2 Samuɛlɛ 11:1-27
11 L’etatelo k’ɔnɔnyi,* etena katotshɔka nkumi ya dikanga lo ata, Davidɛ akatome Jɔaba nde l’ekambi ande ndo asɔlayi w’ase Isariyɛlɛ tshɛ dia tolanya ase Amɔna, ko vɔ wakadinge Raba,+ koko Davidɛ akatshikala la Jɛrusalɛma.+
2 La dikɔlɔ dimɔtshi, Davidɛ aketɔ oma lo mbeto kande ko akatetetaka la diko dia luudu la nkumekanga.* Oma la diko diakɔ, nde akɛnyi womoto ɔmɔtshi ɔɔka ndo womoto akɔ aki olangala efula.
3 Davidɛ akatome onto ɔmɔtshi dia tombola awui wendana la womoto akɔ, ko nde akayowotɛ ate: “Toko Batɛ-Shɛba+ ɔna Eliyamɛ,+ wadi aki Uriya+ ose Hiti!”+
4 Oma laasɔ, Davidɛ akatome akɛndji dia towɔsa.+ Ko nde akaye le nde ndo akayetama la nde.+ (Dui sɔ diakasalema etena kakandayaɛdiaka oma lo mindo yande.*)+ L’ɔkɔngɔ diko, nde akakalola lakande.
5 Womoto akɔ akatshu diemi, ko akatomɛ Davidɛ dui ate: “Dimi laya la diemi.”
6 Ko Davidɛ akatomɛ Jɔaba dui ate: “Ontome Uriya ose Hiti.” Ɔnkɔnɛ Jɔaba akatome Uriya le Davidɛ.
7 Lam’akakome Uriya le nde, Davidɛ akawombola woho wele Jɔaba, woho wele asɔlayi ndo woho watete ta.
8 Oma laasɔ, Davidɛ akatɛ Uriya ate: “Tshɔka lo luudu layɛ kele tomuya.”* Lam’akamɔ Uriya oma lo luudu la nkumekanga, nkumekanga akootomɛ woshasha.*
9 Koko Uriya akalale la soko dia luudu la nkumekanga kaamɛ l’ekambi ekina tshɛ wa nkumɛnde, ndo nde kotshɔ lo luudu lande.
10 Ko wakatotɛ Davidɛ vate: “Uriya hatshwe lakande.” Ko Davidɛ akatɛ Uriya ate: “Shi wɛ oma lo lɔkɛndɔ? Lande na kahayatshwe lo luudu layɛ?”
11 Uriya akakadimola Davidɛ ate: “Ɔshɛtɛ,+ Isariyɛlɛ ndo Juda wekɔ lo tohombo ndo nkumɛmi Jɔaba la ekambi wa nkumɛmi wekɔ l’andja l’oswe. Laasɔ, onde dimi pombaka ntshɔ lo luudu lami dia tɔlɛ, tɔnɔ ndo tolala la wadɛmi?+ Lo mɛtɛ oko weyɛ la lɔsɛnɔ ndo wasɛnayɛ,* dimi hantosala dui sɔ!”
12 Ko Davidɛ akatɛ Uriya ate: “Tshikala nto lanɛ ɛlɔ ko dimi layokɔkɛndja loyi.” Ɔnkɔnɛ Uriya akatshikala la Jɛrusalɛma lushi lɔsɔ ndo la wedi a pindju.
13 Oma laasɔ, Davidɛ akawelɛ ko akale ndo akanɔ kaamɛ la nde ndo nde akawodjoya wanu. Koko la dikɔlɔ, nde akatombe ko akatolala lo mbeto kande nde l’ekambi waki nkumɛnde ndo nde kotshɔ lakande.
14 La pindju, Davidɛ akafundɛ Jɔaba mukanda, ko akootomɛwɔ le Uriya.
15 Nde akafunde lo mukanda ate: “Etsha Uriya la ntondo k’andɔshi wa ta lɛnɛ oleki ta wolo. Oma laasɔ, ko nyu nkalola l’ɔkɔngɔ ande dia nde kɔmama ko nde mvɔ.”+
16 Jɔaba akendaka osomba dimɛna, ko nde akemadia Uriya lɛnɛ akandeyaka dia andɔshi wa wolo wakikɔ.
17 Lam’akaye apami wa l’osomba ndo lam’akawalɔsha Jɔaba, ekambi wa Davidɛ ɛmɔtshi wakavu ndo Uriya ose Hiti aki l’atei wa wanɛ wakavu.+
18 Ko Jɔaba akatomɛ Davidɛ dui dia mbeewoya woho watete ta.
19 Nde akatɛ ɔkɛndji akɔ ate: “Lam’ayoyoshidiya mbutɛ nkumekanga akambo tshɛ wendana la ta,
20 nkumekanga mbeyaka momala ko nde kotɛ ate: ‘Lande na kakanyatshu ngasɔ suke l’osomba dia tɔlɔsha? Onde nyu kombeyaka dia vɔ wakahombe nyotshieta oma la diko di’ehele?
21 Onto akɔna akadiake Abimɛlɛkɛ+ ɔna Jerubɛshɛtɛ?*+ Shi womoto ɔmɔtshi kakoohondja dive di’ɔhɛlɔ dia la diko oma la diko di’ehele ko nde mbodiaka la Tɛbɛzɛ? Ko lande na kakanyatshu suke l’ehele?’ Ko wɛ mbuta wate: ‘Ndo okambi ayɛ Uriya ose Hiti kakavu.’”
22 Ko ɔkɛndji akɔ akatshu ndo akatotɛ Davidɛ kɛnɛ tshɛ kakootome Jɔaba dia tota.
23 Ɔkɛndji akɔ akatɛ Davidɛ ate: “Anto awɔ wakatoleke wolo ndo vɔ wakatombe dia ndjotɔlɔsha l’oswe, koko takawatshanya polo la soko di’osomba.
24 Amboki wa eta wakatshieta ekambi ayɛ oma la diko di’ehele, ko ekambi ɛmɔtshi wa nkumekanga wakavu, ndo okambi ayɛ Uriya ose Hiti akavu.”+
25 Ko Davidɛ akatɛ ɔkɛndji akɔ ate: “Tote Jɔaba wate: ‘Tetawɔke dia dikambo nɛ kotshindja wɔɔngɔ, nɛ dia onto tshɛ kokaka mvɔ lo ta. Nyɔlɔsha osomba akɔ wolo ndo nyowɔshi.’+ Ndo towokeketsha.”
26 Lam’akoke wadi aki Uriya dia Uriya omɛnde ambovɔ, nde akatatɛ ndela omɛnde.
27 Kam’akashile nshi y’otanda, Davidɛ akatome dui dia towɔsa, ko vɔ wakaye la womoto akɔ lo luudu lande, ko nde akayonga wadɛnde+ ndo akote la nde ɔna pami. Koko kɛnɛ kakasale Davidɛ kɔngɛnyangɛnya* Jehowa+ kaanga yema.
Nɔtɛ ka l'ɛse ka dikatshi
^ Mbuta ate l’eleko kamɔnga akatshi.
^ Kana “luudu l’owandji.”
^ Ondo mindo yande ya wɛnɛlɔ wa dikila.
^ Kana “yema ya nkumekanga,” mbuta ate yema yatomɛ kanga ngelo ɔngɛndangɛnda ande wa nɛmɔ.
^ Tshɛk., “tosole ekolo ayɛ.”
^ Kana “oko wasɛna anima ayɛ.”
^ Tshɛk., “kaki kɔlɔ lo washo wa.”
