2 Samuɛlɛ 13:1-39
13 Abisalɔma ɔna Davidɛ aki la kadiyɛnde k’olangala efula, lokombo lande Tamara.+ Ko Aminɔna+ ɔna Davidɛ akoolangaka.
2 Aminɔna aki la lonyangu l’efula polo lo nde ndjotata l’ɔtɛ wa kadiyɛnde Tamara, nɛ dia nde aki emuma ko akɛnama dia ndooko kakakoke Aminɔna nsala lo dikambo diande.
3 Aminɔna aki la ɔngɛnyi ɔmɔtshi, lokombo lande Jɛhɔnadaba,+ ɔna Shimɛa+ ɔnango Davidɛ. Jɛhɔnadaba aki pami kaki la yimba efula.
4 Ko nde akawombola ate: “Lande na keyɛ wɛ ɔna nkumekanga la lonyangu pindju tshɛ? Lande na kahayambutɛ?” Aminɔna akookadimola ate: “Lekɔ lo nanga Tamara kose aki+ Abisalɔma w’ɔnalengo.”
5 Jɛhɔnadaba akookadimola ate: “Etama lo mbeto kayɛ kele dimbiya hemɔ. Lam’ayoya shɔ dia ndjokenda, ko wɛ mbotɛ wate: ‘Lam’alangayɛ, etawɔ dia kadiyɛmi Tamara ndja kele ayombisha yangɔ ya ndɛ. Naka nde nkatɛ yangɔ ya ndɛ y’ɔkɔnyi* lo washo ami, dimi layoyilɛ oma l’anya ande.’”
6 Ɔnkɔnɛ Aminɔna aketama ndo akadimbiya hemɔ, ko nkumekanga akaye ndjowenda. Ko Aminɔna akatɛ nkumekanga ate: “Lam’alangayɛ, etawɔ dia kadiyɛmi Tamara ndja kele ayonkate ekate 2 wele oko doyi lo washo ami dia dimi ndɛ yangɔ oma l’anya ande.”
7 Ko Davidɛ akatome dui le Tamara lo luudu ate: “Lam’alangayɛ, tshɔka lo luudu laki Aminɔna ɔnanyɔ kele towokate yangɔ ya ndɛ.”*
8 Ɔnkɔnɛ, Tamara akatshu lo luudu laki Aminɔna w’ɔnango lɛnɛ akandetama. Nde akɔshi ofushi, akasɔhɛ lo washo ande dia nsala ekate ndo akakatɛ ekate akɔ.
9 Ko nde akɔshi mpanu ndo akawosha. Koko Aminɔna akatone ndɛ ndo akate ate: “Nya anto tshɛ oma lalemi!” Ko anto tshɛ wakamɔ lalende.
10 Ko Aminɔna akatɛ Tamara ate: “Ela yangɔ ya ndɛ* lo luudu la ndala, kele ndjile oma l’anya ayɛ.” Ɔnkɔnɛ Tamara akɔshi ekate wele oko doyi wakandakatɛ, ko akatɔlɛ lo luudu la ndala laki Aminɔna w’ɔnango.
11 Lam’akawela Tamara ekate akɔ dia nde ndɛ, nde akamamɛ Tamara ko akawotɛ ate: “Kadiyɛmi, yaka teyane.”
12 Koko Tamara akawotɛ ate: “Keema, ɔnalengo! Tombishake nsɔnyi, nɛ dia dui dia ngasɔ hadiosalema lo Isariyɛlɛ.+ Tosalake dui dia nsɔnyi sɔ.+
13 Lende ayomotshɔ la nsɔyi ka ngasɔ? Ndo wɛ ayɔsama oko pami kasala akambo wa nsɔnyi lo Isariyɛlɛ. Lam’alangayɛ, sawola la nkumekanga, nɛ dia nde hatotona dia wɛ mbɔsami.”
14 Koko nde akatone mbohokamɛ, akooleke wolo ndo akawosha nsɔnyi lo mbeyana la nde la wolo.
15 Oma laasɔ, Aminɔna akatatɛ mbohetsha wolo ndo lohetsho lande lakayoleka ngandji kakandawokaka ntondo. Aminɔna akawotɛ ate: “Onɛɛ, tshɔka!”
16 Ko nde akawotɛ ate: “Keema ɔnalengo, nɛ dia wɛ mbitshanyami kakianɛ ekɔ kɔlɔ ka ditshi ndeka kɛnɛ kosadiyɛ la mi!” Koko nde akatone mbohokamɛ.
17 Ko nde akelɛ ɔlɔngɔ ɔmɔtshi waki okambi ande ndo akawotɛ ate: “Lam’alangayɛ, ominye womoto ɔnɛ oma lalemi kele diha lokuke.”
18 (L’etena kɛsɔ, Tamara akalɔtɛ okutu wa laande,* nɛ dia ɔsɔ aki ahɔndɔ wakalɔtaka ana wa wamato wa nkumekanga waki weke dimuma.) Ko okambi ande akootondja l’andja ndo akadihe lokuke.
19 Oma laasɔ, Tamara akatɛ otoko l’ɔtɛ ande,+ akaatshatsha okutu wa dimɛna wakandalɔtɛ ndo akatakɛndakɛndaka mbahɛ anya l’ɔtɛ, ko akatadaka ekoko lam’akandatatshɔka.
20 Ko Abisalɔma+ w’ɔnango akawombola ate: “Shi wɛ aki kaamɛ la Aminɔna w’ɔnanyɔ? Kadiyɛmi le, ɔlama. Nde ekɔ ɔnanyɔ.+ Todjake yimba lo dikambo nɛ.” Ko Tamara akayadjasɛ ndamɛ lo luudu laki Abisalɔma w’ɔnango.
