2 Samuɛlɛ 21:1-22
21 Ndjala ka kasha+ kakayala lo nshi ya Davidɛ l’edja k’ɛnɔnyi 3 w’etondo; ɔnkɔnɛ Davidɛ akambola Jehowa kanyi, ko Jehowa akate ate: “Saolo nde l’ase luudu lande wekɔ la onongo wa dikila, nɛ dia nde akadiake ase Ngibiyɔna.”+
2 Ko nkumekanga akelɛ ase Ngibiyɔna+ ndo akasawola la wɔ. (Ase Ngibiyɔna komonga ase Isariyɛlɛ, vɔ waki ase Amɔra+ wakatshikala ndo ase Isariyɛlɛ wakaatshibɛ dia mbatshika, koko Saolo akayange dia mbadiaka+ l’ɔtɛ w’ohetoheto waki la nde lo dikambo dia Isariyɛlɛ ndo dia Juda.)
3 Davidɛ akatɛ ase Ngibiyɔna ate: “Ahombami nyosalɛ ndo ngande wakokami nkomba pɛkato dia nyu ntshɔkɔla etenyi k’okitɔ ka Jehowa?”
4 Ase Ngibiyɔna wakawotɛ vate: “Lo dikambo sɔ, sho bu la ohomba wa mfɛsa kana paonyi+ lo kɛnɛ kendana la Saolo nde l’ase luudu lande ndo sho hatokoke ndjaka kaanga ose Isariyɛlɛ 1.” Ko nde akate ate: “Dimi layonyosalɛ kɛnɛ tshɛ kayonyota.”
5 Vɔ wakatɛ nkumekanga vate: “Onto lakatomane ndo lakakongɛ dia toshila oshiki diaha sho tanema ndooko dihole lo ɛtshi ka nkɛtɛ k’Isariyɛlɛ,+
6 nyotosha anande w’apami 7. Tayohanɛ edo*+ awɔ la ntondo ka Jehowa la Ngibɛa+ ka Saolo, ɔsɔnami wa Jehowa.”+ Ko nkumekanga akate ate: “Dimi layowakimɔ.”
7 Koko nkumekanga akoke Mefibɔshɛtɛ+ ɔna Jɔnatana ɔna Saolo kɛtshi l’ɔtɛ w’etshibelo kakatshibe Davidɛ nde la Jɔnatana+ ɔna Saolo la ntondo ka Jehowa.
8 Ko nkumekanga akɔshi Aramɔni nde la Mefibɔshɛtɛ, ana 2 waki Rizipa+ ɔna Aya la womoto lakandote la Saolo, ndo ana w’apami 5 wakote Mikalɛ*+ ɔna Saolo nde la Adriyɛlɛ+ ɔna Barazilai ose Mehola.
9 Oma laasɔ, nde akaakimɔ le ase Ngibiyɔna, ko vɔ wakahanɛ edo awɔ lo dikona la ntondo ka Jehowa.+ Vɔ akɔ 7 wakadiakema kaamɛ. Vɔ wakadiakema lushi la ntondo la dinela, l’etatelo ka dinela di’asami.
10 Ko Rizipa+ ɔna Aya akɔshi dikoto ndo akadisandjola laadiko dia dive oma ko etatelo ka dinela polo lam’akalwɛ edo akɔ mvula oma l’olongo. Nde kombetawɔ dia tofudu ta l’olongo mbahema laadiko diawɔ la yanyi kana nyama ya ngala ya l’okonda nsukana laawɔ l’otsho.
11 Wakatɛ Davidɛ kɛnɛ kakasale Rizipa ɔna Aya la womoto, oseka wa Saolo.
12 Ko Davidɛ akatshu, akatɔsa weka wa Saolo ndo weka wa ɔnande Jɔnatana oma le ewandji* wa la Jabɛshɛ-Ngiliyadɛ,+ wanɛ wakatowavaka oma lo dihole dia lo sɛkɛ dia la Bɛtɛ-Shana lɛnɛ akaahanɛ ase Filistiya lushi lakadiake ase Filistiya Saolo la Ngiliboa.+
13 Nde akaye la weka wa Saolo ndo weka wa ɔnande Jɔnatana oma lɛkɔ, ko vɔ wakasanganya ndo weka w’apami wakadiakema.*+
14 Oma laasɔ, vɔ wakakundɛ weka wa Saolo la wa ɔnande Jɔnatana lo ɛtshi ka nkɛtɛ ka Bɛnjamina lo Zɛla,+ lo diombo dia Kisha+ ka she. L’ɔkɔngɔ wa vɔ nsala kɛnɛ tshɛ kakawadjangɛ nkumekanga, Nzambi akahokamɛ ɛsɛngɔsɛngɔ awɔ lo dikambo dia wodja.+
15 Ta diakatombe nto lam’asa ase Filistiya l’ase Isariyɛlɛ.+ Ko Davidɛ nde l’ekambi ande wakaholɔ dia tɔlɔsha ase Filistiya, koko Davidɛ akalɛmbɛ efula.
16 Kanula mɔtshi ya Rɛfayima,+ lokombo lande Ishibi-Bɛnɔbɛ aki la dikɔnga diaki la wotsho wa tɔshɛkɛlɛ 300*+ ndo aki la lokuwa la ta l’oyoyo, ko nde akalange ndjaka Davidɛ.
17 Mbala kakɔ ɔtɔi, Abishai+ ɔna Zeruya akaye ndjookimanyiya,+ ko nde akakɔmɔla ose Filistiya akɔ ndo akoodiake. L’etena kɛsɔ, anto waki Davidɛ wakootshibɛ etshibelo kɛnɛ vate: “Wɛ hayokoka ntshɔ kaamɛ la so lo ta nto!+ Wɛ hahombe nyima tala dia Isariyɛlɛ!”+
18 L’ɔkɔngɔ wa laasɔ, ta diakatombe nto lam’asawɔ l’ase Filistiya+ la Ngɔbɔ. L’etena kɛsɔ, Sibekai+ ose Husha akadiake Safu laki kanula ya Rɛfayima.+
19 Ta diakatombe nto lam’asawɔ l’ase Filistiya+ la Ngɔbɔ, ko Elehanana ɔna Jarɛ-Ɔrɛngimɛ laki ose Bɛtɛlɛhɛma akadiake Ngɔliyatɛ ose Ngiti, ɔnɛ laki la dikɔnga diaki la wenyi wele oko osembe w’asadi w’adiba.+
20 Ta diakatombe nto la Ngata lɛnɛ aki pami kɛmɔtshi kaki dikongote dia mamba. Nde aki la mpita 6 lo lonya la lonya ndo mpita 6 lo lokolo la lokolo, tshɛ tshɛ mpita 24. Nde lawɔ aki kanula ya Rɛfayima.+
21 Nde akadjaka ase Isariyɛlɛ tɔfwɛfwɛ.+ Ko Jɔnatana ɔna Shimei+ ɔnango Davidɛ akoodiake.
22 Anto 4 asɔ waki tokanula ta Rɛfayima la Ngata ndo vɔ wakadiakema lo anya wa Davidɛ ndo lo anya w’ekambi ande.+
Nɔtɛ ka l'ɛse ka dikatshi
^ Tshɛk., “tayowawanɛ,” mbuta ate la anya ndo l’ekolo wambɔɔkɔma.
^ Kana ondo “Merabɛ.”
^ Kana ondo “akanga wa ngelo.”
^ Tshɛk., “wakaanema.”
