jɛhɔahaza nkumekanga ka Juda ndo ka Jɛrusalɛma ndo akatshikitanya lokombo lande, ko akawɔlɛ Jɛhɔyakima. Koko Neko+ akɔshi Jɛhɔahaza y’ɔnango, ko akɔɔtɔlɛ l’Edjibito.+
5 Jɛhɔyakima+ aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 11 la Jɛrusalɛma. Nde akatetemala nsala kɛnɛ kaki kɔlɔ lo washo wa Jehowa Nzambi kande.+
6 Nɛbukadinɛza+ nkumekanga ka Babilɔna akaye dia ndjɔɔlɔsha la oyango wa mbokeleka la mɔlɔla 2 wa nkonga dia mbɔtɔla la Babilɔna.+
7 Nɛbukadinɛza akatɔlɛ diangɔ dimɔtshi di’oma lo luudu la Jehowa otsha la Babilɔna ko akatodidja lo luudu lande la lowandji la Babilɔna.+
8 Lo kɛnɛ kendana l’etenyi kekina k’ɔkɔndɔ wa Jɛhɔyakima, akambo wa wɔnɔnyi wakandasale ndo akambo wa kɔlɔ wendana la nde, awui asɔ fundama lo Dibuku dia Nkumi ya dikanga y’Isariyɛlɛ ndo ya Juda; ko ɔnande Jɛhɔyakina akayala nkumekanga lo dihole diande.+
9 Jɛhɔyakina+ aki l’ɛnɔnyi 18 lam’akandayala nkumekanga ndo nde akolɛ l’edja ka ngɔndɔ 3 la nshi 10 la Jɛrusalɛma; ndo nde akatetemala nsala kɛnɛ kaki kɔlɔ lo washo wa Jehowa.+
10 L’etatelo k’ɔnɔnyi,* nkumekanga Nɛbukadinɛza akatome dui dia vɔ toya la nde la Babilɔna+ kaamɛ la diangɔ dia nɛmɔ dia lo luudu la Jehowa.+ Ko nde aketɛ Zɛdɛkiya ɔnango she nkumekanga ka Juda ndo ka Jɛrusalɛma.+
11 Zɛdɛkiya+ aki l’ɛnɔnyi 21 lam’akandayala nkumekanga ndo nde akolɛ l’edja k’ɛnɔnyi 11 la Jɛrusalɛma.+
12 Nde akatetemala nsala kɛnɛ kaki kɔlɔ lo washo wa Jehowa Nzambi kande. Nde kondjakitshakitsha la ntondo k’omvutshi Jɛrɛmiya+ lakatɛkɛtaka lo ndjela didjango dia Jehowa.
13 Ndo nto, nde akatɔmbɔkwɛ nkumekanga Nɛbukadinɛza+ ɔnɛ lakootshibia lo lokombo la Nzambi, ndo nde akatetemala monga ɔtɛ wolo,* akakeketsha otema ndo akatone dia nkalola le Jehowa Nzambi k’Isariyɛlɛ.
14 Ewandji tshɛ w’ɛlɔmbɛdi kaamɛ la wodja wakashisha kɔlamelo lo yɛdikɔ y’efula lo nsala awui tshɛ wa wɔnɔnyi w’ase wedja, ndo vɔ wakadje luudu la Jehowa+ lakandakidia la Jɛrusalɛma mindo.
15 Jehowa Nzambi ka watshɛwɔ akatetemala mbahɛmɔla lo tshimbo y’akɛndji ande, awahɛmɔla mbala ko mbala, nɛ dia nde akokaka wodja ande ndo dihole dia edjaselo kande kɛtshi.
16 Koko vɔ wakatetemala mɔnyɔla akɛndji wa Nzambi ka mɛtɛ+ ndo wakɔnyɔla ɛtɛkɛta ande+ ndo wakɔlɛ amvutshi ande+ polo lam’akaye nkɛlɛ ka Jehowa le wodja ande,+ polo ndo vɔ hawoyokoka nkɔnɔ.
17 Ɔnkɔnɛ nde akaatomɛ nkumekanga k’ase Kaladiya,+ ko nde akadiake ɛlɔngɔ awɔ w’apami la lokuwa la ta+ lo tɛmpɛlɔ kawɔ k’ekila;+ nde komboka ɔlɔngɔ a pami kana osekaseka w’emuma, osombe kana onto lele la ɛkɔmɔ kɛtshi.+ Nzambi akakimɔ awui tshɛ lo anya ande.+
18 Diangɔ tshɛ dia lo luudu la Nzambi ka mɛtɛ, dia weke ndo dia totshitshɛ, mbidja ndo diangɔ dia nɛmɔ dia lo luudu la Jehowa la diangɔ dia nɛmɔ dia nkumekanga la ewandji ande, nde akatɔlɛ diangɔ tshɛ otsha la Babilɔna.+
19 Nde akatshumbe luudu la Nzambi ka mɛtɛ,+ akatola mpele dia Jɛrusalɛma,+ akatshumbe totshoto tayɔ tshɛ takadingama la mpele la dja, ndo akalanya ɛngɔ tshɛ ka nɛmɔ.+
20 Wanɛ wakahande la lokuwa la ta,+ nde akaatɔlɛ mfumbe otsha la Babilɔna, ko vɔ wakatonga ekambi ande+ ndo anande w’apami polo lam’akatatɛ mbolɛ+ diolelo* dia Pɛrɛsiya,
21 dia nkotsha ɔtɛkɛta wa Jehowa wakandate lo tshimbo ya Jɛrɛmiya,+ polo ndo wodja wambofuta sabato yawɔ.+ Nshi tshɛ yakawatshikala tɔngɔ to, vɔ waki lo sabato, dia nkotsha ɛnɔnyi 70.+
22 L’ɔnɔnyi wa ntondo w’ɛlɔmbwɛlɔ ka Kurɔ+ nkumekanga ka Pɛrɛsiya, dia ɔtɛkɛta wa Jehowa wakandate lo tshimbo ya Jɛrɛmiya+ kotshama, Jehowa akasɛngiya yimba ya Kurɔ nkumekanga ka Pɛrɛsiya dia mbisha diewoyelo lo diolelo diande di’otondo, diewoyelo diakandafunde lofunda+ ate:
23 “Kurɔ nkumekanga ka Pɛrɛsiya kata ate: ‘Jehowa Nzambi ka l’olongo akambisha waolelo tshɛ wa la nkɛtɛ,+ ndo nde akambisha ɔkɛndɛ wa mbokɛ luudu la Jɛrusalɛma ya la Juda.+ Onto tshɛ la l’atei anyu lele l’atei wa wodja ande ɔsɔ tshɛ, Jehowa Nzambi kande ayale la nde ndo atshu lɛkɔ.’”+
Nɔtɛ ka l'ɛse ka dikatshi
^ Ondo l’eleko kamɔnga akatshi.
^ Tshɛk., “nde akakeketsha nkingo kande.”
^ Kana “lowandji.”
