2 Nkumi ya dikanga 15:1-38
15 L’ɔnɔnyi wa 27 w’ɛlɔmbwɛlɔ ka Jɛrɔbɔama* nkumekanga k’Isariyɛlɛ, Azariya*+ ɔna Amaziya+ nkumekanga ka Juda akayala nkumekanga.+
2 Nde aki l’ɛnɔnyi 16 lam’akandayala nkumekanga ndo nde akolɛ l’edja k’ɛnɔnyi 52 la Jɛrusalɛma. Nyango lokombo lande Jɛkɔliya, ose Jɛrusalɛma.
3 Nde akatetemala nsala kɛnɛ kaki ɔlɔlɔ lo washo wa Jehowa oko wakasalaka Amaziya wa she.+
4 Koko ahole wa la diko kominyɛma+ ndo anto wakatetemala nambola ndo ntshumba elambo lo ahole wa la diko.+
5 Jehowa akasoya nkumekanga ko nde akatshikala kanga sudi+ polo lushi la nyɔi kande; nde akatshikalaka lo luudu l’anganyi l’anto akina+ ndo l’etena kɛsɔ, Jɔtama+ ɔna nkumekanga aki l’ɔkɛndɛ wa luudu* ndo akalomboshaka anto lo wodja.+
6 Lo kɛnɛ kendana l’etenyi kekina k’ɔkɔndɔ wa Azariya+ ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda?
7 Oma laasɔ, Azariya aketama dia momuya kaamɛ la watshɛnde+ ko wakookundɛ lale watshɛnde l’Osomba wa Davidɛ, ko ɔnande Jɔtama akayala nkumekanga lo dihole diande.
8 L’ɔnɔnyi wa 38 w’ɛlɔmbwɛlɔ ka Azariya+ nkumekanga ka Juda, Zɛkariya+ ɔna Jɛrɔbɔama akayala nkumekanga k’Isariyɛlɛ oma la Samariya ndo nde akolɛ l’edja ka ngɔndɔ 6.
9 Nde akasalaka kɛnɛ kaki kɔlɔ lo washo wa Jehowa oko wakasalaka watshɛnde. Nde kotshika pɛkato yakakonya Jɛrɔbɔama ɔna Nebatɛ Isariyɛlɛ dia nsala.+
10 Oma laasɔ, Shaluma ɔna Jabɛshɛ akawɔtwɛ sheke ndo akoodiake+ la Ibɛlɛamɛ.+ L’ɔkɔngɔ wa nde mbodiaka, nde akayala nkumekanga lo dihole diande.
11 Lo kɛnɛ kendana l’etenyi kekina k’ɔkɔndɔ wa Zɛkariya, awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ.
12 Kɛsɔ akakotsha ɛtɛkɛta wa Jehowa wakandatɛ Jehu ate: “Nɔnga 4 y’anayɛ+ yayodjasɛ lo kiti ka lowandji k’Isariyɛlɛ.”+ Ndo ngasɔ mbakadiasalema.
13 Shaluma ɔna Jabɛshɛ akayala nkumekanga l’ɔnɔnyi wa 39 w’ɛlɔmbwɛlɔ ka Uziya*+ nkumekanga ka Juda ndo nde akolɛ ngɔndɔ k’otondo la Samariya.
14 Oma laasɔ, Menahɛma ɔna Ngadi akaye oma la Tiriza+ oya la Samariya, ko nde akadiake Shaluma+ ɔna Jabɛshɛ la Samariya. L’ɔkɔngɔ wa nde mbodiaka, nde akayala nkumekanga lo dihole diande.
15 Lo kɛnɛ kendana l’etenyi kekina k’ɔkɔndɔ wa Shaluma ndo sheke yakandɔtɔ, awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ.
16 L’etena kɛsɔ mbakaye Menahɛma oma la Tiriza ndo mbakandalanya Tifisa, wanɛ tshɛ wakadjasɛka lɔkɔ ndo ɛtshi katɔ ka nkɛtɛ k’otondo, nɛ dia vɔ kombodiholɛ asoko awɔ. Nde akoohandjola ndo akaate akundju wa wamato awɔ wele la waemi.
17 L’ɔnɔnyi wa 39 w’ɛlɔmbwɛlɔ ka Azariya nkumekanga ka Juda, Menahɛma ɔna Ngadi akayala nkumekanga k’Isariyɛlɛ ndo nde akolɛ l’edja k’ɛnɔnyi 10 la Samariya.
18 Nde akatetemala nsala kɛnɛ kaki kɔlɔ lo washo wa Jehowa. Nde kotshika pɛkato tshɛ yakakonya Jɛrɔbɔama ɔna Nebatɛ Isariyɛlɛ dia nsala+ lo nshi yande tshɛ.
19 Pulu+ nkumekanga k’Asuriya akaye lo wodja, ko Menahɛma akasha Pulu talata* kinunu (1 000) ya mfɛsa lo woho wakandoosukɛ dia nkeketsha diolelo+ lo anya ande.
20 Ɔnkɔnɛ, Menahɛma akɔshi mfɛsa shɔ oma lo Isariyɛlɛ lo ndjihika oma le anto wa lokumu ndo akanga w’ɛngɔnyi.+ Nde akasha nkumekanga k’Asuriya tɔshɛkɛlɛ* 50 ta mfɛsa dikambo di’onto l’onto. Oma laasɔ, nkumekanga k’Asuriya akakalola ndo nde kotshikala nto lo wodja.
