2 Nkumi ya dikanga 4:1-44
4 Womoto ɔmɔtshi l’atei wa wadi w’ana w’amvutshi+ akawelɛ Elisha ate: “Omɛmi lele okambi ayɛ ambovɔka ndo wɛ mbeyaka dimɛna dia okambi ayɛ akokaka Jehowa wɔma+ tena tshɛ. Koko onto ɔmɔtshi lonkole dibasa amboya ndjɔsa anami akɔ 2 dia vɔ monga mfumbe yande.”
2 Ko Elisha akawotɛ ate: “Akokami kosalɛ? Ombutɛ, kakɔna kele la yɛ lo luudu?” Womoto akɔ akakadimola ate: “Okambi ayɛ ndooko la ɛngɔ lo luudu, onyake mpamba* 1 k’esɔ.”+
3 Ko nde akate ate: “Tshɔka tɔlɔmbɛ asukanyi ayɛ tshɛ diangɔ, mbuta ate diangɔ dia hwe. Tokomɛke lo nɔmba yema tshitshɛ.
4 Oma laasɔ ko wɛ mbɔtɔ wɛ l’anayɛ l’etei, ko wɛ ndjiha lokuke. Kolodia esɔ lo diangɔ sɔ tshɛ, ko wɛ nkitsha nɛ diambolola l’omamu.”
5 Ko womoto akɔ akamɔ oma lalende.
Lam’akandɔtɔ nde l’anande l’etei ko nde ndjiha lokuke, vɔ wakawosha diangɔ diakɔ, ko nde akatetemala mangola esɔ lɔkɔ.+
6 Lam’akalole diangɔ diakɔ, nde akatɛ ɔnande ɔmɔtshi ate: “Ombela ɛngɔ kekina.”+ Koko nde akawotɛ ate: “Ndooko ɛngɔ kekekɔ nto.” Ko esɔ kakɔ kakakomɛ.+
7 Ɔnkɔnɛ, womoto akɔ akaye, akatɛ okambi wa Nzambi ka mɛtɛ, ko nde akawotɛ ate: “Tshɔka tosondja esɔ kele futa abasa wele la yɛ ndo kɛnɛ kayotshikala, ko wɛ ndjasɛnya wɛ l’anayɛ.”
8 Lushi lɔmɔtshi, Elisha akatshu otsha la Shunɛma+ lɛnɛ aki womoto ɔmɔtshi la lokumu, ko womoto akɔ akɔɔsɛngasɛnga dia nde ndɛ yangɔ laawɔ.+ Mbala tshɛ kakandetaka laawɔ, nde akemalaka laawɔ dia ndɛ.
9 Ko womoto akɔ akatɛ omɛnde ate: “Dimi mbeyaka dia okambi w’ekila waki Nzambi keta lanɛ mbala la mbala.
10 Lam’alangayɛ, tosale viudu mɔtshi ya ndala la diko+ kele towodje mbeto, mɛsa, nkɔsa la ekundji ka tala. Laasɔ mbala tshɛ kayondoyaka le so, nde koka ndjodjasɛka lɔkɔ.”+
11 Lushi lɔmɔtshi, nde akaye laawɔ ko akatshu otsha lo luudu la ndala la la diko dia tetama.
12 Ko nde akatɛ Ngɛhazi+ k’okambi ande ate: “Elɛ womoto l’ose Shunɛma+ ɔnɛ.” Ko nde akawelɛ ndo womoto akɔ akemala la ntondo kande.
13 Oma laasɔ nde akatɛ Ngɛhazi ate: “Lam’alangayɛ, tɛnde wate: ‘Wɛ amboyaɛnya paa efula dikambo diaso.+ Akokaso kosalɛ?+ Onde kankɔtɛkɛtɛ le nkumekanga+ kana le owandji w’asɔlayi?’” Koko nde akakadimola ate: “L’atei w’anto ami kodjashimi.”
14 Ko nde akate ate: “Ko laasɔ akokaso mbosalɛ?” Ngɛhazi akate ate: “Lo mɛtɛ, nde bu la ɔna+ ndo omɛnde aya osombe.”
15 Mbala kakɔ ɔtɔi nde akate ate: “Elɛnde.” Ko nde akelɛ womoto akɔ ko nde akemala la soko.
16 Oma laasɔ, nde akate ate: “Ɔnɔnyi wayaye l’etena ka nganɛ, wɛ ayɛmba ɔna pami.”+ Koko womoto akɔ akate ate: “Nkumɛmi okambi wa Nzambi ka mɛtɛ le, keema! Totɛke okambi ayɛ kashi.”
