2 Samuɛlɛ 8:1-18
8 L’ɔkɔngɔ w’etena kɛmɔtshi, Davidɛ akalɛndja ase Filistiya+ ndo akawawahemɛ,+ ko Davidɛ akɔshi Metɛngɛ-Ama oma l’anya w’ase Filistiya.
2 Nde akalɛndja ase Mɔaba+ ndo akawaetanya la nkɛtɛ ko akawaɛdika la ɔkɔdi wa yɛdikɔ. Nde akɛdika ɛkɔdi 2 dikambo dia wanɛ wakahombe ndjakema ndo ɔkɔdi 1 w’otondo dikambo dia wanɛ wakahombe ntshikala la lɔsɛnɔ.+ Ko ase Mɔaba wakayala ekambi waki Davidɛ ndo wakelaka elambo.+
3 Davidɛ akalɛndja Hadadɛzɛrɛ ɔna Rɛhɔba nkumekanga ka Zoba+ etena kakandatatshɔka dia tokaloya lowandji lande lo Ɔkɛdi w’Efaratɛ.+
4 Davidɛ akande ambahemi wa mfalasa kinunu la nkama esambele (1 700) ndo asɔlayi wakɛndakɛnda l’ekolo w’oma le nde nunu akumi ahende (20 000). Oma laasɔ, Davidɛ akahembola eshisha wa mfalasa tshɛ yakotola pusupusu, onyake 100.+
5 Lam’akaye ase Suriya wa la Damasɛkɛ+ dia ndjokimanyiya Hadadɛzɛrɛ nkumekanga ka Zoba, Davidɛ akadiake ase Suriya nunu akumi ahende la pende (22 000).+
6 Oma laasɔ, Davidɛ akakitsha elui w’asɔlayi la Suriya ka la Damasɛkɛ, ko ase Suriya wakayala ekambi wa Davidɛ ndo wakawelaka elambo. Jehowa akakimanyiyaka Davidɛ dia mbidja otshumba* dihole tshɛ diakandatshɔka.+
7 Ndo nto, Davidɛ akɔshi dingawo dia paonyi di’ebolonga oma le ekambi wa Hadadɛzɛrɛ, ko akaditɔlɛ la Jɛrusalɛma.+
8 Nkumekanga Davidɛ akɔshi nkonga efula ka mamba oma la Beta ndo la Berɔtai, esomba wa Hadadɛzɛrɛ.
9 Tɔi nkumekanga ka Hamatɛ+ akoke dia Davidɛ ambɔlɛndja asɔlayi tshɛ wa Hadadɛzɛrɛ.+
10 Ɔnkɔnɛ, Tɔi akatome ɔnande Jɔrama le nkumekanga Davidɛ dia towombola kana nde ekɔ ki ndo dia towandola l’ɔtɛ wakandalɔsha ndo wakandalɛndja Hadadɛzɛrɛ (nɛ dia tena efula, Hadadɛzɛrɛ akalɔshaka Tɔi), ko nde akawela diangɔ dia mfɛsa, dia paonyi ndo dia nkonga.
11 Nkumekanga Davidɛ akakidia diangɔ diakɔ dikambo dia Jehowa kaamɛ la mfɛsa ndo paonyi yakandakidia oma lo wedja ɛnɛ tshɛ wakandahemɛ:+
12 Oma la Suriya ndo Mɔaba,+ oma le ase Amɔna, ase Filistiya,+ ase Amalɛka+ ndo oma lo diangɔ dia dimbo dia Hadadɛzɛrɛ+ ɔna Rɛhɔba nkumekanga ka Zoba.
13 Ndo nto, Davidɛ akayatongɛ lokombo lam’akandakalola oma la todiaka ase Ɛdɔmɛ nunu dikumi l’enanɛi (18 000) lo Okidi wa Lɛɛhɔ.+
14 Nde akakitsha elui w’asɔlayi la Ɛdɔmɛ. Lo Ɛdɔmɛ w’otondo, nde akakitsha elui w’asɔlayi, ko ase Ɛdɔmɛ tshɛ wakayala ekambi waki Davidɛ.+ Jehowa akakimanyiyaka Davidɛ dia mbidja otshumba* dihole tshɛ diakandatshɔka.+
15 Davidɛ akatetemala mbolɛ Isariyɛlɛ w’otondo+ ndo Davidɛ akalomboshaka anto ande tshɛ+ la losembwe ndo la sambo k’ɔlɔlɔ.+
16 Jɔaba+ ɔna Zeruya aki owandji w’asɔlayi ndo Jɛhɔshafata+ ɔna Ahiludɛ aki ɔkɔndɔdi.
17 Zadɔka+ ɔna Ahitubɛ nde la Ahimɛlɛkɛ ɔna Abiyatara waki ɛlɔmbɛdi ndo Seraya aki ofundji.
18 Bɛnaya+ ɔna Jɛhɔyada aki owandji w’ase Kerɛtɛ ndo w’ase Pelɛtɛ.+ Ana w’apami wa Davidɛ wakayala ekambi wa weke.*
Nɔtɛ ka l'ɛse ka dikatshi
^ Kana “nkondja panda.”
^ Kana “nkondja panda.”
^ Tshɛk., “wakayala ɛlɔmbɛdi.”