21 Lo kɛnɛ kendana l’etenyi kekina k’ɔkɔndɔ wa Menahɛma+ ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ?
22 Oma laasɔ, Menahɛma aketama dia momuya kaamɛ la watshɛnde, ko ɔnande Pekahiya akayala nkumekanga lo dihole diande.
23 L’ɔnɔnyi wa 50 w’ɛlɔmbwɛlɔ ka Azariya nkumekanga ka Juda, Pekahiya ɔna Menahɛma akayala nkumekanga k’Isariyɛlɛ oma la Samariya ndo nde akolɛ l’edja k’ɛnɔnyi 2.
24 Nde akatetemala nsala kɛnɛ kaki kɔlɔ lo washo wa Jehowa. Nde kotshika pɛkato yakakonya Jɛrɔbɔama ɔna Nebatɛ Isariyɛlɛ dia nsala.+
25 Oma laasɔ, Peka+ ɔna Rɛmaliya, owandji ande w’asɔlayi akawɔtwɛ sheke ko akoodiake la Samariya lo tshoto ya luudu* la nkumekanga lodingami la mpele nde la Arangoba ndo Ariyɛ. Nde aki kaamɛ l’apami 50 w’ase Ngiliyadɛ; ndo l’ɔkɔngɔ wa nde mbodiaka, nde akayala nkumekanga lo dihole diande.
26 Lo kɛnɛ kendana l’etenyi kekina k’ɔkɔndɔ wa Pekahiya ndo kɛnɛ tshɛ kakandasale, awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ.
27 L’ɔnɔnyi wa 52 w’ɛlɔmbwɛlɔ ka Azariya nkumekanga ka Juda, Peka+ ɔna Rɛmaliya akayala nkumekanga k’Isariyɛlɛ oma la Samariya ndo nde akolɛ l’edja k’ɛnɔnyi 20.
28 Nde akatetemala nsala kɛnɛ kaki kɔlɔ lo washo wa Jehowa ndo nde kotshika pɛkato yakakonya Jɛrɔbɔama ɔna Nebatɛ Isariyɛlɛ dia nsala.+
29 Lo nshi ya Peka nkumekanga k’Isariyɛlɛ, Tingilatɛ-Pilɛsɛrɛ+ nkumekanga k’Asuriya akɔtwɛ Idjɔna, Abɛlɛ-Bɛtɛ-Maaka,+ Janɔa, Kɛdɛshɛ,+ Hazɔra, Ngiliyadɛ+ ndo Ngalileya, mbuta ate ɛtshi ka nkɛtɛ k’otondo ka Nafɛtali+ la ta ko akatɔlɛ anto wa lɛkɔ lo lɔhɔmbɔ lo Asuriya.+
30 Oma laasɔ, Hɔshɛya+ ɔna Ela akɔtwɛ Peka ɔna Rɛmaliya sheke, akɔɔkɔmɔla ndo akoodiake, ko nde akayala nkumekanga lo dihole diande lo ɔnɔnyi wa 20 w’ɛlɔmbwɛlɔ ka Jɔtama+ ɔna Uziya.
31 Lo kɛnɛ kendana l’etenyi kekina k’ɔkɔndɔ wa Peka ndo kɛnɛ tshɛ kakandasale, awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ.
32 L’ɔnɔnyi wa 2 w’ɛlɔmbwɛlɔ ka Peka ɔna Rɛmaliya nkumekanga k’Isariyɛlɛ, Jɔtama+ ɔna Uziya+ nkumekanga ka Juda akayala nkumekanga.
33 Nde aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 16 la Jɛrusalɛma. Nyango lokombo lande Jerusha, ɔna Zadɔka.+
34 Nde akatetemala nsala kɛnɛ kaki ɔlɔlɔ lo washo wa Jehowa oko wakasalaka Uziya+ wa she.
35 Koko ahole wa la diko kominyɛma ndo anto wakatetemala nambola ndo ntshumba elambo lo ahole wa la diko.+ Nde mbakake soko dia la diko dia luudu la Jehowa.+
36 Lo kɛnɛ kendana l’etenyi kekina k’ɔkɔndɔ wa Jɔtama ndo kɛnɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda?
37 Lo nshi shɔ, Jehowa akatatɛ ntoma Rɛzina nkumekanga ka Suriya ndo Peka+ ɔna Rɛmaliya dia ndɔsha Juda.+
38 Oma laasɔ, Jɔtama aketama dia momuya kaamɛ la watshɛnde ndo wakookundɛ lale watshɛnde l’Osomba wa Davidɛ dia tshɛnde. Ko ɔnande Ahaza akayala nkumekanga lo dihole diande.
Nɔtɛ ka l'ɛse ka dikatshi
^ Kitshimudi ate: “Jehowa akakimanyiya.” Nde kelamɛ Uziya lo 2Ku 15:13; 2Ɛk 26:1-23; Isa 6:1; ndo lo Zɛk 14:5.
^ Mbuta ate Jɛrɔbɔama ya II.
^ Kana “luudu l’owandji.”
^ Lokombo lokina laki Azariya.
^ Kana “luudu l’owandji.”
