2 Samuɛlɛ 15:1-37
15 L’ɔkɔngɔ w’akambo asɔ tshɛ, Abisalɔma akayayangɛ pusupusu, mfalasa ndo apami 50 dia vɔ talawɔka la ntondo kande.+
2 Abisalɔma aketɔka la yosose ko akemalaka l’omamu wa mboka k’otsha la soko dia osomba.+ Mbala tshɛ kaketaka onto ɔmɔtshi laki la dikambo dia ntɔla le nkumekanga dia nde tolombosha,+ Abisalɔma akawelɛka ndo akataka ate: “Wɛ ose osomba akɔna?” Ko nde akataka ate: “Okambi ayɛ ekɔ ose dioho dimɔtshi dia l’Isariyɛlɛ.”
3 Abisalɔma akataka ate: “Eenda, dikambo diatayɛ diekɔ dimɛna ndo mbokɛmaka, koko le nkumekanga ndooko onto lahomba menda dikambo diayɛ.”
4 Abisalɔma akataka ate: “Otondongaka dimi lambɔsɔnama dia monga shushi lo wodja ɔnɛ, tshike onto tshɛ lele la dikambo kana la kilombo otokokaka ndja le mi ndo dimi lotosalaka tshɛ dia mbasambola.”
5 Lam’akayaka onto suke la nde dia mbokusamɛ, Abisalɔma akasembolaka lonya ko akookimɛka ndo akawoshaka bizɛ.+
6 Abisalɔma akasalɛka ase Isariyɛlɛ tshɛ wakayaka le nkumekanga lo kilombo ngasɔ. Ɔnkɔnɛ, Abisalɔma akatetemala mbiva etema w’ase Isariyɛlɛ.+
7 L’ekomelo k’ɛnɔnyi 4,* Abisalɔma akatɛ nkumekanga ate: “Lam’alangayɛ, ontshike ntshu la Hɛbɛrɔna+ dia toshidiya dɔkɔlɔkɔ diakamatshike la ntondo ka Jehowa.
8 Nɛ dia dimi okambi ayɛ lakatshike dɔkɔlɔkɔ+ lam’akamadjasɛka la Ngeshurɛ+ ka la Suriya nte: ‘Naka Jehowa kaloyami la Jɛrusalɛma, kete dimi layolambola* Jehowa olambo.’”
9 Ko nkumekanga akawotɛ ate: “Kotshu la ki.” Ko nde akonɛɛ ndo akatshu otsha la Hɛbɛrɔna.
10 Abisalɔma akatome atɔpi le waoho tshɛ wa l’Isariyɛlɛ, ata ate: “Kam’ayonyoka wondjo wa dimama, kanyewoya nyate: ‘Abisalɔma aya nkumekanga la Hɛbɛrɔna!’”+
11 L’etena kɛsɔ, apami 200 w’oma la Jɛrusalɛma wakatshu lɛkɔ kaamɛ la Abisalɔma. Vɔ wakelamɛ ko wakatshu otshɔtshɔ, aha la mbeya kɛnɛ kakasalemaka.
12 Ndo nto, lam’akandalambola elambo, Abisalɔma akatomɛ Ahitɔfɛlɛ+ ose Ngilɔ laki ondaki wa Davidɛ+ dui dia nde ndja oma l’osomba ande wa Ngilɔ.+ Sheke yakɔ yakaleke nkeketala ndo lofulo l’anto wakasukɛka Abisalɔma lakatadɛka mbidɛ tsho.+
