2 Samuɛlɛ 19:1-43
19 Wakatotɛ Jɔaba vate: “Nkumekanga ekɔ lo ndela ndo ekɔ lo nsala otanda wa Abisalɔma.”+
2 Ko otshumba* wa lushi lɔsɔ wakakadimɔ otanda le anto tshɛ, nɛ dia vɔ wakoke dia nkumekanga aki la lɔkɔnyɔ l’ɔtɛ w’ɔnande.
3 Lushi lɔsɔ, anto wakɔngɔka lɔɔngɔ dia nkalola lo osomba+ wate kana anto wamboshama nsɔnyi l’ɔtɛ wambowotolawɔ ta.
4 Nkumekanga akakombe elungi kande ndo akatetemala ndela la dui dia wolo ate: “Abisalɔma ɔnami! Abisalɔma ɔnami, ɔnami!”+
5 Oma laasɔ, Jɔaba akɔtɔ lo luudu le nkumekanga ko akate ate: “Ɛlɔ wɛ ambosha ekambi ayɛ tshɛ nsɔnyi, wanɛ wamboshimbɛ lɔsɛnɔ* layɛ, nsɛnɔ* y’anayɛ w’apami,+ y’anayɛ wa wamato,+ ya wadiɛyɛ ndo y’eseka ayɛ.+
6 Wɛ ekɔ lo nanga wanɛ wakohetsha ndo wɛ ekɔ lo mpetsha wanɛ wakolanga, nɛ dia ɛlɔ wɛ ambɛnya hwe dia ewandji ayɛ ndo ekambi ayɛ bu la nɛmɔ kaanga yema tshitshɛ le yɛ, dikambo lamboshikikɛ dia otoleka dimɛna le yɛ otondonga Abisalɔma ekɔ la lɔsɛnɔ ɛlɔ, ko ekambi ayɛ ekina tshɛ mbovwe.
7 Emala kele tomba tokeketsha* ekambi ayɛ, nɛ dia lambotshiba lo lokombo la Jehowa dia naka wɛ hatshwe, ndooko kaanga pami 1 kayotshikala kaamɛ la yɛ l’otsho w’ɛlɔ. Dui sɔ diayonga kɔlɔ le yɛ ndeka kɔlɔ tshɛ yambokokomɛ oma ko dikɛnda diayɛ polo kakianɛ.”
8 Ɔnkɔnɛ nkumekanga akemala, akatodjasɛ la soko dia osomba, ko wakatɛ anto tshɛ ɔnɛ: “Nkumekanga ambodjasɛ la soko.” Ko anto tshɛ wakaye la ntondo ka nkumekanga.
Koko ase Isariyɛlɛ wakalawɔ onto l’onto otsha lakande.+
9 Anto tshɛ wa lo waoho tshɛ w’Isariyɛlɛ wakakɛtshanyaka, wata vate: “Nkumekanga akatoshimbɛ oma le atunyi aso+ ndo nde akatotshungola oma le ase Filistiya, koko wonya ɔnɛ nde ambolawɔ wodja l’ɔtɛ wa Abisalɔma.+
10 Abisalɔma lakatakite esɔ dia monga owandji aso+ ambotovɔ lo ta.+ Ko lande na kahanyasale ndooko dui dia nkaloya nkumekanga?”
11 Nkumekanga Davidɛ akatomɛ Zadɔka+ nde la Abiyatara+ wanɛ waki ɛlɔmbɛdi dikɛndji ate: “Nyote dikumanyi dia la Juda+ nyate: ‘Lande na katshimbatshimbanyu dia nkaloya nkumekanga otsha lo luudu lande lam’ele ase Isariyɛlɛ tshɛ wambotomɛ nkumekanga dui lo luudu lande?
12 Nyu mbele analengo. Nyu mbele weka ami ndo emunyi ami.* Lande na katshimbatshimbanyu dia nkaloya nkumekanga?’
13 Nyotote ndo Amasa+ nyate: ‘Shi wɛ ekɔ weka ami ndo emunyi ami? Ɔnkɔnɛ, Nzambi kaambisha dilanya dia wolo naka wɛ hatonga owandji w’asɔlayi ami lo dihole dia Jɔaba+ oma ko kakianɛ.’”
14 Ko nde akakadimola* etema w’apami tshɛ w’ase Juda oko w’onto 1 ndo vɔ wakatomɛ nkumekanga dui ɔnɛ: “Kalola wɛ la ekambi ayɛ tshɛ.”
15 Nkumekanga akatatɛ nkalola, akakome lo Jɔrdana ko ase Juda wakaye la Ngilingalɛ+ ndjohomana la nkumekanga ndo wakootshindɛ dia ntehɔ Jɔrdana.
