2 Samuɛlɛ 14:1-33
14 Jɔaba ɔna Zeruya+ akeye dia otema wa nkumekanga wekɔ lo nomɔlomɔ dia mɛna Abisalɔma.+
2 Ko Jɔaba akatome dui la Tekoa+ dia telɛ womoto ɔmɔtshi la yimba ndo akawotɛ ate: “Lam’alangayɛ, sala oko wɛ ekɔ l’otanda, lɔta ahɔndɔ wa mpidi ndo toshinolake esɔ.+ Sala oko wɛ ekɔ womoto lalela onto ande lambovɔka edja.
3 Oma laasɔ ko wɛ ntshɔ totɛ nkumekanga nganɛ nganɛ.” Ko Jɔaba akadje ɛtɛkɛta ɛsɔ l’onyɔ ande.*
4 Womoto l’ose Tekoa akatshu le nkumekanga, akayakɔsha ekukumadi ndo akakusama ko akate ate: “Nkumekanga le, onkimanyiya!”
5 Nkumekanga akookadimola ate: “Ambotomba?” Ko nde akate ate: “Dimi lekɔ wadi aki odo. Omɛmi ambovɔka.
6 Dimi okambi ayɛ laki l’ana 2 w’apami, ko vɔ akɔ 2 wakalɔ l’oswe. Ndooko onto laki laawɔ dia mbashimbola, ko ɔmɔtshi akakɔmɔla osekande ndo akoodiake.
7 Wonya ɔnɛ nkumbo k’otondo wɔmɛnya dimi okambi ayɛ paa ndo wekɔ lo mbuta vate: ‘Kimɔ ɔnayɛ lakakɔmɔla ɔnango kele toodiake l’ɔtɛ wa lɔsɛnɔ* l’ɔnango lakandadiake,+ oyadi kaanga dikambo sɔ nembetshiyaka minya ɔhɛna!’ Vɔ wekɔ lo nanga nyima dikalanga diaakahɛtɛ diambontshikalɛ,* diaha vɔ tshikɛ omɛmi oyadi lokombo kana ohandɔ* ɔmɔtshi la nkɛtɛ.”
8 Ko nkumekanga akatɛ womoto akɔ ate: “Tshɔka lakayɛ, dimi layenda dikambo sɔ.”
9 Ko womoto l’ose Tekoa akatɛ nkumekanga ate: “Nkumɛmi nkumekanga le, onongo wonge l’ɔtɛ ami ndo lo luudu la papa, koko nkumekanga ndo kiti kande ka lowandji watongake la onongo.”
10 Ko nkumekanga akate ate: “Naka onto ɔmɔtshi ambokahɛ dui nto, koye la nde le mi, ko nde hatokofutanya nto pondjo.”
11 Koko womoto akɔ akate ate: “Lam’alangayɛ, nkumekanga le, oohɔ Jehowa Nzambi kayɛ diaha ɔsɔmbɔyishi wa dikila+ ndjeela elanyelo ndo ndjodiaka ɔnami.” Ko nde akate ate: “Lo mɛtɛ oko wele Jehowa la lɔsɛnɔ,+ ndooko wɔɔngi wa divo w’ɔnayɛ wayɔkɔ la nkɛtɛ.”
12 Womoto akɔ akate ate: “Nkumɛmi nkumekanga le, lam’alangayɛ, etawɔ dia okambi ayɛ kotɛ dui dimɔtshi.” Ko nde akate ate: “Tɛkɛta!”
13 Womoto akɔ akate ate: “Ko lande na kakanyiyayɛ dia salɛ ekambi waki Nzambi dui dia ngasɔ?+ Lam’ata nkumekanga ngasɔ, ndamɛ ekɔ lo ndjaɛndja onongo, nɛ dia nkumekanga hakaloyisha ɔnande ndamɛ lakandatshanya.+
14 Lo mɛtɛ, sho tayovɔ ndo tayonga oko ashi wambotshulɔ lo nkɛtɛ wahakoke tɔngɔnama. Koko Nzambi hatonya lɔsɛnɔ* ndo nde mbidjaka yimba lo ɛkɔkɔ wele ɔnɛ lambotshanyema hahombe mbitshanyema oma le nde lo pondjo.
15 Dimi lambotɛ nkumɛmi nkumekanga awui asɔ dikambo anto wakambotsha wɔma. Ɔnkɔnɛ okambi ayɛ akate ate: ‘Layanga nsawola la nkumekanga. Ondo nkumekanga ayosala kɛnɛ kɔɔlɔmba okambi ande.
16 Nkumekanga mbeyaka mboka okambi ande ndo mbotshungola oma lo anya w’onto layanga dia minyami dimi la tshɔi yami y’ɔna pami oma lo etenyi k’okitɔ kakatosha Nzambi.’+
17 Oma laasɔ, okambi ayɛ akate ate: ‘Ɛtɛkɛta wa nkumɛmi nkumekanga wambisha esambelo,’ nɛ dia nkumɛmi nkumekanga ekɔ oko ondjelo wa Nzambi ka mɛtɛ lo ntshikitanya kɛnɛ kele ɔlɔlɔ la kɛnɛ kele kɔlɔ. Jehowa Nzambi kayɛ ayale la yɛ.”
18 Ko nkumekanga akakadimola womoto akɔ ate: “Lam’alangayɛ, tombishɛke ndooko dikambo lo kɛnɛ tshɛ kayangami kombola.” Womoto akɔ akakadimola ate: “Nkumɛmi nkumekanga, ota lam’alangayɛ!”