13 Oma laasɔ, onto ɔmɔtshi akatshu le Davidɛ ko akatowotɛ ate: “Etema w’ase Isariyɛlɛ wambokadimɔ le Abisalɔma.”
14 Mbala kakɔ ɔtɔi, Davidɛ akatɛ ekambi ande tshɛ waki kaamɛ la nde la Jɛrusalɛma ate: “Nyonee, nyoyete tolawɔ,+ nɛ dia ndooko onto l’atei aso layohandɔ oma l’anya wa Abisalɔma! Nyosale esadi, nɛ dia nde mbeyaka ndjotɔtwɛ la shashimoya ko ndjotela mpokoso ndo ndjolanya osomba la lokuwa la ta!”+
15 Ekambi wa nkumekanga wakakadimola nkumekanga vate: “Kɛnɛ tshɛ kayoyota, wɛ nkumɛmi nkumekanga, ekambi ayɛ wekɔ suke dia nsala.”+
16 Ko nkumekanga akatombe nde l’ase luudu lande tshɛ waki kaamɛ la nde, koko nkumekanga akatshike eseka+ ande 10 dia namaka luudu.*
17 Nkumekanga akatetemala la lɔkɛndɔ lande kaamɛ l’anto tshɛ wakatawoyelaka ndo vɔ wakatemala la Bɛtɛ-Mɛrɛhaka.*
18 Ekambi ande tshɛ wakadjasɛka kaamɛ la nde* ndo ase Kerɛtɛ tshɛ, ase Pelɛtɛ+ ndo ase Ngiti,+ apami 600 wakayawoyelaka oma la Ngata+ waketaka la ntondo ka nkumekanga.*
19 Ko nkumekanga akatɛ Itayi+ ose Ngiti ate: “Lande na kahombayɛ ntshɔ kaamɛ la so ndo wɛ? Kalola todjasɛ kaamɛ la nkumekanga k’oyoyo, nɛ dia wɛ ɔngɛndangɛnda ndo ose dawo keyɛ.
20 Loyi kakayaye, ko ɛlɔ dimi ndjoketshetsha kaamɛ la so dia ntshɔ wonya wahombami ntshɔ ndo lɛnɛ ahombami ntshɔ? Kalola wɛ la ananyɔ ndo Jehowa anyɛnya ngandji ka kɔlamelo ndo kɔlamelo!”+
21 Koko Itayi akakadimola nkumekanga ate: “Lo mɛtɛ oko wele Jehowa la lɔsɛnɔ ndo oko weyɛ wɛ nkumɛmi nkumekanga la lɔsɛnɔ, dihole tshɛ diayonga nkumɛmi nkumekanga, oyadi lo nyɔi kana lo lɔsɛnɔ, lɛkɔ kayonga okambi ayɛ!”+
22 Ko Davidɛ akatɛ Itayi ate:+ “Ɛsɔ tehɔ.” Ko Itayi ose Ngiti akatehɔ kaamɛ l’anto ande tshɛ ndo anande.
23 Anto tshɛ waki l’ɛtshi ka nkɛtɛ kɛsɔ wakalelaka la dui dia wolo etena kakatehɔka anto asɔ tshɛ ndo nkumekanga akemala l’omamu w’Okidi wa Kidirɔna.+ Anto tshɛ wakatehɔka lo mboka katshɔ otsha l’oswe wa shɛnga.
24 Zadɔka+ nde lawɔ aki laawɔ ndo ase Lɛwi+ tshɛ wakayɛmbaka ɔshɛtɛ wa sheke+ wa Nzambi ka mɛtɛ+ waki kaamɛ la nde. Vɔ wakakitsha Ɔshɛtɛ wa Nzambi ka mɛtɛ la nkɛtɛ. Ko Abiyatara+ akatshu lam’akashile anto tshɛ ntehɔ oma l’osomba.