16 Oma laasɔ, Shimei+ ɔna Ngɛra oseka Bɛnjamina akaye esadi esadi oma la Bahurima nde l’apami w’aseka Juda dia ndjohomana la nkumekanga Davidɛ,
17 ndo apami kinunu (1000) w’aseka Bɛnjamina waki kaamɛ la nde. Ndo nto, Ziba+ okambi wa lo luudu laki Saolo nde l’anande w’apami 15 la ekambi ande 20 wakaholɔ esadi esadi lo Jɔrdana la ntondo ka nkumekanga.
18 Nde* akatehɔ lo teho dia totehoya ase luudu la nkumekanga ndo dia tosala kɛnɛ tshɛ kalangande. Koko lam’aki nkumekanga suke la ntehɔ Jɔrdana, Shimei ɔna Ngɛra akayakɔsha la ntondo kande.
19 Nde akatɛ nkumekanga ate: “Nkumɛmi, tɔmɛndjake onongo ndo tohɔke kɔlɔ kakakosalɛ+ okambi ayɛ lushi lakayatatombaka, wɛ nkumɛmi nkumekanga oma la Jɛrusalɛma. Todjake yimba lo dikambo sɔ,
20 nɛ dia dimi okambi ayɛ mbeyaka dimɛna dia lakasale pɛkato. Ɔnkɔnɛ, ɛlɔ dimi kele onto la ntondo l’atei w’ase luudu laki Yɔsɛfu tshɛ lamboholɔ dia ndjohomana la yɛ, wɛ nkumɛmi nkumekanga.”
21 Mbala kakɔ ɔtɔi, Abishai+ ɔna Zeruya+ akate ate: “Shi Shimei pombaka ndjakema lo dikambo sɔ, nɛ dia nde akadje okitami wa Jehowa mananu?”+
22 Koko Davidɛ akate ate: “Ana wa Zeruya le,+ dui sɔ anyendadiɔ katonyɔndɔsha ɛlɔ nganɛ? Onde onto ɔmɔtshi pombaka ndjakema ɛlɔ lo Isariyɛlɛ? Onde dimi haleye dia dimi lekɔ nkumekanga lo Isariyɛlɛ ɛlɔ?”
23 Ko nkumekanga akatɛ Shimei ate: “Wɛ hatovɔ.” Ko nkumekanga akootshibɛ.+
24 Mefibɔshɛtɛ+ okana wa Saolo nde lawɔ akaholɔ dia tohomana la nkumekanga. Nde kɔnɔngɔsɔla ekolo ande, kɔkɔlɔnga ndɛdu yande ndo kosola ahɔndɔ ande oma ko lushi lakatshu nkumekanga polo lushi lakandakalola la ki.
25 Lam’akandaye la* Jɛrusalɛma dia ndjohomana la nkumekanga, nkumekanga akawotɛ ate: “Lande na kakiyɛ kotshɔ kaamɛ la mi na, Mefibɔshɛtɛ?”
26 Ko nde akate ate: “Nkumɛmi nkumekanga le, okambi ami+ akankese, nɛ dia okambi ayɛ akate ate: ‘Ontshike mbɔshi mponda kami, keleke edee kele mbaheme lɔkɔ dia dimi ntshɔ kaamɛ la nkumekanga,’ dikambo okambi ayɛ akɔkɔ ekolo.+
27 Koko nde akamamatanyiya okambi ayɛ akambo le nkumɛmi nkumekanga.+ Wɛ nkumɛmi nkumekanga, wɛ ekɔ oko ondjelo wa Nzambi ka mɛtɛ, ɔnkɔnɛ sala kɛnɛ tshɛ kɛnayɛ ɔlɔlɔ.
28 Ase luudu la papa tshɛ wakahombe ndjakema oma le nkumɛmi nkumekanga, koko wɛ akakitsha okambi ayɛ l’atei wa wanɛ walɛ lo mɛsa ayɛ.+ Laasɔ lotshungɔ lakɔna lele la mi la ndelɛ nkumekanga nto?”
29 Koko nkumekanga akawotɛ ate: “Lande na katetemalayɛ mbuta ngasɔ? Dimi lakɔshi yɛdikɔ dia wɛ la Ziba nkahana ɛtshi ka nkɛtɛ.”+
30 Ko Mefibɔshɛtɛ akatɛ nkumekanga ate: “Tshikande akiɔshi tshɛ lam’ele nkumɛmi nkumekanga ambokalola la ki lo luudu lande.”
