2 Ɛkɔndɔ 7:1-22
7 Kam’akashidiya Sɔlɔmɔna nɔmba,+ dja yakaholɔ oma l’olongo+ ko yakatshumbe olambo wa lotshumba ndo elambo ekina, ko lotombo la Jehowa lakalole lo luudu.+
2 Ɛlɔmbɛdi kokoka mbɔtɔ lo luudu la Jehowa, nɛ dia lotombo la Jehowa lakalole lo luudu la Jehowa.+
3 Ase Isariyɛlɛ tshɛ wakendaka lam’akaholɔ dja yakɔ, ko lotombo la Jehowa laki laadiko dia luudu lakɔ, ko vɔ wakakɔlama dungi polo la nkɛtɛ y’odihe ndo wakakusama ko wakasha Jehowa losaka, “nɛ dia nde ekɔ ɔlɔlɔ; ngandji kande ka kɔlamelo tshikalaka pondjo.”
4 Oma laasɔ, nkumekanga nde l’anto tshɛ wakalambola elambo la ntondo ka Jehowa.+
5 Nkumekanga Sɔlɔmɔna akalambola olambo wa ngɔmbɛ nunu akumi ahende la pende (22 000) ndo ɛkɔkɔ nunu lokama l’akumi ahende (120 000). Ko nkumekanga nde l’anto tshɛ wakasapola luudu la Nzambi ka mɛtɛ.+
6 Ɛlɔmbɛdi wakemala lo ahole awɔ w’olimu oko wakemala ase Lɛwi waki la dihomahoma diakakambaka la wɔ etena kakawembɛka Jehowa esambo.+ (Nkumekanga Davidɛ akasale dihomahoma sɔ dia mbishaka Jehowa losaka, “nɛ dia ngandji kande ka kɔlamelo tshikalaka pondjo,” etena kakatombolaka Davidɛ kaamɛ la wɔ.*) Ɛlɔmbɛdi wakadaka amama la wolo+ la ntondo kawɔ etena kakemala ase Isariyɛlɛ tshɛ.
7 Oma laasɔ, Sɔlɔmɔna akakidia etenyi ka l’atei atei ka sɛkɛ diaki la ntondo ka luudu la Jehowa, nɛ dia laawɔ kakandahombe nambola elambo wa lotshumba+ ndo diangɔ dia wata dia l’elambo w’osanga, dikambo elambwelo ka nkonga+ kakasale Sɔlɔmɔna kokoka la elambo wa lotshumba, elambo wa ntɔngɔ+ ndo diangɔ dia wata.+
8 L’etena kɛsɔ, Sɔlɔmɔna akasale fɛtɛ kaamɛ l’ase Isariyɛlɛ tshɛ, etshumanelo ka woke efula k’oma la Lɛbɔ-Hamatɛ* polo l’Okidi w’ashi* wa l’Edjibito+ l’edja ka nshi 7.+
9 Koko lushi la 8,* vɔ wakasale losanganya la laande,+ nɛ dia wakasale osapwelo wa elambwelo l’edja ka nshi 7 ndo fɛtɛ l’edja ka nshi 7.
10 Oma laasɔ, lo ngɔndɔ ka 7 nshi 23, nde akakɛndja anto otsha lawakawɔ, watangɛnangɛna+ ndo wele la ɔlɔ l’etema l’ɔtɛ w’akambo w’ɛlɔlɔ wakasalɛ Jehowa Davidɛ, Sɔlɔmɔna ndo wodja ande w’Isariyɛlɛ.+
11 Ngasɔ mbakashidiya Sɔlɔmɔna wokelo wa luudu la Jehowa ndo luudu* la nkumekanga;+ ndo kɛnɛ tshɛ kaki l’otema wa Sɔlɔmɔna lo kɛnɛ kendana la luudu la Jehowa ndo luudu lande hita, nde akakisale dimɛna.+
12 Oma laasɔ, Jehowa akɛnama le Sɔlɔmɔna+ l’otsho, ko akawotɛ ate: “Dimi lamboka dɔmbɛlɔ diamboyosala ndo lamboyasɔnɛ dihole nɛ oko luudu la olambo.+
13 Lam’ayomodiha olongo ko mvula hayɔlɔ ndo lam’ayomodjangɛ ɛndjɔ dia vɔ ndɛ diangɔ dia lo wodja ndo naka lambotoma olando l’atei wa wodja ami,
14 naka wodja ami welamɛ+ lokombo lami wamboyakitshakitsha,+ wambɔlɔmba, wamboyanga elungi kami ndo wambokadimɔ oma lo mboka yawɔ ya kɔlɔ,+ dimi layoka oma l’olongo ko layowadimanyiya pɛkato kawɔ ndo layɔkɔnɔya wodja awɔ.+
15 Oma ko kakianɛ, washo ami wayendaka ndo atoyi ami wayohokamɛka dɔmbɛlɔ diasalema lo dihole nɛ.+
16 Dimi lambɔsɔna ndo lambokidia luudu lɔnɛ dia lokombo lami mongaka lɔkɔ tena tshɛ,+ ndo washo ami la otema ami wayongaka nshi tshɛ laawɔ.+
17 “Naka wɛ nkɛndakɛnda la ntondo kami oko wakakɛndakɛnda Davidɛ shɔ lo nsala kɛnɛ tshɛ kamomokodjangɛ ndo lo nkitanyiya wadjango ami la dombwelo diami,+
18 kete dimi layoshikikɛ kiti kayɛ ka lowandji+ oko wakamadje sheke la Davidɛ dia shɔ+ nte: ‘Ndooko onyake onto ɔmɔtshi la lo ɔlɔndji ayɛ kayolɛka lo Isariyɛlɛ.’+
19 Ko naka nyambokadimɔ ndo nyambohɛ wadjango ami la ɛlɛmbɛ ami wamomokitsha la ntondo kanyu, ko nyambotshɔ tokambɛ tozambizambi tokina ndo nyambotikusamɛ,+
20 dimi layokundola Isariyɛlɛ oma lo wodja ami wakamawasha,+ ndo luudu lɔnɛ lamomokidia dikambo dia lokombo lami, dimi layolinya oma lo washo ami ndo layolietɛ ɛngɔ ka lɔsɔkɔ* ndo ka diɔnyɔ le anto tshɛ.+
21 Luudu lɔnɛ layonga tota di’elanyelo. Onto tshɛ layeta laawɔ ayamba+ ndo ayota ate: ‘Lande na kakasalɛ Jehowa wodja ɔnɛ ndo luudu lɔnɛ nganɛ?’+
22 Ko wayowatɛ vate: ‘Nɛ dia vɔ wakasɛkɛ Jehowa+ Nzambi ka watshɛwɔ, ɔnɛ lakaatondja oma lo wodja w’Edjibito+ ko vɔ wakamamema tozambizambi tokina, wakatikusamɛ ndo wakatikambɛ.+ Diakɔ diakandawaela mpokoso kɛnɛ tshɛ.’”+
Nɔtɛ ka l'ɛse ka dikatshi
^ Ondo mendanaka la ase Lɛwi.
^ Kana “mbɔtwɛlɔ ka Hamatɛ.”
^ Enda Elembetshielo.
^ La wedi a pindju wa lushi la fɛtɛ, kana lushi la 15.
^ Kana “luudu l’owandji.”
^ Tshɛk., “yokedi.”