17 Ko womoto akɔ akatshu diemi ndo akote ɔna pami lo etena kakɔ kaamɛ lo ɔnɔnyi wakayele, paka oko wakawotɛ Elisha.
18 Ɔnakɔ akole, ko lushi lɔmɔtshi nde akatshu le she lɛnɛ akinde kaamɛ la amunyi.
19 Nde akatɛka she ate: “Lekɔ lo mboka l’ɔtɛ, lekɔ lo mboka l’ɔtɛ!” Ko she akatɛ okambi ande ate: “Ɛmbande otsha le nyango.”
20 Ɔnkɔnɛ, nde akawɛmbɛ dia mbokaloya le nyango, ndo nde akadjasɛ lo dihɛlɔ dia nyango polo la midi; ko nde akavu.+
21 Oma laasɔ, nyango akadɛ ko akatowetanya lo mbeto kaki okambi wa Nzambi ka mɛtɛ,+ ko nde akadihe lokuke ko akatshu.
22 Nde akelɛ omɛnde ko akate ate: “Lam’alangayɛ, ontome okambi ɔmɔtshi la mponda kɛmɔtshi kele ntshu yema esadi otsha le okambi wa Nzambi ka mɛtɛ, kele nkalole.”
23 Koko omɛnde akate ate: “Lande na katayatshu dia towɛna ɛlɔ? Ɛlɔ aha valelo ya ngɔndɔ+ kana sabato.” Ko womoto akɔ akate ate: “Ndooko dikambo.”
24 Ko womoto akɔ akakitsha edee lo mponda ndo akatɛ okambi ande ate: “Totshu esadi esadi. Tokitshakitshake lowango l’ɔtɛ ami naka latakotɛ.”
25 Ɔnkɔnɛ womoto akɔ akatshu le okambi wa Nzambi ka mɛtɛ lo Dikona dia Karamɛlɛ. Kam’akawɛnyi okambi wa Nzambi ka mɛtɛ oma l’etale, nde akatɛ Ngɛhazi k’okambi ande ate: “Eenda, womoto l’ose Shunɛma nde ongo.
26 Lam’alangayɛ, lawɔ kele tohomane la nde ndo towombole wate: ‘Onde wɛ ekɔ ki? Onde omɛyɛ ekɔ ki? Onde ɔnayɛ ekɔ ki?’” Ko womoto akɔ akate ate: “Sho tshɛ tekɔ ki.”
27 Kam’akandakome le okambi wa Nzambi ka mɛtɛ lo dikona, mbala kakɔ ɔtɔi nde akakimɛ ekolo+ ande. Ko Ngɛhazi akasukana dia mbosokola, koko okambi wa Nzambi ka mɛtɛ akate ate: “Tshikande, nɛ dia nde ekɔ la lɔkɔnyɔ l’efula,* ndo Jehowa ambombishɛ dui diakɔ, nde hambute.”
28 Oma laasɔ, womoto akɔ akate ate: “Onde dimi lakalɔmbɛ nkumɛmi ɔna? Onde dimi kombuta nte: ‘Tombishake elongamelo ka kashi’?”+
29 Mbala kakɔ ɔtɔi nde akatɛ Ngɛhazi ate: “Keleka ahɔndɔ ayɛ lo lokende,+ kimɛ danga diami lo lonya kele tshɔka. Naka wɛ ambohomana l’onto, towoshake mɔyɔ ndo naka onto ambokosha mɔyɔ, tetawɔke. Tshɔka tokitsha danga diami lo elungi k’ɔna.”
30 Ko nyango ɔna akate ate: “Lo mɛtɛ oko wele Jehowa la lɔsɛnɔ ndo oko weyɛ* la lɔsɛnɔ, dimi hantokotshika.”+ Ɔnkɔnɛ nde akemala ko akatshu kaamɛ la nde.
