2 Nkumi ya dikanga 18:1-37
18 L’ɔnɔnyi wa 3 w’ɛlɔmbwɛlɔ ka Hɔshɛya+ ɔna Ela nkumekanga k’Isariyɛlɛ, Hɛzɛkiya+ ɔna Ahaza+ nkumekanga ka Juda akayala nkumekanga.
2 Nde aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 29 la Jɛrusalɛma. Nyango lokombo lande Abi,* ɔna Zɛkariya.+
3 Nde akatetemala nsala kɛnɛ kaki ɔlɔlɔ lo washo wa Jehowa+ oko wakasalaka Davidɛ tshɛnde.+
4 Nde kakanya ahole wa la diko,+ kakaatshatsha dimɛta dia l’ave ndo kakahendjahendja kimɛta ka l’osongo.*+ Ndo nto, nde akatɛtshatɛtsha oloyi wa nkonga wakasale Mɔsɛ,+ nɛ dia polo l’etena kɛsɔ, ase Isariyɛlɛ wakatshumbɛka oloyi akɔ olambo ndo vɔ wakelamɛka ɔnɛ ekishi k’oloyi wa nkonga.*
5 Nde akayaɛkɛka le Jehowa+ Nzambi k’Isariyɛlɛ. L’atei wa nkumi ya dikanga tshɛ ya Juda yaki l’ɔkɔngɔ ande ndo yaki la ntondo kande, ndooko laki oko nde.
6 Nde akamamema Jehowa.+ Nde kotshika mboyela ndo akatetemala nkitanyiya wadjango wakasha Jehowa Mɔsɛ.
7 Ko Jehowa aki kaamɛ la nde. Dihole tshɛ diakandatshɔka, nde akasalaka akambo la lomba. Nde akatɔmbɔkwɛ nkumekanga k’Asuriya ndo akatone mbokambɛ.+
8 Ndo nto, nde akalɛndja ase Filistiya+ polo la Ngaza ndo lo bɛtshi diatɔ dia nkɛtɛ, oma lo tshoto y’etangelo polo l’osomba wodingami la mpele.*
9 L’ɔnɔnyi wa 4 w’ɛlɔmbwɛlɔ ka nkumekanga Hɛzɛkiya, mbuta ate ɔnɔnyi wa 7 w’ɛlɔmbwɛlɔ ka Hɔshɛya+ ɔna Ela nkumekanga k’Isariyɛlɛ, Shalamanɛsɛrɛ nkumekanga k’Asuriya akaye ndjɔlɔsha Samariya ndo akakidinge.+
10 Vɔ wakakiɔshi+ lo ekomelo k’ɛnɔnyi 3. L’ɔnɔnyi wa 6 w’ɛlɔmbwɛlɔ ka Hɛzɛkiya, ɔnɔnyi wa 9 w’ɛlɔmbwɛlɔ ka Hɔshɛya nkumekanga k’Isariyɛlɛ mbakɔsama Samariya.
11 Oma laasɔ, nkumekanga k’Asuriya akatɔlɛ ase Isariyɛlɛ lo lɔhɔmbɔ+ lo Asuriya ndo akatowadjashiya la Hala ndo la Habɔra, suke la ɔkɛdi wa Ngɔzana ndo lo esomba w’ase Mediya.+
12 Dui sɔ diakasalema nɛ dia vɔ kopokamɛ dui dia Jehowa Nzambi kawɔ, koko wakatetemala mɔnyɔla sheke yande, kɛnɛ tshɛ kakadjanga Mɔsɛ okambi wa Jehowa.+ Vɔ kopokamɛ ndo vɔ kokitanyiya.
13 L’ɔnɔnyi wa 14 w’ɛlɔmbwɛlɔ ka nkumekanga Hɛzɛkiya, Sɛnakɛribɛ nkumekanga k’Asuriya+ akaye ndjɔlɔsha esomba tshɛ w’ase Juda wakadingama la mpele ndo akawaɔshi.+
14 Ko Hɛzɛkiya nkumekanga ka Juda akatome dui le nkumekanga k’Asuriya la Lakishi ate: “Dimi kambosala kɔlɔ. Tɔndɔshake, ko dimi layokosha kɛnɛ tshɛ kayoyompika.” Nkumekanga k’Asuriya akahike dia Hɛzɛkiya nkumekanga ka Juda mfuta kibawo ka talata* 300 ya mfɛsa ka dimɛna ndo talata 30 ya paonyi.