21 Lam’akoke nkumekanga Davidɛ akambo asɔ tshɛ, nde akomala efula.+ Koko nde konanga nyangiya ɔnande Aminɔna, nɛ dia nde akawokaka ngandji efula lo woho wakinde ɔnande l’enondo.
22 Abisalɔma kombutɛ Aminɔna ndooko dui, oyadi dia kɔlɔ kana di’ɔlɔlɔ, nɛ dia Abisalɔma akahetshaka Aminɔna l’ɔtɛ+ wakandasha kadiyɛnde Tamara nsɔnyi.+
23 L’ɔkɔngɔ w’ɛnɔnyi 2 w’etondo, anto wakahembolɛka Abisalɔma ɛkɔkɔ ande wɛɔsa waki la Baala-Hazɔra suke la Efrayimɛ.+ Ko Abisalɔma akelɛ ana w’apami tshɛ wa nkumekanga.+
24 Abisalɔma akaye le nkumekanga, ko akawotɛ ate: “Okambi ayɛ ekɔ lo mpembola ɛkɔkɔ ande wɛɔsa. Lam’alangayɛ, nkumekanga ndo ekambi ande wetawɔ ntshɔ kaamɛ la mi.”
25 Koko nkumekanga akatɛ Abisalɔma ate: “Keema, ɔnami. Naka sho tshɛ ntshɔ, kete tayonga wotsho le yɛ.” Kaanga mbakandawembiyaka, nde kombetawɔ ntshɔ, koko akɔɔtshɔkɔla.
26 Ko Abisalɔma akate ate: “Lam’alangayɛ, naka wɛ hatotshɔ, kete etawɔ dia ɔnalengo Aminɔna ntshɔ kaamɛ la so.”+ Nkumekanga akookadimola ate: “Lande na kahombande ntshɔ kaamɛ la nyu?”
27 Abisalɔma akatetemala mbowembiya, ko nde aketawɔ dia Aminɔna ndo ana akina tshɛ wa nkumekanga ntshɔ kaamɛ la nde.
28 Ko Abisalɔma akadjangɛ ekambi ande ate: “Nyendake, ndo kam’ayolola otema wa Aminɔna l’ɔngɛnɔngɛnɔ l’ɔkɔngɔ wa nde nnɔ wanu, ko lambonyotɛ nte: ‘Nyɔkɔmɔlɛ Aminɔna!’ kanyoodiake. Tanyokake wɔma. Shi dimi kanyodjangɛ? Nyokeketale ndo nyonge la dihonga.”
29 Ɔnkɔnɛ, ekambi waki Abisalɔma wakasalɛ Aminɔna paka oko wakawadjangɛ Abisalɔma. Oma laasɔ, ana wa nkumekanga akina tshɛ wakonɛɛ ndo onto l’onto akahema lo mfalo kande, ko akalawɔ.
30 Etena kakiwɔ weke lo mboka, losango lakakome le Davidɛ ɔnɛ: “Abisalɔma ambodiaka ana wa nkumekanga tshɛ, ndooko lakahandji.”
31 Ko nkumekanga akonɛɛ, akaatshatsha ahɔndɔ ande ndo aketama l’odihe, ndo ekambi ande tshɛ wakemala ko wakaatshatsha ahɔndɔ awɔ.
32 Koko Jɛhɔnadaba+ ɔna Shimɛa+ ɔnango Davidɛ akate ate: “Nkumɛmi atɔsake dia wambodiaka ana wa nkumekanga tshɛ, nɛ dia paka Aminɔna oto kakavwe.+ Abisalɔma kakatshi dia vɔ mbodiaka dikambo nde akɔshi yɛdikɔ shɔ+ ntatɛ lushi lakasha Aminɔna kadiyɛnde+ Tamara nsɔnyi.+
33 Laasɔ, nkumɛmi atodjake yimba* le wanɛ wata ɔnɛ: ‘Ana wa nkumekanga tshɛ wakavwe;’ Aminɔna oto kakavwe.”
34 L’etena kɛsɔ, Abisalɔma akalawɔ.+ L’ɔkɔngɔ diko, djamu akedia washo ko akɛnyi anto efula wayaye lo mboka k’oma l’ɔkɔngɔ ande suke la dikona.
35 Ko Jɛhɔnadaba+ akatɛ nkumekanga ate: “Eenda, ana wa nkumekanga wambokalola, oko wakakote okambi ayɛ.”
36 Kam’akandashidiya ntɛkɛta, ana wa nkumekanga wakɔtɔ, wayalele la dui dia wolo, ko ndo nkumekanga nde l’ekambi ande tshɛ wakalele la lonyangu l’efula.
37 Abisalɔma akalawɔ, ko akatshu le Talamai+ ɔna Amihudɛ nkumekanga ka Ngeshurɛ. Davidɛ akalele ɔnande l’edja ka nshi efula.
38 L’ɔkɔngɔ wa Abisalɔma ndawɔ otsha la Ngeshurɛ,+ nde akatotshikala lɛkɔ l’edja k’ɛnɔnyi 3.
39 L’ekomelo, nkumekanga Davidɛ akayolomɔlomɔ dia ntshɔ le Abisalɔma. Laasɔ ko nde amboshila sambema lo nyɔi kaki Aminɔna.
Nɔtɛ ka l'ɛse ka dikatshi
^ Kana “mapa w’esambelo.”
^ Kana “mapa w’esambelo.”
^ Kana “mapa w’esambelo.”
^ Kana “wakawadje dɛngalɛnga.”
^ Tshɛk., “atodjake l’otema ande.”