31 Oma laasɔ, Barazilai+ ose Ngiliyadɛ akaye oma la Rɔngɛlima oya lo Jɔrdana dia ndjotshindɛ nkumekanga lo Jɔrdana.
32 Barazilai aki osombe efula, aya l’ɛnɔnyi 80, ndo nde kakashaka nkumekanga mbo ya ndɛ lam’akandatodjasɛka la Mahanayima,+ dikambo nde aki kanga ɔngɔnyi w’efula.
33 Ko nkumekanga akatɛ Barazilai ate: “Tehɔ kaamɛ la mi, dimi layotokoshaka mbo ya ndɛ la Jɛrusalɛma.”+
34 Koko Barazilai akatɛ nkumekanga ate: “Nshi ngana* yambontshikalɛ dia dimi nsɛna katomodɛ kaamɛ la nkumekanga la Jɛrusalɛma?
35 Ɛlɔ dimi laya l’ɛnɔnyi 80.+ Onde lakakoke ntshikitanya ɔlɔlɔ la kɔlɔ? Onde dimi okambi ayɛ layokoka ndɛta kɛnɛ kalɛmi kana kanɔmi? Onde laakakoke mpokamɛ awui w’amembi w’apami la wa wamato?+ Ko lande na katahɛ okambi ayɛ nkumɛmi nkumekanga wotsho laadiko dia tshuka?
36 Okambi ayɛ ayokomɛ lo ntshindɛ nkumekanga polo lo Jɔrdana. Lande na katomfuta nkumekanga difuto dia ngasɔ?
37 Lam’alangayɛ, etawɔ dia okambi ayɛ nkalola kele kantovu lo osomba aso, suke la waombo wa papa la mama.+ Koko okambi ayɛ Kimihamɛ+ nde ɔnɛ. Nde atehɔ kaamɛ la nkumɛmi nkumekanga, ndo wɛ mbeyaka mbosalɛ kɛnɛ kɛnayɛ ɔlɔlɔ.”
38 Ko nkumekanga akate ate: “Kimihamɛ ayotehɔ kaamɛ la mi ndo dimi layowosalɛ kɛnɛ kɛnayɛ ɔlɔlɔ. Kɛnɛ tshɛ kayoyɔnɔmba, dimi layokosalɛ.”
39 Oma laasɔ, anto tshɛ wakatatɛ ntehɔ Jɔrdana, ndo lam’akatehɔ nkumekanga, nkumekanga akashana la Barazilai+ bizɛ ndo akɔɔtshɔkɔla, ko Barazilai akakalola otsha lakande.
40 Lam’akatehɔ nkumekanga otsha la Ngilingalɛ,+ Kimihamɛ akatehɔ kaamɛ la nde. Ase Juda tshɛ ndo k’ahende ɔtɔi k’ase Isariyɛlɛ wakatehoya nkumekanga.+
41 Oma laasɔ, apami tshɛ w’ase Isariyɛlɛ wakaye le nkumekanga ndo wakawotɛ vate: “Lande na kakakove anangɛso, apami w’ase Juda ko kɔtɔla wɛ nkumekanga, l’ase luudu layɛ la wedi wa Jɔrdana kaamɛ l’apami tshɛ waki Davidɛ?”+
42 Apami tshɛ w’ase Juda wakakadimola apami w’ase Isariyɛlɛ vate: “Dikambo sho mbotɔka la nkumekanga.+ Lande na komalanyu l’ɔtɛ wa dui sɔ? Onde tambɔlɛ ɛngɔ kɛmɔtshi oma le nkumekanga kana tambolongola woshasha ɔmɔtshi?”
43 Koko apami w’ase Isariyɛlɛ wakakadimola apami w’ase Juda vate: “Sho tekɔ la lotshungɔ mbala 10 lo dikambo dia nkumekanga; ɔnkɔnɛ sho tekɔ la lotshungɔ lonyoleki lo kɛnɛ kendana la Davidɛ. Ko lande na kakanyatɔnyɔla? Shi sho mbakatshu ntondo dia tokaloya nkumekanga?” Koko kɛnɛ kakate apami w’ase Juda kakaleke* kɛnɛ kakate apami w’ase Isariyɛlɛ.
Nɔtɛ ka l'ɛse ka dikatshi
^ Kana “panda.”
^ Kana “anima.”
^ Kana “anima.”
^ Tshɛk., “tɔtɛkɛtɛ lo etema wa.”
^ Kana “ewotɔ ami wa lo dikila.”
^ Tshɛk., “nde akanɛ.”
^ Kana ondo “Vɔ.”
^ Kana ondo “oma la.”
^ Tshɛk., “nshi y’ɛnɔnyi.”
^ Kana “kaki wolo oleki.”