31 Ngɛhazi akatshu la ntondo kawɔ ko akatokitsha danga lo elungi k’ɔna, koko ndooko dui diakokɛma ndo ndooko kakasalema.+ Nde akakalola dia tohomana la Elisha ko akatowotɛ ate: “Ɔna hakashimwe.”
32 Lam’akɔtɔ Elisha lo luudu, odo w’ɔna waketama lo mbeto+ kande.
33 Nde akɔtɔ, akayadihe la nde lo luudu ko akatatɛ nɔmba Jehowa.+
34 Oma laasɔ, nde akemala lo mbeto, aketama laadiko di’ɔnakɔ ndo akakitsha onyɔ ande lo onyɔ w’ɔnakɔ, washo ande lo washo w’ɔnakɔ ndo awambo ande lo awambo w’ɔnakɔ, ndo nde akatetemala nkotama laadiko di’ɔnakɔ, ko demba di’ɔna diakatatɛ mpɛtahɛta.+
35 Nde aketeta lo luudu lɛnɛ la lɛnɛ ndo nde akemala laadiko dia mbeto, ko akakotama laadiko di’ɔnakɔ nto. Ɔnakɔ akakashiya mbala 7, ko nde akadihola washo.+
36 Ko Elisha akelɛ Ngɛhazi ndo akate ate: “Elɛ womoto l’ose Shunɛma.” Ko nde akawelɛ ndo womoto akɔ akɔtɔ le nde. Oma laasɔ, nde akate ate: “Ɔsa ɔnayɛ.”+
37 Womoto akɔ akɔtɔ, akayakɔsha lo ekolo ande ndo akakusama la nkɛtɛ la ntondo kande; l’ɔkɔngɔ wa laasɔ, nde akɔshi ɔnande ko akatombe.
38 Lam’akakalola Elisha la Ngilingalɛ, ndjala ka kasha kaki lo wodja.+ Ana w’amvutshi+ wakadjasɛ la ntondo kande, ko nde akatɛ okambi+ ande ate: “Kitsha mpoke ka woke la dja kele katɛ ana w’amvutshi diangɔ dia ndɛ.”
39 Ko onto ɔmɔtshi l’atei awɔ akatshu l’oswe dia toka akatshikatshi, ko nde akatɛna dambo dia eshinɔ ndo akake eshinɔ oma lɔkɔ, akaalodia lo dihɔndɔ diande. Oma laasɔ nde akakalola, akawaate ndo akawadje lo mpoke ka diangɔ diakɔ aha la mbeya diangɔ diakaye la nde.
40 L’ɔkɔngɔ diko, vɔ wakadisha apami akɔ dia vɔ ndɛ, koko kam’akawale diangɔ diakɔ, vɔ wakate la dui dia wolo vate: “Okambi wa Nzambi ka mɛtɛ le, nyɔi kekɔ lo mpoke.” Ko vɔ kokoka ndɛ.
41 Ko nde akate ate: “Nyela yema y’ofushi.” L’ɔkɔngɔ wa nde mbokɛ yema lo mpoke kakɔ, nde akate ate: “Nyosha anto.” Ko ndooko ɛngɔ ka kɔlɔ kaki lo mpoke+ kakɔ nto.
42 Pami kɛmɔtshi akaye oma la Baala-Shalisha+ ndo nde akela okambi wa Nzambi ka mɛtɛ mapa 20 wakawasale la asami+ w’ɔlɔnga kaamɛ la tapa dia ntɔngɔ y’eyoyo.+ Ko Elisha akate ate: “Sha anto kele wale.”
43 Koko okambi ande akate ate: “Ngande wayomokoka nkitsha diangɔ nɛ la ntondo k’anto 100?”+ Ko nde akate ate: “Sha anto kele wale, nɛ dia Jehowa kata ate: ‘Vɔ wayɔlɛ ndo dimɔtshi diayotshikala.’”+
44 Ko nde akadikitsha la ntondo kawɔ ndo vɔ wakale, ko diangɔ dimɔtshi diakatshikala,+ lo ndjela ɔtɛkɛta wa Jehowa.
Nɔtɛ ka l'ɛse ka dikatshi
^ Kana “mpamba kele la ɔlɔmɔ.”
^ Kana “nɛ dia anima ande wekɔ ololo le nde.”
^ Kana “wele anima ayɛ.”
