2 Samuɛlɛ 18:1-33
18 Oma laasɔ, Davidɛ akadia apami waki kaamɛ la nde ndo nde akaakitsha l’ɛlɔmbwɛlɔ k’ewandji w’anto nunu nunu ndo k’ewandji w’anto nkama nkama.+
2 Davidɛ akakimɔ k’asato ɔtɔi k’apami akɔ l’ɛlɔmbwɛlɔ* ka Jɔaba,+ k’asato ɔtɔi kekina l’ɛlɔmbwɛlɔ ka Abishai+ ɔnango Jɔaba ɔna Zeruya+ ndo k’asato ɔtɔi kekina l’ɛlɔmbwɛlɔ ka Itayi+ ose Ngiti. Oma laasɔ, nkumekanga akatɛ apami akɔ ate: “Dimi lawɔ layotshɔ kaamɛ la nyu.”
3 Koko vɔ wakate vate: “Wɛ hahombe ntshɔ,+ nɛ dia naka sho ndawɔ, vɔ hawototodja yimba,* ndo naka k’ahende ɔtɔi ka l’atei aso mvɔ, vɔ hawototodja yimba dikambo wɛ ekɔ la nɛmɔ dia anto nunu dikumi (10 000) l’atei aso.+ Ɔnkɔnɛ, ayoleka dimɛna wɛ totomɛka ekimanyielo oma l’osomba.”
4 Nkumekanga akawatɛ ate: “Dimi layosala kɛnɛ tshɛ kayoleka dimɛna le nyu.” Ɔnkɔnɛ, nkumekanga akemala suke la soko di’osomba ko apami tshɛ nkama nkama ndo nunu nunu wakatombaka.
5 Oma laasɔ, nkumekanga akadjangɛ Jɔaba nde la Abishai la Itayi ate: “Lo lokombo lami, tanyosalɛke ɔlɔngɔ wa Abisalɔma ongo kɔlɔ.”+ Anto tshɛ wakoke lam’akadjangɛ nkumekanga ewandji tshɛ lo dikambo dia Abisalɔma.
6 Apami akɔ wakatshu l’oswe dia tohomana l’ase Isariyɛlɛ, ko ta diakatɔlɔma lo okonda wa Efrayimɛ.+
7 Ekambi waki Davidɛ+ wakalɛndja ase Isariyɛlɛ+ lɛkɔ ndo anto efula wakadiakema lushi lɔsɔ, apami nunu akumi ahende (20 000).
8 Ta diakakokanɛ l’ɛtshi ka nkɛtɛ kɛsɔ k’otondo. Ndo nto, okonda wakamane anto efula ndeka wanɛ wakadiakema la lokuwa la ta lushi lɔsɔ.
9 L’ekomelo, Abisalɔma akatotanema ndamɛ la ntondo k’ekambi waki Davidɛ. Abisalɔma akatatshɔka lo mfalo, ko mfalo kakɔ kakete l’ɛse ka ntahe y’osongo ɔmɔtshi wa woke, ko ɔtɛ ande wakakakatɛ lo osongo wa woke ko nde akalɛndalɛndaka* etena kele mfalo kakandayayaka lɔkɔ kakatetemala la lɔkɛndɔ.
10 Ko onto ɔmɔtshi akɛnyi dui sɔ ndo akatotɛ Jɔaba ate:+ “Eenda, lakɛnyi Abisalɔma alɛndalɛnda lo osongo wa woke.”
11 Jɔaba akakadimola pami kakawotɛ ngasɔ ate: “Naka wɛ akɛnyi dui sɔ, lande na kahayoodiaki ko nde nkɔ mbala kakɔ ɔtɔi la nkɛtɛ? Oma laasɔ, dimi lotɔngɛnangɛna dia kosha ekenga 10 wa mfɛsa ndo oya.”
12 Koko pami kakɔ akatɛ Jɔaba ate: “Kaanga otoyombisha* ekenga kinunu (1 000) wa mfɛsa, totometawɔ mbahɛ ɔna nkumekanga anya, nɛ dia takoki kɛnɛ kakakodjange nkumekanga wɛ la Abishai la Itayi ate: ‘Oyadi onto akɔna tshɛ eyɛ, kanyendake ɔlɔngɔ wa Abisalɔma ongo.’+
13 Otomɔnyɔla didjango sɔ ko mbodiaka,* dui sɔ totodioshɛma pondjo le nkumekanga ndo wɛ totoyonkokɛ.”
14 Ko Jɔaba akate ate: “Dimi handjetsha wenya la yɛ nto!” Nde akakimɛ ɛsɔngɔ* 3, ko akake Abisalɔma lo doyi etena kakinde eke la lɔsɛnɔ l’atei w’osongo wa woke.
15 Oma laasɔ, ekambi 10 wakatɛmbaka dihomɔ dia ta dia Jɔaba wakaye, ko wakakɔmɔla Abisalɔma polo nde mvɔ.+
16 Ko Jɔaba akade dimama ndo anto ande wakatshike ndjelana l’ase Isariyɛlɛ. Jɔaba akaashimbe.
17 Vɔ wakɔshi Abisalɔma ko wakawokasha lo difuku dia woke dia lo okonda akɔ ndo wakemɛ tota dia woke dia ave laawɔ.+ Ase Isariyɛlɛ tshɛ wakalawɔ otsha lawakawɔ.
18 Lam’aki Abisalɔma eke la lɔsɛnɔ, nde akɔshi dive dimɔtshi ko akadiemɛ dikambo diande ndamɛ lo Okidi* wa Nkumekanga,+ nɛ dia nde akate ate: “Dimi ndooko la ɔna pami lahomba nama lokombo lami dia lɔ ndjohɔmaka.”+ Ko nde akɔlɛ ekundji kakɔ ka dive lokombo lande ndamɛ ndo tɔ mbelamɛka ɔnɛ Mɔnima wa Abisalɔma polo ndo ɛlɔ.