15 Ko Hɛzɛkiya akakimɔ mfɛsa tshɛ yakakoke tanema lo luudu la Jehowa ndo lo waombelo wa lo luudu* la nkumekanga.+
16 L’etena kɛsɔ, Hɛzɛkiya akanya* nkuke ya lo tɛmpɛlɔ+ ka Jehowa ndo dikundji dia la soko diele Hɛzɛkiya nkumekanga ka Juda ndamɛ akadikite+ paonyi, ko nde akadisha nkumekanga k’Asuriya.
17 Oma laasɔ, nkumekanga k’Asuriya akatome Taratana,* Rabisarisi* ndo Rabishakɛ* kaamɛ la olui wa woke w’asɔlayi w’oma la Lakishi+ otsha le nkumekanga Hɛzɛkiya la Jɛrusalɛma.+ Vɔ wakatshu otsha la Jɛrusalɛma ndo wakatemala suke la ɔlɔnda watɔla ashi otsha lo difuku di’ashi dia la diko diele lo mboka ka woke k’otsha lo ekambɔ k’osodi w’ahɔndɔ.+
18 Lam’akawelɛ nkumekanga dia nde ntomba, Eliyakima+ ɔna Hilikiya laki owandji w’ase luudu* la nkumekanga, Shebina+ laki ofundji ndo Joa ɔna Asafu laki ɔkɔndɔdi wakatombe oya le wɔ.
19 Ko Rabishakɛ akawatɛ ate: “Lam’alanganyu, nyote Hɛzɛkiya nyate: ‘Nkumekanga ka woke, nkumekanga k’Asuriya kata ate: “Lende ohikami wɛkamu+ ayɛ?
20 Wɛ ekɔ lo mbuta wate: ‘Lekɔ la diewo ndo la wolo wa ndɔ ta,’ koko ɔsɔ ekɔ ɛtɛkɛta w’anyanya. Le na amboyoyaɛkɛ katoyosombɔ tɔmbɔkwɛmi?+
21 Eenda, wɛ ekɔ lo ndjaɛkɛ lo osukɔ w’Edjibito,+ lɔkɔmbɛ lambɔtɛtshatɛtshama lele naka onto liɛkama, kete layowɔtɔ lo diwambo ndo layowotondola. Ngasɔ mbele Farawɔ nkumekanga k’Edjibito le wanɛ tshɛ wayaɛkɛ le nde.
22 Ndo naka nyu mbutɛmi nyate: ‘Tekɔ lo ndjaɛkɛ le Jehowa Nzambi+ kaso,’ shi nde kakanga ahole wa la diko ndo dilambwelo diambonya+ Hɛzɛkiya etena katɛnde Juda la Jɛrusalɛma ate: ‘Nyu pombaka nkusama la ntondo ka elambwelo kɛnɛ la Jɛrusalɛma’?”’+
23 Ɔnkɔnɛ lam’alangayɛ, nyɔkɔhɛ wɛ la nkumɛmi nkumekanga k’Asuriya nganɛ: Dimi layokosha mfalasa nunu pende (2 000) naka wɛ ekɔ la akoka wa ntana ambahemi ayɔ.+
24 Ko ngande wayoyokoka mbitshanya kaanga nguvɛrnɛrɛ 1 koleki tshitshɛ l’atei w’ekambi wa nkumɛmi lo ndjaɛkɛ le Edjibito dia kosha pusupusu ndo ambahemi wa mfalasa?
25 Shi la lotshungɔ l’oma le Jehowa kamomoya ndjɔlɔsha dihole nɛ dia dilanya? Jehowa ndamɛ akambutɛ ate: ‘Tshɔka tɔlɔsha wodja ɔnɛ kele towolanya.’”