25 Koko nkumekanga akatɛ Zadɔka ate: “Kaloya Ɔshɛtɛ wa Nzambi ka mɛtɛ l’osomba.+ Naka lambohomɔ lokolo l’ɔlɔ lo washo wa Jehowa, kete nde ayonkaloya ndo dimi, ko dimi layowɛna ndo layɛna dihole diatshikalawɔ.+
26 Ko naka nde ambota ate: ‘Dimi handjokɔngɛnangɛna,’ ko nde salɛmi kɛnɛ tshɛ kele ɔlɔlɔ lo washo ande.”
27 Nkumekanga akatɛ ɔlɔmbɛdi Zadɔka ate: “Shi ɔmɛnyi w’akambo woshɛmi keyɛ?+ Kalola l’osomba lo dihole diayɛ ndo tshɔka l’ananyu 2 w’apami, Ahimaza ɔnayɛ nde la Jɔnatana+ ɔna Abiyatara.
28 Dimi layototshimbatshimba l’omamu w’ateho wele suke l’oswe wa shɛnga polo lam’ayomokondja nsango y’oma le nyu.”+
29 Ko Zadɔka nde la Abiyatara wakakaloya Ɔshɛtɛ wa Nzambi ka mɛtɛ la Jɛrusalɛma ndo vɔ wakatshikala lɛkɔ.
30 Etena kakatadɛka Davidɛ lo Dikona* di’esongo w’Ɔlivɛ,+ nde akatalelaka etena kakandatatshɔka. Nde akakombe ɔtɛ ande ndo akatakɛndakɛndaka ekolo hwe. Anto tshɛ waki kaamɛ la nde vɔ lawɔ wakakombe ɛtɛ awɔ ndo wakatalelaka etena kakawatadɛka.
31 Oma laasɔ, wakayotɛ Davidɛ vate: “Ahitɔfɛlɛ ekɔ l’atei w’anto wambodja sheke+ vɔ la Abisalɔma.”+ Ko Davidɛ akate ate: “Jehowa le,+ lam’alangayɛ, sala dia dako diaki Ahitɔfɛlɛ monga dako dia kɔlɔ!”+
32 Lam’akakome Davidɛ la shɔdi ya dikona lɛnɛ atokusamɛka anto Nzambi, Hushai+ ose Araka+ akaye ndjohomana la nde; nde aki la okutu wambatatɛ ndo akatɛ ditshu l’ɔtɛ.
33 Ko Davidɛ akawotɛ ate: “Naka wɛ ntehɔ dia ntshɔ kaamɛ la mi, wɛ ayonga wotsho le mi.
34 Ko naka wɛ nkalola l’osomba ko wɛ totɛ Abisalɔma wate: ‘Nkumekanga le, dimi lekɔ okambi ayɛ. Dimi laki ntondo okambi wa shɔ, koko wonya ɔnɛ dimi laya okambi ayɛ,’+ kete wɛ koka ndanya dako diaki Ahitɔfɛlɛ lo dikambo diami.+
35 Shi Zadɔka nde la Abiyatara wanɛ wele ɛlɔmbɛdi wekɔ lɛkɔ kaamɛ la yɛ? Wɛ pombaka mbutɛ Zadɔka nde la Abiyatara wanɛ wele ɛlɔmbɛdi kɛnɛ tshɛ kayoyoka oma lo luudu la nkumekanga.+
36 Eenda, vɔ wekɔ kaamɛ la anawɔ 2, Ahimaza+ ɔna Zadɔka nde la Jɔnatana+ ɔna Abiyatara. Kombewoya lo tshimbo yawɔ kɛnɛ tshɛ kayoyoka.”
37 Ko Hushai ɔngɛnyi wa Davidɛ+ akatshu l’osomba etena kakayɔtɔka Abisalɔma la Jɛrusalɛma.
Nɔtɛ ka l'ɛse ka dikatshi
^ Kana ondo “ɛnɔnyi 40.”
^ Kana “layɔtɛmɔla.” Tshɛk., “layokambɛ.”
^ Kana “luudu l’owandji.”
^ Kitshimudi ate: “Luudu lele etale.”
^ Kana “waketaka lo wedi ande.”
^ Kana “waketaka la ntondo k’elungi ka nkumekanga.”
^ Kana “wodelo.”