19 Ahimaza+ ɔna Zadɔka akate ate: “Lam’alangayɛ, etawɔ dia dimi ndawɔ kele mɛmbɛ nkumekanga losango, nɛ dia Jehowa amboosambolɛ lo mbotshungola oma le atunyi ande.”+
20 Koko Jɔaba akawotɛ ate: “Ɛlɔ wɛ hatonga ɔmɛmbi wa nsango. Wɛ ayoyɛmba nsango lushi lokina, koko ɛlɔ, wɛ hatɛmba nsango dikambo ɔna nkumekanga kambovɔ.”+
21 Oma laasɔ, Jɔaba akatɛ ose Kusha ɔmɔtshi ate:+ “Tshɔka tote nkumekanga kɛnɛ kamboyɛna.” Ko ose Kusha akɔ akakusamɛ Jɔaba ndo akatshu la lowango.
22 Ahimaza ɔna Zadɔka akatɛ Jɔaba nto ate: “Oyadi kɛnɛ tshɛ kayotomba, lam’alangayɛ, ontshike ndawɔ l’ɔkɔngɔ w’ose Kusha.” Koko Jɔaba akate ate: “Ɔnami, lande na katayatshu etena kele ndooko losango lahombayɛ tota?”
23 Koko nde akate ate: “Oyadi kɛnɛ tshɛ kayotomba, ontshike ntshu.” Ko Jɔaba akawotɛ ate: “Tshɔka!” Ko Ahimaza akatshu la lowango lo mboka k’otsha lo distrikɛ dia Jɔrdana,* ko nde akatolekana ose Kusha.
24 L’etena kɛsɔ, Davidɛ akadjasɛ lam’asa asoko 2 w’osomba,+ ko djamu+ akadɛ lo tshoto ya la soko di’osomba oma lo ehele. Nde akashishima, ko akɛnyi pami kɛmɔtshi ayalawɔ ndamɛ.
25 Ko djamu akawelɛ ndo akatɛ nkumekanga. Nkumekanga akate ate: “Naka nde ekɔ ndamɛ, kete nde ekɔ la losango la ndjota.” Lam’akandakome yema suke,
26 djamu akɛnyi pami kekina ayalawɔ. Ko djamu yakɔ akawelɛ ɔnɛ lakalamaka soko ate: “Ohenda, pami kekina ekɔ lo ndjalawɔ ndamɛ!” Nkumekanga akate ate: “Ɔsɔ nto ekɔ lo ndjaye la losango.”
27 Djamu akate ate: “Lambɛna dia pami ka ntondo kayalawɔ ekɔ oko Ahimaza+ ɔna Zadɔka.” Ko nkumekanga akate ate: “Nde ekɔ onto ɔlɔlɔ ndo nde ekɔ lo ndjaye la losango l’ɔlɔlɔ.”
28 Ko Ahimaza akawelɛ nkumekanga ate: “Lekɔ la losango l’ɔlɔlɔ!” Ko nde akakusamɛ nkumekanga elungi polo la nkɛtɛ. Oma laasɔ, nde akate ate: “Jehowa Nzambi kayɛ atombɔme, ɔnɛ lambokimɔ apami wakakɔtɔmbɔkwɛ* lo anya ayɛ, wɛ nkumɛmi nkumekanga!”+
29 Koko nkumekanga akate ate: “Onde ɔlɔngɔ wa Abisalɔma ongo ekɔ ki?” Ko Ahimaza akate ate: “Dimi lakɛnyi lofunguso la mamba etena kakatomi Jɔaba okambi wa nkumekanga la okambi ayɛ, koko dimi hambeyi kɛnɛ kakatombi.”+
30 Ko nkumekanga akate ate: “Sɛmɛ, temale lɛnɛ.” Ko nde akasɛmɛ ndo akatemala lɛkɔ.
31 Oma laasɔ, ose Kusha akakome+ ko ose Kusha akɔ akate ate: “Nkumɛmi nkumekanga, lambokela losango lɔnɛ: Ɛlɔ, Jehowa ambosambola akambo lo kotshungola oma lo anya wa wanɛ tshɛ wakakɔtɔmbɔkwɛ.”+
32 Koko nkumekanga akatɛ ose Kusha ate: “Onde ɔlɔngɔ wa Abisalɔma ongo ekɔ ki?” Ko ose Kusha akate ate: “Atunyi tshɛ wa nkumɛmi nkumekanga ndo wanɛ tshɛ wakakɔtɔmbɔkwɛ dia kosalɛ kɔlɔ wonge oko ɔlɔngɔ a pami akɔ!”+
33 Dui sɔ diakatshindja nkumekanga wɔɔngɔ, ko nde akadɛ lo luudu la la diko dia soko ndo akalele, atate lam’akandatakɛndakɛndaka ate: “Abisalɔma ɔnami, ɔnami, Abisalɔma ɔnami! Otomovɔ lo dihole diayɛ lee, Abisalɔma ɔnami, ɔnami!”+
Nɔtɛ ka l'ɛse ka dikatshi
^ Tshɛk., “l’anya wa.”
^ Tshɛk., “hawotoshikikɛ etema le so.”
^ Tshɛk., “lam’asa olongo la nkɛtɛ.”
^ Tshɛk., “otoyodja l’anya ami.”
^ Kana “otomoshisha kɔlamelo otsha le anima ande.”
^ Kana ondo “akuwa; akɔnga.” Tshɛk., “alanga.”
^ Kana “Okidi w’Ebamubamu.”
^ Tshɛk., “distrikɛ.”
^ Tshɛk., “wakawedia anya awɔ.”
