2 Ɛkɔndɔ 5:1-14
5 Ko Sɔlɔmɔna akashidiya olimu tshɛ wakandahombe nkamba dikambo dia luudu la Jehowa.+ Oma laasɔ, Sɔlɔmɔna akadje diangɔ diakakidia+ Davidɛ dia she l’etei ndo nde akadje mfɛsa, paonyi ndo diangɔ dikina tshɛ lo waombelo wa lo luudu la Nzambi ka mɛtɛ.+
2 L’etena kɛsɔ, Sɔlɔmɔna akatshumanya dikumanyi dia l’Isariyɛlɛ, ɛtɛ wa waoho tshɛ, ewandji wa mvudu ya washɛwɔ wa l’Isariyɛlɛ. Vɔ wakaye la Jɛrusalɛma dia ndjɛmba ɔshɛtɛ wa sheke wa Jehowa oma l’Osomba wa Davidɛ,+ mbuta ate Siɔna.+
3 Apami tshɛ w’ase Isariyɛlɛ wakatshumana la ntondo ka nkumekanga lo fɛtɛ* kasalema lo ngɔndɔ ka 7.+
4 Ko dikumanyi tshɛ dia l’Isariyɛlɛ wakaye ndo ase Lɛwi wakɛmbɛ Ɔshɛtɛ.+
5 Vɔ wakɛmbɛ Ɔshɛtɛ akɔ, luudu la dipɛma l’esanganelo+ ndo diangɔ di’ekila tshɛ diaki lo luudu lakɔ la dipɛma. Ɛlɔmbɛdi l’ase Lɛwi* mbakadiɛmbɛ.
6 Nkumekanga Sɔlɔmɔna nde l’olui w’otondo w’ase Isariyɛlɛ wakatshumana dia tohomana la nde waki la ntondo k’Ɔshɛtɛ. Ɔnkɔnɛ, wakalambola ɛkɔkɔ+ ndo ngɔmbɛ efula woho wele kokoka mbadiema kana mbeya lofulo lawɔ.
7 Oma laasɔ, ɛlɔmbɛdi wakɔtshiya ɔshɛtɛ wa sheke wa Jehowa lo dihole diawɔ, lo luudu loleki l’etei, Dihole dioleki Ekila, l’ɛse k’ahafu w’akɛruba.+
8 Ahafu w’akɛruba wakasandjɔ la diko dia dihole diaki Ɔshɛtɛ, ko akɛruba akɔ wakakombaka Ɔshɛtɛ la esembe awɔ+ oma la diko.
9 Esembe akɔ waki etale efula woho wele tɔsɔdi t’esembe akɔ takɛnamaka oma lo Dihole di’Ekila la ntondo ka luudu loleki l’etei, koko vɔ kɔmɛnamaka l’andja. Vɔ wekɔ laawɔ polo ndo ɛlɔ.
10 Ndooko ɛngɔ kekina kaki lo Ɔshɛtɛ, paka pase 2 diakadje Mɔsɛ lɔkɔ la Hɔrɛbɛ+ lam’akadje Jehowa sheke+ nde l’ase Isariyɛlɛ etena kakawayatombaka oma l’Edjibito.+
11 Lam’akatombe ɛlɔmbɛdi oma lo dihole di’ekila (nɛ dia ɛlɔmbɛdi tshɛ waki laawɔ wakayakidia,+ oyadi olui akɔna wakiwɔ),+
12 amembi tshɛ w’ase Lɛwi+ waki aseka Asafu,+ aseka Hemana,+ aseka Jedutuna+ ndo anawɔ w’apami la anangɛwɔ wakalɔtɛ ahɔndɔ w’amɛna efula, wokime nsɛmbalɛ, dihomahoma di’eshinga ndo nsɛsɛ; vɔ wakemala lo ɛstɛ ka elambwelo, ndo ɛlɔmbɛdi 120 wakadaka amama+ waki kaamɛ la wɔ.
13 Etena kakatombolaka ndo kakashaka ambidi w’amama ndo amembi Jehowa losaka lo kaamɛ, ndo lam’akatombaka wendjo oma l’amama ndo oma lo nsɛmbalɛ kaamɛ la dihomahoma dikina etena kakawatombolaka Jehowa, “nɛ dia nde ekɔ ɔlɔlɔ; ngandji kande ka kɔlamelo tshikalaka pondjo,”+ luudu, mbuta ate luudu la Jehowa lakalole la dinge.+
14 Ɛlɔmbɛdi komonga nto la akoka wa memala dia nkamba l’ɔtɛ wa dinge, nɛ dia lotombo la Jehowa lakalole lo luudu la Nzambi ka mɛtɛ.+
