2 Joani 1:1-13
1 Dimi ekumanyi* lambofundɛ womoto lakasɔnama kaamɛ ndo anande wokami mɛtɛ ngandji, aha dimɛ oto, koko ndo wanɛ tshɛ wambeya akambo wa mɛtɛ,
2 l’ɔtɛ w’akambo wa mɛtɛ wele le so ndo wayongaka la so pondjo pondjo.
3 Ɔlɔlɔ waheyama mbɛdika, kɛtshi ndo wɔladi w’oma le Nzambi Shɛso ndo w’oma le Yeso Kristo y’Ɔna Shɛso kaamɛ l’akambo wa mɛtɛ ndo ngandji wayongaka la so.
4 Lekɔ l’ɔngɛnɔngɛnɔ w’efula, nɛ dia lakatane anayɛ amɔtshi wakɛndakɛnda l’akambo wa mɛtɛ+ oko wakatalongola didjango oma le Shɛso.
5 Ɔnkɔnɛ, wɛ womoto lakasɔnama le, lambokɔsɛngasɛnga dia sho mbokana ngandji. (Aha ɔlɛmbɛ w’oyoyo kakofundɛmi, koko wɔnɛ wakatoke oma k’etatelo.)+
6 Ndo ngandji nembetshiyaka dia sho ntetemala nkɛndakɛnda lo ndjela ɛlɛmbɛ ande.+ Oko wakanyoke oma k’etatelo, ɔlɛmbɛ ande ele dia nyu ntetemala nkɛndakɛnda lo ngandji.
7 Nɛ dia akesanyi efula wambotomba l’andja,+ anto wahetawɔ dia Yeso Kristo akaye lo demba.+ Onto ɔsɔ ekɔ okesanyi ndo otunyi wa Kristo.+
8 Nyoyalame diaha nyu ndjoshisha kɛnɛ kakatakambe wolo dia kikondja, koko dia nyu nkondja difuto+ di’otondo.
9 Onto tshɛ latamba wetshelo wa Kristo ndo lahatshikala lo wetshelo akɔ hetawɔma le Nzambi.+ Ɔnɛ latshikala lo wetshelo akɔ mbetawɔmaka le Shɛso ndo le Ɔnande.+
10 Naka onto ɔmɔtshi amboya le nyu ko nde haye la wetshelo ɔnɛ, tanyoolongolake lo mvudu yanyu+ ndo tanyowoshake mɔyɔ.
11 Nɛ dia onto lawosha mɔyɔ amboyasha kaamɛ la nde l’etsha ande wa kɔlɔ.
12 Kaanga kemi l’akambo efula wa nyofundɛ, haakombola nsala dui sɔ lofunda lo dikatshi la ashi wa mukanda, koko lekɔ lo nongamɛ dia ndja le nyu ndo ndjosawola la nyu elungi l’elungi dia ɔngɛnɔngɛnɔ anyu monga lo yɛdikɔ y’efula.
13 Ana wa kadiyɛyɛ lele ɔsɔnami wakotomɛ mɔyɔ.
Nɔtɛ ka l'ɛse ka dikatshi
^ Kana “opalanga.”