26 Ko Eliyakima ɔna Hilikiya, Shebina+ ndo Joa wakatɛ Rabishakɛ+ vate: “Lam’alangayɛ, tɛkɛta la ekambi ayɛ lo Arameyɛ*+ dikambo sho mbokaka ɔtɛkɛta akɔ. Tɔtɛkɛtake la so l’ɔtɛkɛta w’ase Juda diaha anto wele lo ehele mboka.”+
27 Koko Rabishakɛ akawatɛ ate: “Onde paka le yɛ wɛ la nkumɛyɛ oto mbakantome nkumɛmi dia ndjota ɛtɛkɛta ɛsɔ? Shi ndo le apami wodjashi lo ehele, wanɛ wayɔlɛ tumi yawɔ hita ndo wayɔnɔ wanyi awɔ hita kaamɛ la nyu?”
28 Oma laasɔ, Rabishakɛ akemala ndo akawelɛ l’ɔtɛkɛta w’ase Juda ate: “Nyohokame dui dia nkumekanga ka woke, nkumekanga k’Asuriya.+
29 Nkumekanga kata ate: ‘Tanyetawɔke dia Hɛzɛkiya nyokesa, nɛ dia nde bu la akoka wa nyotshungola oma lo anya ami.+
30 Ndo tanyetawɔke dia Hɛzɛkiya nyokonya dia nyu ndjaɛkɛ le Jehowa lo mbuta ɔnɛ: “Ndooko onyake Jehowa ayototsha ndo osomba ɔnɛ hawotokimɔma lo anya wa nkumekanga k’Asuriya.”+
31 Tanyohokamɛke Hɛzɛkiya, nɛ dia nkumekanga k’Asuriya kata ate: “Nyodje ki la mi ndo nyoyakimɔ* ko onto l’onto ayɔlɛka diangɔ di’oma lo ɔkɔdi ande wa vinyɔ, di’oma l’osongo ande wa fingo ndo ayɔnɔka ashi w’oma lo ɛtɛkɔ kande hita,
32 polo lam’ayomoya ko ndjonyɔsa dia nyɔtɔla otsha lo wodja wele oko wodja anyu hita,+ wodja wele la ntɔngɔ ndo la wanu w’eyoyo, wodja wele la mbo ya ndɛ ndo la dikambɔ dia vinyɔ, wodja wele la esongo w’ɔlivɛ ndo la osanga. Ko nyu nyayɔsɛna ndo hanyotovɔ. Tanyohokamɛke Hɛzɛkiya, nɛ dia nde ekɔ lo nyokesa ate: ‘Jehowa ayototshungola.’
33 Onde ekɔ jambizambi mɔtshi y’ase wedja yambotshungolaka wodja ayɔ oma lo anya wa nkumekanga k’Asuriya?
34 Lende ele tozambizambi ta Hamatɛ+ ndo ta Arapadɛ? Lende ele tozambizambi ta Sefaravayima,+ ta Hɛna ndo ta Iva? Onde tɔ takatshungola Samariya oma lo anya ami?+
35 Akɔna l’atei wa tozambizambi tshɛ ta wedja akɔ akatshungola wodja awɔ oma lo anya ami, dia Jehowa ndjotshungola Jɛrusalɛma oma lo anya ami?”’”+
36 Koko anto wakatshikala ki ndo vɔ kombokadimola ndooko dui, nɛ dia nkumekanga akate ate: “Tanyookadimolake.”+
37 Koko Eliyakima ɔna Hilikiya laki owandji w’ase luudu* la nkumekanga, Shebina laki ofundji ndo Joa ɔna Asafu laki ɔkɔndɔdi wakaye le Hɛzɛkiya la ahɔndɔ awɔ wa batatɛ ko wakawotɛ ɛtɛkɛta wa Rabishakɛ.
Nɔtɛ ka l'ɛse ka dikatshi
^ Okangelo wa lokombo Abidja.
^ Enda Elembetshielo.
^ Kana “wakelamɛka ɔnɛ Nehushitana.”
^ Mbuta ate lo dihole tshɛ, oyadi lɛnɛ ele anto bu efula kana lɛnɛ ele anto efula.
^ Kana “luudu l’owandji.”
^ Tshɛk., “akongola.”
^ Kana “kapita k’amangudi wa wanu.”
^ Kana “owandji wa laka nkumekanga.”
^ Kana “kɔmanda.”
^ Kana “luudu l’owandji.”
^ Kana “Suriya.”
^ Tshɛk., “Nyosale ɔtshɔkɔ kaamɛ la mi ndo nyoye le mi.”
^ Kana “luudu l’owandji.”