19 Ko nkumekanga akambola ate: “Onde Jɔaba kambokodja lo akambo anɛ tshɛ?”+ Womoto akɔ akakadimola ate: “Lo mɛtɛ oko weyɛ* la lɔsɛnɔ, wɛ nkumɛmi nkumekanga, paka oko* wadita nkumɛmi nkumekanga mbediɔ, nɛ dia okambi ayɛ Jɔaba kakandakanya ndo kakadje ɛtɛkɛta ɛsɔ l’onyɔ w’okambi ayɛ.
20 Okambi ayɛ Jɔaba akasale ngasɔ dia ntshikitanya akambo, koko nkumɛmi ekɔ la lomba oko lɔnɛ lele la ondjelo wa Nzambi ka mɛtɛ ndo nde mbeyaka kɛnɛ tshɛ keta lo wodja.”
21 Oma laasɔ, nkumekanga akatɛ Jɔaba ate: “Kaawɔ, dimi layosala dikambo sɔ.+ Tshɔka toye la ɔlɔngɔ wa Abisalɔma ongo.”+
22 Ko Jɔaba akayakɔsha ekukumadi ndo akakusama, ko akatombola nkumekanga. Jɔaba akate ate: “Nkumɛmi nkumekanga le, ɛlɔ dimi okambi ayɛ lambeya dia lambohomɔ lokolo l’ɔlɔ lo washo ayɛ, nɛ dia nkumekanga ambosala kɛnɛ kɔɔlɔmbi okambi ande.”
23 Oma laasɔ, Jɔaba akemala ko akatshu la Ngeshurɛ+ ko akatoya la Abisalɔma la Jɛrusalɛma.
24 Koko nkumekanga akate ate: “Tshikande akalole lakande, koko nde hatokoka mɛna elungi kami.” Ko Abisalɔma akakalola lakande ndo nde kɔmɛna elungi ka nkumekanga.
25 L’etena kɛsɔ, ndooko pami kakanyanyemaka l’ɔtɛ w’olangala ande lo Isariyɛlɛ w’otondo oko Abisalɔma. Oma ko akaka w’ekolo ande polo lo shɔdi y’ɔtɛ ande, nde komonga kaanga la vadi.
26 Lam’akandanyaka divo dia l’ɔtɛ ande, (nde akadinyaka l’ekomelo k’ɔnɔnyi tshɛ nɛ dia diɔ diaki wotsho efula le nde,) divo dia l’ɔtɛ ande diaki la wotsho wa tɔshɛkɛlɛ 200* lo ndjela lɔwɔkɔ la yɛdikɔ ya wotsho la laka owandji.*
27 Abisalɔma akote ana w’apami+ 3 ndo ɔna womoto 1. Lokombo l’ɔna womoto akɔ ko Tamara. Nde aki womoto l’olangala efula.
28 Abisalɔma akatetemala mbidjasɛ la Jɛrusalɛma ɛnɔnyi 2 w’etondo, koko nde kɔmɛna elungi ka nkumekanga.+
29 Ko Abisalɔma akelɛ Jɔaba dia nde ndjootoma le nkumekanga, koko Jɔaba konanga ndja. Oma laasɔ, nde akatome dui le nde nto mbala ka 2, koko nde akatetemala ntona.
30 L’ekomelo, nde akatɛ ekambi ande ate: “Ekambɔ kaki Jɔaba nsukana la kami ndo nde ekɔ la yema y’asami lɔkɔ. Nyotshu kele nyotokitshumbe.” Ɔnkɔnɛ ekambi waki Abisalɔma wakatotshumba ekambɔ kakɔ.
31 Ko Jɔaba akonɛɛ, akaye lo luudu laki Abisalɔma ndo akawotɛ ate: “Lande na kambotshumba ekambi ayɛ ekambɔ kami?”
32 Abisalɔma akakadimola Jɔaba ate: “Toko dimi lakakotomɛ dui nte: ‘Yaka kele ndjokotome le nkumekanga dia towombola ɔnɛ: “Lande na kakamaye oma la Ngeshurɛ?+ Otoleka dimɛna dimi ntshikala lɛkɔ. Laasɔ dimi nte mɛnyi elungi ka nkumekanga ndo naka lekɔ la onongo, kete nde pombaka ndjakami.”’”
33 Ɔnkɔnɛ Jɔaba akɔtɔ le nkumekanga ko akatosawola la nde. Oma laasɔ, nde akelɛ Abisalɔma ko nde akɔtɔ le nkumekanga ko akakusama la ntondo kande ndo akayakɔsha ekukumadi la ntondo ka nkumekanga. Oma laasɔ, nkumekanga akashana la Abisalɔma bizɛ.+
Nɔtɛ ka l'ɛse ka dikatshi
^ Kana “akawotɛ kɛnɛ ka nde mbuta.”
^ Kana “anima.”
^ Mbuta ate elongamelo k’ekomelo ka nkondja tokanula.
^ Tshɛk., “otshikadi.”
^ Kana “anima.”
^ Kana “wele anima ayɛ.”
^ Kana “ndooko lakoka mbɛtɔla lo lonya la lɔmɔsɔ kana l’omi lo kɛnɛ.”
^ Ondo ɔsɔ aki yɛdikɔ ya wotsho yakalamemaka lo luudu l’owandji kana shɛkɛlɛ “ya laka owandji” yakatshikitanaka la shɛkɛlɛ y’anto tshɛ.
